Hez 31 - Ndebele Bible (iBhayibhili Elingcwele) 1978

IGibithe ifanana lesihlahla somkusu

1Ngomnyaka wetshumi lanye, ngosuku lokuqala enyangeni yesithathu, ilizwi leNkosi lafika kimi lathi:

2Ndoda, tshono kuFaro inkosi yaseGibithe lakubo bonke abantu bakhe uthi:

Ufana lobani ebukhulwini bakho na?

3Ngizakukufanisa lomkusu oseLebanoni,

olengatsha ezinhle ezinika umthunzi eguswini,

omude kakhulu, olezihloko ezifinyelela emayezini.

4Amanzi awuthelela, lamanzi angaphansi awukhulisa,

imifula yawo yageleza yazingelezela indawo ohlanyelwe kiyo,

yakhuphela imisele yayo kuzo zonke izihlahla zeganga.

5Waphakamake, wazedlula zonke izihlahla zegusu,

ingatsha zawo zaba zinkulu zaba nde,

ngenxa yobunengi bamanzi empandeni zawo.

6Zonke inyoni zaphezulu zakhela izidleke zazo engatsheni zawo,

lenyamazana zonke zeganga zazalela ngaphansi kwengatsha zawo,

langaphansi komthunzi kwahlala izizwe zonke ezinkulu.

7Wawumuhle ngobukhulu bawo, langobude bengatsha zawo,

ngoba impande zawo zatshona zafika emanzini amanengi.

8Imikusu yensimini kaNkulunkulu yayingeke ilinganiswe lawo,

leminondo yayingalingani lengatsha zawo;

lomangwe wawungeke ulinganiswe lengatsha zawo,

kwakungekho isihlahla ensimini kaNkulunkulu esihle njengawo.

9Ngawenza wamuhle ngobunengi bengatsha zawo,

lazo zonke izihlahla zaseEdeni zawuhawukela,

izihlahla ezazisensimini kaNkulunkulu.

10Ngakho iNkosi uNkulunkulu ithi: Ngenxa yokuba waba mude, izihloko zawo zathinta amayezi, inhliziyo yawo yaziphakamisa ngobude bawo,

11ngizawunikela esandleni sesikhulu sezizweni; sizakuwuphatha ngokufanele ububi bawo. Sengiwulahlile.

12Abezizweni abalesihluku kulazo zonke izizwe bazawuquma bawulahle; ingatsha zawo zizawela ezintabeni lasezihotsheni; zizakwephukela ezifuleni zelizwe, labantu bonke bomhlaba basuke emthunzini wawo, bawutshiye.

13Nxa usuwile, zonke inyoni zaphezulu zizahlala phezu kwawo, lenyamazana zonke zeganga zihlale phezu kwengatsha zawo.

14Lokhu kwenzelwa ukuba kungabi lasihlahla ngasemanzini esikhula sibe side kakhulu, lezihloko zaso zithinte amayezi, kungabi lasihlahla esinatha amanzi esifinyelela emayezini; ngoba zonke zimiselwe ukufa, ziye elizweni elingaphansi komhlaba, njengabantu abafileyo abehlela phansi egodini.

15INkosi uNkulunkulu ithi: Lapho umkusu usuwehlele endaweni yabafileyo, ngizakwenza okungaphansi komhlaba kuwulilele, ngimise imifula yawo, ngivimbele amanzi amanengi. Ngizasibekela iLebanoni ngomnyama ngenxa yawo, lezihlahla zonke zizadana ngenxa yawo.

16Ngizakwenza zonke izizwe zithuthumele ngomdumo wokuwa kwawo, lapho ngiwuphosela endaweni yabafileyo kanye lalabo abehlela egodini. Zonke izihlahla zaseEdeni, ezikhethiweyo lezinhle zaseLebanoni, zonke ezinatha amanzi, zizaduduzwa elizweni elingaphansi komhlaba.

17Lazo zizakuya endaweni yabafileyo kanye lawo, kubo ababulewe empini. Yebo, labo abahlala ngaphansi komthunzi wawo phakathi kwezizwe bazabhubha.

18Phoke, wena ufana lobani ngodumo langobukhulu ezihlahleni zaseEdeni na? Uzakwehliselwa elizweni elingaphansi komhlaba lezihlahla zaseEdeni, ulale phakathi kwabangasokanga, kanye labo ababulewe empini. Lo nguFaro lalo lonke ixuku lakhe, kutsho iNkosi uNkulunkulu.