2 Sam 14 - Ndebele Bible (iBhayibhili Elingcwele) 1978

UJowabi wenza icebo lokubuyisa uAbisalomu

1UJowabi indodana kaZeruya wabona ukuthi inhliziyo yenkosi ikuAbisalomu.

2Wasethumela ilizwi eTekowa ukuba alande khona owesifazana ohlakaniphileyo, wathi kuye: Ake uzitshaye olilayo, ugqoke izigqoko zokuzila; ungazigcobi ngamagcobo, kodwa ube njengowesifazana oselilele ofileyo insuku ezinengi.

3Ungeneke enkosini, ukhulume kuyo ngalindlela. UJowabi wasemfunzake amazwi.

4Lapho owesifazana efika enkosini, wathi mbo ngobuso phansi, wakhuleka, wasesithi: Siza, nkosi!

5Inkosi yathi kuye: Uhlutshwa yini na? Yena wathi: Sibili, nkosi, ngingumfelwakazi, indoda yami seyafa.

6Incekukazi yakho yayilamadodana amabili, alwa wodwa egangeni; kwakungelamuntu wokuwalamula, enye yatshaya enye, yayibulala.

7Usendo lonke seluvukele incekukazi yakho, luthi: Sinike yena owatshaya umfowabo wambulala, ukuba simbulale ngenxa yokuba wabulala umfowabo, siyibulale indlalifa. Ngalokhoke bacime isikhuni sami esiseleyo, bangabe besatshiyela indoda yami ibizo lenzalo emhlabeni.

8Inkosi yasisithi kowesifazana: Hamba endlini yakho; mina ngizalungisa indaba yakho.

9Owesifazana waseTekowa wasesithi enkosini: Nkosi yami, icala kalibe phezu kwami laphezu kwendlu kababa; inkosi lesihlalo sayo sobukhosi kungabi lacala.

10Yathi inkosi: Otsho ulutho kuwe, umlethe kimi; kayikuphinda akuthinte futhi.

11Yena wasesithi: Inkosi ake ifunge iNkosi uNkulunkulu wayo ukuba isihlobo sami esifuna ukuphindisela singaqhubeki ukubulala, ukuze ingabhujiswa indodana yami. Inkosi yathi: Ngifunga iNkosi, kakuyikuwela phansi olulodwa unwele lwendodana yakho.

12Owesifazana wasesithi: Incekukazi yakho ake ikhulume ilizwi enkosini yami. Yathi: Khuluma.

13Owesifazana wasesithi: Uqambeleni okunje ngabantu bakaNkulunkulu na? Ngokukhuluma lokhu inkosi izethwesa icala, ngoba iyala ukubuyisa oxotshiweyo wayo ekhaya.

14Sifanele ukufa sonke, sinjengamanzi achithekele phansi angaselakubuthwa futhi; kodwa uNkulunkulu uzamyekela umuntu ongenzi olahliweyo ahlale exotshiwe.

15Ngizile ukukhuluma lokhu enkosini yami ngoba abantu bangethusile; incekukazi yakho yasisithi: Ngizakhuluma lenkosi; mhlawumbe inkosi izalizwa ilizwi lencekukazi yayo.

16Ngoba inkosi izakuzwa, ikhulule incekukazi yayo esandleni somuntu ofuna ukungichitha mina lendodana yami elizweni labantu bakaNkulunkulu.

17Ngasengisithi: Ilizwi lenkosi yami lizangiduduza, ngoba inkosi yami injengesithunywa sikaNkulunkulu ukubona okubi lokuhle. INkosi uNkulunkulu wakho kayibe lawe.

18Inkosi yasimphendula owesifazana isithi: Ungafihli lutho engizalubuza kuwe. Owesifazana wathi: Inkosi kayikhulume.

19Yathi inkosi: Isandla sikaJowabi silawe yini kukho konke lokhu na? Owesifazana waphendula wathi: Ngifunga inkosi yami, lapho inkosi ibuza umbuzo, kakulandlela yokuwuvika, ngasokunene langasekhohlo. Yebo, inceku yakho uJowabi yangilaya, yiyo eyangifunza wonke lamazwi.

20Inceku yakho uJowabi ikwenzile lokhu ukuba iphendule ukuma kwendaba. Kodwa inkosi yami ilokuhlakanipha okunjengokwesithunywa sikaNkulunkulu, iyakwazi konke okusemhlabeni.

21Inkosi yasisithi kuJowabi: Khangela, ngiyakuvumela; hamba ulande umfana uAbisalomu.

22UJowabi wasesithi mbo ngobuso phansi, wakhuleka, wayibusisa inkosi, wasesithi: Lamuhla ngiyazi ukuba ngifumene umusa emehlweni akho, nkosi yami, ngoba inkosi isizwile isicelo sami.

23Wasesuka uJowabi ehamba, waya eGeshuri, wambuyisa eJerusalema uAbisalomu.

24Inkosi yathi: Kaye endlini yakhe, angezi lapha kimi. Ngakho uAbisalomu wasesiya endlini yakhe, kangenanga enkosini.

25Kuye wonke uIsrayeli kwakungelamuntu obukeka njengoAbisalomu ngobuhle bakhe; kwakungelasici kuye kusukela ophangweni lonyawo lwakhe kuze kufike enkanda yakhe.

26Nxa egela inwele zakhe — ngoba wayezigela iminyaka yonke, ngoba zazimsinda ngobunzima bazo — zazilingana lamashekeli angamakhulu amabili ngesilinganiso senkosi.

27UAbisalomu wazala amadodana amathathu lendodakazi eyodwa eyayithiwa nguTamari; wayengowesifazana omuhle kakhulu.

28UAbisalomu wahlala eJerusalema iminyaka emibili epheleleyo engangeni enkosini.

29Wasebiza uJowabi ukuba amthume enkosini; kodwa yena kavumanga ukuza kuye. Waphinda wambiza ngokwesibili, kodwa uJowabi kavumanga ukuza.

30Wasesithi encekwini zakhe: Khangelani, insimu kaJowabi iseduze leyami, kulamabele kiyo; hambani liyithungele ngomlilo. Inceku zikaAbisalomu zayithungelake insimu ngomlilo.

31Wasesuka uJowabi esiya kuAbisalomu endlini yakhe, wathi kuye: Inceku zakho ziyithungeleleni insimu yami ngomlilo na?

32UAbisalomu wamphendula uJowabi wathi: Ngithumele ilizwi kuwe ukuba uze lapha, ukuze ngikuthume enkosini, ukuba ungibuzele uthi: Ngisukeleni eGeshuri na? Ngabe kungcono kimi uba ngilokhu ngisekhonale. Ake ungivumele ngingene kuwe, nkosi; uba ngilecala, ungibulale.

33UJowabi wasesiya enkosini, wayitshela, yambiza uAbisalomu; weza enkosini, wafika wathi mbo ngobuso phansi phambi kwayo; inkosi yamanga uAbisalomu.