Jer 48 - Ndebele Bible (iBhayibhili Elingcwele) 1978

Ilizwi ngeMowabi

1Mayelana leMowabi. INkosi yamabandla, uNkulunkulu kaIsrayeli, ithi:

Maye ngeNebo! ngoba lichithekile.

IKiriyathayimi liyangekile, linqotshiwe;

inqaba iyangekile, yadilika;

2udumo lweMowabi kalusekho.

EHeshiboni baceba okubi ngalo, bathi:

Wozani silichithe, lingabe lisaba yisizwe.

Lani elihlala eMadimeni lizachitheka,

baxotshane lani ngomkhonto.

3Zwanini, ilizwi lokukhala livela eHoronayimi lisithi:

Ukuchithwa, lokutshabalala okukhulu!

4IMowabi lichithekile;

ukukhala kuzwakala kuze kufike eZowari.

5Emadundulwini aseLuhithi bakhwela bekhala,

lasekwehleni ukuya eHoronayimi bazwile ukukhala kokuchitheka.

6Balekani, lizisilise, libe njengobabhemi weganga enkangala.

7Ngoba ngenxa yokuba lathemba inqaba zenu lenotho yenu lani lizathunjwa;

uKemoshi uzathunjwa kanye labapristi bakhe lezikhulu zakhe.

8Umchithi uzafikela yonke imizi,

kawukho lowodwa ozakusala;

isihotsha sizachitheka, lamagceke aqothulwe, njengokutsho kweNkosi.

9Bekelani iMowabi ilitshe lengcwaba,

ngoba iMowabi lizachitheka masinyane,

imizi yalo izakuba ngamanxiwa angelamuntu.

10Uthukiwe lowo owenza umsebenzi weNkosi ngokungananzeleli; uthukiwe lalowo ogodla umkhonto wakhe ekuchitheni igazi.

11IMowabi lichelesile kusukela ebutsheni balo,

belihlezi lizinzile;

kalithululelwanga embizeni ngembiza, kalithunjwanga;

ngakho ukunambitheka kwalo kuhlala kunjalo,

iphsnga lalo kaliphenduki.

12Ngakhoke insuku ziyeza, kutsho iNkosi, lapho ngizathuma kulo abathambeki abazalithambeka, bathulule imbiza zalo, babulale inqayi zalo.

13Ng’khonake iMowabi lizakuba lenhloni ngoKemoshi, njengalokho indlu kaIsrayeli yaba lenhloni ngeBetheli, ithemba lalo.

14Lingatsho kanjani ukuthi: Singamaqhawe lamadoda empi alamandla?

15Umchithi weMowabi lemizi yalo usefikile.

lezinsizwa zalo ezikhethiweyo sezehlele ekubulaweni,

kutsho iNkosi eyiNkosi yamabandla.

16Ukuhlupheka kweMowabi kusondele, lokutshaywa kwalo kuyaphangisa.

17Likhaleleni, lina lonke elilizingelezeyo,

lani lonke elazi ibizo lalo;

lithi: Yeka ukwaphuka kwenduku elamandla, udondolo oluhle!

18Yehla ebukhosini bakho, uhlale emhlabathini owomileyo, wena ohlala eDiboni.

Ngoba umchithi weMowabi usekufikele,

wachitha inqaba zakho.

19Mana endleleni, ulinde, wena ohlala eAroweri.

Ubuze obalekayo lalowo ophunyukileyo uthi:

Kwenze njani na?

20IMowabi liyangekile, ngoba lichithekile;

lilani likhale;

libike ngaseArinoni ukuba iMowabi lichithekile.

21Ukwahlulela kwehlele phezu kwelizwe elilamagceke, eHoloni leJahazi leMefahathi,

22leDiboni leNebo leBeti‐Dibilathayimi,

23leKiriyathayimi, leBeti‐Gamuli, leBeti‐Meyoni,

24leKeriyothi leBozira, lakuyo yonke imizi yelizwe laseMowabi, eduze lakhatshana.

25Uphondo lweMowabi luqunyiwe, lengalo yalo yephukile, kutsho iNkosi.

26Mdakiseni, ngoba ezikhukhumezile eNkosini; iMowabi lizazibhixa emahlanzweni alo, libe yinhlekisa.

27UIsrayeli kabanga yinhlekisa kuwe na? Wafunyanwa phakathi kwamasela yini ukuba lapho ukhuluma ngaye, unikine ikhanda lakho na?

28Tshiyani imizi, lihlale phakathi kwamadwala, lina elihlala eMowabi.

Libe njengejuba elakha isidleke salo emaweni.

29Sizwile ngokuzigqaja kweMowabi; liyazigqaja kakhulu.

Sizwile ngokuziphakamisa kwalo, lokuziqakisa kwalo,

langokuzikhukhumeza kwalo.

30Ngiyakwazi ukudelela kwalo, kutsho iNkosi;

ukuzincoma kwalo kuyinkohliso,

lezenzo zalo ziyinkohliso.

31Ngalokhoke ngiyalila ngeMowabi,

ngikhale ngabo bonke abaseMowabi,

ngililele abantu baseKiri‐Heresi.

32Ngiyakukhalela wena vini laseSibima ukudlula iJazeri.

Ingatsha zakho zedlula phezu kolwandle, zaze zafinyelela eJazeri.

Umchithi wehlele phezu kwezithelo zakho zasehlobo lasemavinini akho avuniweyo.

33Ukuthaba lokuthokoza kususiwe elizweni laseMowabi elilenala enengi;

ngiqedile iwayini ezikhamelweni;

kakho osakhama izithelo zevini ngokuthokoza,

lomsindo wokuthokoza kawusekho.

34Ukukhala kweHeshiboni leEleyale kuzwakala kuze kube seJahazi. Ukukhala okukhulu kuzwakala eZowari kuze kufike eJoronayimi leEgilathi‐Shelishiya; ngoba amanzi aseNimrimi lawo asesitsha.

35Ngizaqeda eMowabi lowo onikela umhlatshelo endaweni ephakemeyo yokukhonzela, atshisele unkulunkulu wakhe impepha, kutsho iNkosi.

36Ngakhoke inhliziyo yami ikhalela iMowabi njengomhubhe, inhliziyo yami iyakhala njengomhubhe ngabantu baseKiri‐Heresi; inotho ababeyizuzile ichithekile.

37Ngoba wonke amakhanda aphuciwe, lazo zonke indevu zigeliwe; izandla zonke zilamanxeba, bonke bavunule izambatho zokulila.

38Phezu kwazo zonke izindlu zamaMowabi kanye lasemagumeni akhona yikukhala kuphela; ngoba ngilibulele iMowabi njengembiza engananzwa muntu, kutsho iNkosi.

39Yeka ukufa kwayo! Yeka ukukhala kwayo! Yeka ukufulathela kweMowabi lilenhloni! Ngakho iMowabi liphenduke laba yinhlekisa, lento eyesabekayo kibo bonke abaseduze lalo.

40Ngoba iNkosi ithi: Ukhona ozaphapha njengokhozi,

elulele impiko zakhe eMowabi.

41Imizi izathunjwa, lezinqaba zithathwe,

kuthi inhliziyo zamaqhawe aseMowabi ngalolosuku

zibe njengenhliziyo yowesifazana ohelelwayo.

42IMowabi lizachithwa, lingabe lisaba yisizwe,

ngoba lazikhukhumeza eNkosini.

43Ukwesabe lomgodi lomjibila kuphambi kwenu,

lina elihlala eMowabi, kutsho iNkosi.

44Obalekela ukwesaba uzawela emgodini,

lophuma emgodini uzabanjwa ngumjibila.

Ngoba lezizinto ngizazehlisela eMowabi ngomnyaka wokutshaywa kwabo, kutsho iNkosi.

45Emthunzini waseHeshiboni ababalekayo bayema bephelelwe ngamandla,

ngoba umlilo uphumile eHeshiboni,

lelangabi liphumile endlini kaSihoni,

umlilo utshisile imikhawulo yaseMowabi,

lezingqonga zabantu besiphithiphithi.

46Maye kuwe, wena Mowabi!

Abantu bakaKemoshi baphelile,

ngoba amadodana akho athunjiwe,

lamadodakazi akho asiwe ekuthunjweni.

47Kodwa ngizabuyisa abantu baseMowabi ensukwini ezizayo, kutsho iNkosi.

Kuphela lapha ukwahlulelwa kweMowabi.