Jer 44 - Ndebele Bible (iBhayibhili Elingcwele) 1978

UJeremiya utshumayeza abaJuda eGibithe

1Ilizwi elafika kuJeremiya ngabo bonke abaJuda ababehlala elizweni laseGibithe eMigidoli laseTahafanesi, laseMemfisi, laselizweni lasePatrosi,

2lathi: INkosi yamabandla, uNkulunkulu kaIsrayeli, ithi: Likubonile konke okubi engakwehlisela phezu kweJerusalema laphezu kwayo yonke imizi yakoJuda. Lamhla iyinkangala, kakulamuntu ohlala khona,

3ngenxa yobubi babo ababenzayo, bangivusa ulaka ngoba batshisa impepha, bakhonza abanye onkulunkulu abangabaziyo bona kanye lani labokhokho benu.

4Kanti ngathuma inceku zami zonke abaprofethi, ngazithuma njalonjalo, ngisithi: Lingayenzi linto enengisayo lengiyizondayo.

5Kodwa kabalalelanga kabezwanga, ukuba baphenduke ebubini babo, bangatshiseli abanye onkulunkulu impepha.

6Ngakho ulaka lwami lokuthukuthela kwami kwavutha emizini yonke yakoJuda lasezindleleni zeJerusalema; zaphenduka zaba yinkangala, zachitheka njengalamhla nje.

7Ngakhoke iNkosi, uNkulunkulu wamabandla, uNkulunkulu kaIsrayeli, ithi: Likwenzelani phezu kwenu lokhu okubi kangaka, ukuba libhubhise indoda lomfazi, usane lomntwana, baphele koJuda, kungasali muntu na?

8Kungani lingithukuthelisa ngezithombe zenu, litshisela abanye onkulunkulu impepha eGibithe lapho selihlala khona, ukuze libhujiswe, liphenduke into yokuthukwa leyokuhlekwa phakathi kwazo zonke izizwe zasemhlabeni na?

9Selakhohlwa yini ububi babokhokho benu, lobubi bamakhosi akoJuda, lobubi babomkabo, lobenu ububi, lobubi babomkenu, elabenza elizweni lakoJuda lasezindleleni zeJerusalema na?

10Kalizithobanga kuze kube lamhla, futhi kalesabanga, kalihambanga ngomlayo wami langezimiso zami engazibeka phambi kwenu laphambi kwabokhokho benu.

11Ngakhoke iNkosi yamabandla, uNkulunkulu kaIsrayeli, ithi: Ngizalenzela okubi ukuba ngiliqede elizweni lonke lakoJuda.

12Ngizathatha abaseleyo koJuda abafise ukuzahlala eGibithe, bazabhubha bonke, babulawe yimpi layindlala elizweni laseGibithe, baphele bonke abancinyane labakhulu, babe yinto eyenyanyekayo, into eyesabekayo, leyokuthukwa, leyokuhlekwa.

13Ngizatshaya labo abahlezi eGibithe, njengoba ngatshaya iJerusalema, ngempi langendlala langomkhuhlane,

14ukuze kungabi khona loyedwa kwabaseleyo koJuda, abafikileyo ukuhlala eGibithe, ozaphunyuka asile, abuyele elizweni lakoJuda abafisa ukubuyela kulo, bahlale khona; ngoba kabayikubuyela kuphela abaphunyukileyo.

15Wonke amadoda ayesazi ukuthi omkabo batshisela abanye onkulunkulu impepha, labo bonke abesifazana ababekhona belixuku elikhulu, labo bonke abantu ababehlala ePatrosi elizweni laseGibithe, bamphendula uJeremiya bathi:

16Ilizwi olikhulume kithi ebizweni leNkosi kasiyikulilalela.

17Kodwa sizakwenza konke esizimisele ukukwenza; sizatshisela iNkosikazi yaphezulu impepha, siyithululele iminikelo yokuthululwa, njengokuba besisenza thina, labobaba, lamakhosi ethu, lezikhulu zethu, emizini yakoJuda lasezindleleni zeJerusalema; ngoba sasilokudla okunengi, sihlezi kuhle singaboni okubi.

18Kodwa lokhu sayekela ukutshisela iNkosikazi yaphezulu impepha lokuyithululela iminikelo yokuthululwa, siswele konke, siqedwe yimpi layindlala.

19Abesifazana bona bathi: Lapho sasitshisela iNkosikazi yaphezulu impepha, siyithululela iminikelo yokuthululwa, kumbe siyenzela izinkwa ezilomfanekiso wayo, siyithululela iminikelo yokuthululwa, sakwenza lokho ngaphandle kwemvumo yabomkethu na?

20UJeremiya wasesithi kubo bonke abantu, amadoda labesifazana, bonke ababemphendule ngalowomazwi:

21Impepha elayitshisa emizini yakoJuda lasezindleleni zeJerusalema, lina laboyihlo, lamakhosi enu, lezikhulu zenu, labantu belizwe, iNkosi kayikukhumbulanga na? Kakungenanga engqondweni yayo na?

22INkosi yayingaselakukuthwala okubi kwemisebenzi yenu lezinengiso elazenzayo; ngakhoke ilizwe lenu lachitheka, laba yinkangala, laba yinto yokuthukwa, kakusekho okuhlala khona njengoba kunjalo lamhla.

23Kungenxa yokuba litshisile impepha, lona eNkosini, lingalilalelanga ilizwi layo, lingahambanga ngomlayo wayo langezimiso zayo langemithetho yayo, ngalokho okubi lokhu kwehlele phezu kwenu njengalamhla nje.

24UJeremiya wathi kubo bonke abantu lakwabesifazana bonke: Zwanini ilizwi leNkosi, lina lonke bakoJuda eliselizweni laseGibithe.

25INkosi yamabandla, uNkulunkulu kaIsrayeli, ithi: Lina labomkenu likukhulumile ngemilomo yenu, lakugcwalisa ngezandla zenu, lathi: Sizagcwalisa impela izifungo zethu esizenzileyo zokuba sitshisele iNkosikazi yaphezulu impepha, siyithululele iminikelo yokuthululwa. Ngakho qinisani izifungo zenu, lizenze!

26Kodwa zwanini ilizwi leNkosi, lina lonke bakoJuda elihlala eGibithe: Khangelani, ngifungile ibizo lami elikhulu, kutsho iNkosi, ukuba ibizo lami kalisayikubizwa futhi ngumlomo womuntu koJuda, kulo lonke ilizwe laseGibithe, ngokuthi: Ngifunga iNkosi uNkulunkulu.

27Ngilindele ukubenza okubi, kungesikho okuhle; bonke abakoJuda abaseGibithe bazaqedwa yimpi layindlala, baze baphele bonke.

28Labo abaphepha empini bazabuyela elizweni lakoJuda bevela eGibithe, beyingcosana nje; labo bonke abaseleyo koJuda abeze eGibithe ukuhlala khona, bazakwazi ukuba ilizwi elizakuma ngelikabani, elami kumbe elabo.

29Lokhu kuzakuba yisibonakaliso kini, kutsho iNkosi, ukuthi ngizalitshaya kulindawo, ukuze lazi ukuthi amazwi ami engiwakhuluma ngani azakuma impela.

30INkosi ithi: Khangelani, ngizanikela uFaro Hofra inkosi yaseGibithe ezandleni zezitha zakhe, lasezandleni zalabo abamzingelayo, njengoba nganikela uZedekiya inkosi yakoJuda esandleni sikaNebukadineza inkosi yaseBabiloni, owayeyisitha sakhe emzingela.