Jak 3 - Ndebele Bible (iBhayibhili Elingcwele) 1978

Izono zolimi

1Bazalwane bami, lingabi ngabafundisi abanengi, lazi ukuthi thina esifundisayo sizakwahlulelwa ngokukhulu.

2Ngoba sonke siyakhubeka ngokunengi. Uba umuntu engakhubeki ekukhulumeni kwakhe, lowo ungumuntu opheleleyo, olamandla okubamba lomzimba wonke.

3Uba sifaka amatomu emilonyeni yamabhiza ukuze asilalele, siqondisa lomzimba wonke wawo.

4Khangelani lemikolo, lanxa imikhulu kangaka, iqhutshwa yimimoya elamandla, iyaqondiswa ngephinyana nje, lapho umtshayeli efuna ukuyiqondisa khona.

5Lunjalo lolimi, luyisitho esincinyane, kanti luzincoma ngezinto ezinkulu. Khangelani umlilo omncinyane uyatshisa ihlathi elikhulu!

6Ulimi lungumlilo, lungumhlaba wobubi. Phakathi kwezitho zethu ulimi yilo olungcolisa umzimba wonke, luthungele ukuphila konke, lona luthungelwa yisihogo.

7Zonke inhlobo zezinyamazana, lezezinyoni, lezezihuquzelayo, lezezidalwa zasolwandle, ziyathanjiswa ngabantu, yebo sezithanjisiwe;

8kodwa kakulamuntu ongathambisa ulimi; luyibubi obungenqotshwe, lugcwele ubuhlungu obubulalayo.

9Ngalo siyabonga iNkosi uBaba, langalo sithuka abantu abenziwe bafana loNkulunkulu.Gen 1:26

10Emlonyeni munye kuyaphuma ukubonga lenhlamba. Lokhu kakufanelanga, bazalwane bami.

11Umthombo ungagobhoza yini amanzi amnandi lababayo emgodini munye na?

12Bazalwane bami, umkhiwa ungathela izithelo zamaoliva yini, loba ivini lithele izithelo zomkhiwa na? Lamanzi alitshwayi angeke aveze amnandi.

Ukuhlakanipha okuvela phezulu

13Ngubani ohlakaniphileyo loqedisisayo phakathi kwenu na? Katshengise ngokuhamba kwakhe okuhle imisebenzi yakhe ngobumnene langokuhlakanipha.

14Kodwa uba lilomhawu obabayo lombango enhliziyweni zenu, lingazincomi, liqambele amanga iqiniso.

15Lokhu kakusikho ukuhlakanipha okuvela phezulu, kodwa kungokomhlaba, kungokwenyama lokwabomoya ababi.

16Ngoba lapho kukhona umhawu lombango, kukhona futhi isiphithiphithi lezenzo ezimbi.

17Kodwa ukuhlakanipha okwaphezulu okokuqala kuhlambulukile, andubana kube lokuthula, kube mnene, kulalele, kugcwale isihawu lezithelo ezinhle; kakulakuthandabuza lokuzenzisa.

18Izithelo zokulunga zivela enhlanyelweni yokuthula, ehlanyelwa yilabo abathanda ukuthula.