Hez 6 - Ndebele Bible (iBhayibhili Elingcwele) 1978

Ilizwi leNkosi ngezintaba zakoIsrayeli langezithombe

1Ilizwi leNkosi lafika kimi lathi:

2Ndoda, khangela ngasezintabeni zakoIsrayeli, utshumayele ngazo,

3uthi: Lina zintaba zakoIsrayeli, zwanini ilizwi leNkosi uNkulunkulu. INkosi uNkulunkulu ithi ezintabeni lasemaqaqeni lasezifuleni lasezihotsheni: Mina uqobo ngizakwehlisela phezu kwenu umkhonto, ngivale indawo zenu eziphakemeyo zokukhonzela.

4Ama‐altare enu azadilizwa, kubulawe lama‐altare okutshisela impepha; lababuleweyo bakini ngibaphosele phambi kwezithombe zenu.

5Ngizabeka izidumbu zabakoIsrayeli phambi kwezithombe zabo, ngichithachithe amathambo enu kuma‐altare enu inxa zonke.

6Kuzo zonke indawo lapho lihlala khona imizi yenu izachitheka, lendawo zenu eziphakemeyo zokukhonzela zivalwe, lama‐altare enu adilike aphele nya, lezithombe zenu zibulawe ziphele, lama‐altare enu okutshisela impepha adilizwe, lemisebenzi yenu ibhidlizwe.

7Nxa abantu bebulawa phakathi kwenu, lizakwazi ukuba ngiyiNkosi.

8Kanti ngizayekela abanye benu baphephe bahlakazeke phakathi kwezizwe.

9Abaseleyo bakini bazangikhumbula phakathi kwezizwe abathunjelwe kizo; bazakhumbula ukudabuka kwami ngenxa yenhliziyo zabo ezasuka kimi ngenxa yobubi langenxa yamehlo abo ayelandele izithombe. Ng’khona bazanengwa yibo bonke ububi ababenzileyo langamanyala abo wonke.

10Bazakwazi ukuba mina ngiyiNkosi. Kangikhulumanga ize nxa ngisithi ngizakwenza lokho okubi kibo.

11INkosi uNkulunkulu ithi: Qakeza izandla zakho, ugide ngenyawo zakho uthi: Maye! ngenxa yawo wonke amanyala amabi akoIsrayeli; ngoba bazabulawa yimpi, layindlala, layisifo.

12Okhatshana uzabulawa yisifo, oseduze abulawe yimpi, loseleyo abulawe yindlala. Kuzaphela ngokunjalo ukufutheka kwami phezu kwabo.

13Lizakwazi ukuba ngiyiNkosi nxa ababuleweyo babo sebelele phakathi kwezithombe zabo, behanqe ama‐altare abo, phezu kwawo wonke amaqaqa amade, lasezingqongeni zonke zezintaba, langaphansi kwazo zonke izihlahla eziluhlaza, langaphansi kwazo zonke izihlahla ezinkulu ezilamahlamvu, loba kungaphi lapho bebenikela khona ngephunga elimnandi kuzo zonke izithombe zabo.

14Ngizabaphakamisela isandla sami, ngilichithe ilizwe liphele, kuzo zonke indawo abahlala kuzo, kusukela enkangala kuze kufike eRibila. Ng’khonake bezakwazi ukuba ngiyiNkosi.