2 Kho 23 - Ndebele Bible (iBhayibhili Elingcwele) 1978

Imvuselelo kaJosiya

1Inkosi yasithumela ilizwi, yabiza bonke abadala bakoJuda labeJerusalema ukuba babuthane.

2Inkosi yaya ethempelini, ahamba layo wonke amadoda akoJuda labo bonke abaseJerusalema labapristi labaprofethi, bonke abantu abancinyane labakhulu, yababalela wonke amazwi encwadi yesivumelwano eyayifunyenwe ethempelini.

3Inkosi yema ngasensikeni, yenza isivumelwano phambi kweNkosi uNkulunkulu sokuyilandela lokugcina imilayo yayo lemithetho yayo lezimiso zayo ngenhliziyo yayo yonke langomoya wayo wonke, lokwenza okutshiwo ngamazwi alesisivumelwano alotshiweyo encwadini. Bonke abantu bangena esivumelwaneni.

4Inkosi yalaya uHilikiya umpristi omkhulu lompristi omlandelayo labalindi beminyango ukuba bakhuphe ethempelini zonke izitsha ezazenzelwe uBali lonkulunkulukazi uAshera, lazo zonke inkanyezi zaphezulu, wazitshisela ngaphandle kweJerusalema eziqintini zaseKidroni, wathwalela eBetheli umlotha wazo.2 Kho 21:3; 2 Lan 33:3

5Wakhupha abapristi bezithombe amakhosi akoJuda ayebabekile ukutshisa impepha endaweni eziphakemeyo zokukhonzela emizini yakoJuda langaseJerusalema, lalabo ababetshisela uBali impepha lelanga lenyanga lezinkanyezi zonke zaphezulu.

6Wakhupha ethempelini insika emiselwe unkulunkulukazi uAshera, wayisa esifuleni iKidroni ngaphandle kweJerusalema, wayitshisa khona, wayicubuza yaba luthuli, waluphosela emalibeni abantukazana.

7Wadiliza izindlu zamadoda angamawule ezazikhona ethempelini lapho abesifazana babesalukela khona amaveli kankulunkulukazi uAshera.

8Wakhupha bonke abapristi emizini yakoJuda, wangcolisa indawo eziphakemeyo zokukhonzela lapho abapristi babetshisela khona impepha, kusukela eGeba kusiya eBerisheba. Wavala indawo eziphakemeyo zokukhonzela zabomoya ababi ngaphambi kwesango likaJoshuwa umphathi womuzi, ngasekhohlo kwesango lomuzi.

9Labobapristi bendawo eziphakemeyo zokukhonzela kabezanga ealtareni leNkosi uNkulunkulu eJerusalema, kodwa badla isinkwa esingelamvubelo phakathi kwezihlobo zabo.

10Wangcolisa iTofethi elisesihotsheni saseBeni‐Hinomu ukuze kungabi khona umuntu otshisa indodana yakhe kumbe indodakazi yakhe ibe ngumnikelo kunkulunkulu uMoloki.Jer 7:31; 19:1–6; 32:35; Levi 18:21

11Entubeni yethempeli wasusa amabhiza amakhosi akoJuda ayewahlukanisele ilanga, wona ayeseduze lendlu kaNathani‐Meleki umthenwa eyayingaphandle, wazitshisa ngomlilo inqola zelanga.

12Ama‐altare ayesophahleni lwendlu kaAhazi engaphezulu ayakhiwe ngamakhosi akoJuda, lama‐altare uManase ayewakhe emagumeni womabili ethempeli, uJosiya wawadiliza wawachoboza, uthuli lwawo waluphosela esifuleni iKidroni.2 Kho 21:5; 2 Lan 33:5

13Inkosi yangcolisa indawo eziphakemeyo zokukhonzela ezazingasempumalanga kweJerusalema, ngaseningizimu kwentaba ethiwa iOliveti, uSolomoni inkosi yakoIsrayeli eyayizakhele uAshitorethi unkulunkulukazi oyisinengiso samaSidoni, loKemoshi unkulunkulu oyisinengiso saseMowabi, loMilkomu unkulunkulu oyisinengiso samaAmoni.1 Kho 11:7

14Wadiliza insika zokukhonzela, wagamula insika zikankulunkulukazi uAshera, wafaka amathambo abantu amanengi endaweni zazo.

15EBetheli wadiliza ialtare elalisendaweni ephakemeyo yokukhonzela elamiswa nguJerobowamu indodana kaNebati owenza uIsrayeli ukuba one, walichitha kanye lendawo ephakemeyo yokukhonzela, wadiliza amatshe alo, wawachoboza aba luthuli, watshisa insika kankulunkulukazi uAshera. 1 Kho 12:33

16Lapho uJosiya ethalaza wabona amaliba phezulu entabeni, wathumela abantu ukukhupha amathambo emalibeni, wawatshisela phezu kwealtare, walingcolisa, njengelizwi leNkosi elakhulunywa ngumuntu kaNkulunkulu lapho uJerobowamu emi eduze lealtare ngesikhathi somkhosi. Kodwa lapho uJosiya ebona iliba lomuntu kaNkulunkulu owabikezela lezizinto,1 Kho 13:2

17wabuza esithi: Yisikhumbuzo sani lesiyana na? Abantu bomuzi bamtshela bathi: Lingcwaba lomuntu kaNkulunkulu owavela koJuda wabikezela lezizinto ozenzileyo ealtareni laseBetheli.1 Kho 13:30–32

18Yena wasesithi: Myekeleni, amathambo akhe angasuswa muntu. Basebewayekela amathambo akhe kanye lamathambo omprofethi owavela eSamariya.

19UJosiya wasusa amathempeli ezindawo eziphakemeyo zokukhonzela ezisemizini yaseSamariya ayakhiwe ngamakhosi akoIsrayeli ethukuthelisa iNkosi, wenza kiwo lokho akwenza eBetheli.

20Wabulalela abapristi bezindawo eziphakemeyo zokukhonzela phezu kwama‐altare, watshisela amathambo abantu phezu kwawo. Wasebuyela eJerusalema.

Ukugcinwa kwePhasika

21Inkosi uJosiya yalaya bonke abantu yathi: Ligcine iPhasika leNkosi uNkulunkulu wenu, njengalokhu kulotshiwe kulincwadi yesivumelwano.

22Lalingagcinwanga iPhasika elinjalo kusukela ensukwini zabehluleli abaphatha uIsrayeli, lakuzo zonke insuku zamakhosi akoIsrayeli lezamakhosi akoJuda.

23Kodwa ngomnyaka wetshumi lesificaminwembili wokubusa kukaJosiya lagcinwa iPhasika leNkosi eJerusalema.

24UJosiya wasusa abalamadlozi, labathakathi, lezithombe ezithiwa amaterafi, lezinye izithombe, lawo wonke amanyala okwakukhona elizweni lakoJuda laseJerusalema, ukuze aqinise amazwi omlayo ayelotshwe encwadini uHilikiya umpristi ayifumana ethempelini.

25Ngaphambi kwakhe kakubanga khona inkosi eyafanana laye eyaphendukela eNkosini uNkulunkulu ngenhliziyo yayo yonke langomoya wayo wonke langamandla ayo wonke, yalandela wonke umlayo kaMose. Futhi kakuvelanga enye inkosi ngemva kwakhe eyafanana laye.

26Kanti iNkosi kayidedanga ekuvutheni kolaka lwayo olwavutha kakhulu koJuda ngenxa yazo zonke izinto uManase ayithukuthelisa ngazo.

27INkosi yathi: Ngizamsusa loJuda phambi kwami njengoIsrayeli engamsusayo, ngiwulahle lumuzi waseJerusalema engawukhethayo, lendlu engathembisa ukuba ibizo lami lizakuba kuyo.

Ukufa kukaJosiya

28Ezinye indaba zikaJosiya lakho konke akwenzayo kulotshiwe ogwalweni lwezindaba zamakhosi akoJuda.

29Ensukwini zokubusa kukaJosiya uFaro‐Neko inkosi yaseGibithe wasuka waya enkosini yaseAsiriya ngasemfuleni iYufrathi. UJosiya wahlangabezana laye; ekuhlanganeni kwabo uFaro‐Neko wambulala eMegido.

30Inceku zakhe zathwala isidumbu sakhe ngenqola, zisisusa eMegido zasisa eJerusalema, zamgcwaba elibeni lakhe. Abantu belizwe basebethatha uJehowahazi indodana kaJosiya, bamgcoba, bambeka waba yinkosi esikhundleni sikayise.

Ukubusa kukaJehowahazi

31UJehowahazi wayeleminyaka engamatshumi amabili lantathu lapho eqalisa ukubusa; wabusa inyanga ezintathu eJerusalema. Ibizo likanina lalinguHamutali indodakazi kaJeremiya waseLibina.

32Wenza okubi phambi kweNkosi njengokwenza konke kwabokhokho bakhe.

33UFaro‐Neko wambopha eRibila elizweni laseHamathi ukuba angabe esabusa eJerusalema, wathelisa ilizwe amathalenta esiliva alikhulu lethalenta elilodwa legolide.

34UFaro‐Neko wabeka uEliyakimi indodana kaJosiya ukuba abe yinkosi esikhundleni sikayise, waliphendula ibizo lakhe wathi nguJehoyakimi. Wathatha uJehowahazi, wamusa eGibithe lapho afela khona.Jer 22:11–12

35UJehoyakimi wamnika uFaro isiliva legolide, wathelisa ilizwe ukuze azuze leyomali ebizwa nguFaro. Wathelisa abantu, wabathelisa bonke ngamandla abo ukuze azuze imali yokunika uFaro‐Neko.

Ukubusa kukaJehoyakimi

36UJehoyakimi wayeleminyaka engamatshumi amabili lanhlanu lapho eqalisa ukubusa; wabusa iminyaka elitshumi lanye eJerusalema. Ibizo likanina lalinguZebida indodakazi kaPedaya waseRuma.Jer 22:18–19; 26:1–6; 35:1–9

37Wenza okubi phambi kweNkosi njengokwenza konke kwabokhokho bakhe.