Hubo 108 - Ndebele Bible (iBhayibhili Elingcwele) 1978

Umkhuleko wokucela ukusizwa lokunqoba

1Inhliziyo yami isiqinisiwe, Nkulunkulu,

inhliziyo yami isiqinisiwe.

Ngizakuhlabelela ngitshotshe.

Vuka, mphefumulo wami!

2Vukani mhubhe lechacho! Ngizakuvusa ukusa.

3Ngizakukubonga, Nkosi, phakathi kwabantu,

ngikudumise phakathi kwezizwe.

4Ngoba uthando lwakho olungapheliyo lukhulu kakhulu njengamazulu,

lobuqotho bakho bufinyelela emayezini.

5Phakama, Nkulunkulu, ngaphezu kwamazulu,

ubukhosi bakho bube phezu komhlaba wonke.

6Ukuze abathandekayo bakho bakhululwe

nqoba ngesandla sakho sokunene, ungiphendule.

7UNkulunkulu ukhulumile esendaweni yakhe engcwele,

wathi: Ngokuthaba ngizakulicanda iShekema,

ngisabe isihotsha saseSukothi.

8Ungowami uGileyadi, ungowami uManase;

uEfrayimi uyisivikelo sekhanda lami,

uJuda uyintonga yami yokubusa.

9UMowabi ungumganu wami wokugezela,

phezu kukaEdoma ngiphosela amanyathelo ami,

ngithabe ngokunqoba iFilistiya.

10Ngubani ozakungisa emzini oqinileyo na?

Ngubani ozangiholela eEdoma na?

11Wena Nkulunkulu, kawusilahlanga na?

Nkulunkulu, kawusaphumi lezimpi zethu.

12Akusisize ezitheni zethu,

ngoba ukusiza komuntu kuyize.

13LoNkulunkulu sizakunqoba,

kunguye ozakunyathela phansi izitha zethu.