Hab 2 - Ndebele Bible (iBhayibhili Elingcwele) 1978

Impendulo yeNkosi

1Ngizakuma endaweni yami yokulinda,

ngime enqabeni yami, ngikhangele ukuba ngibone ukuthi iNkosi izakuthini kimi,

lokuthi izakuphendula ithini ekukhaleni kwami.

2INkosi yangiphendula yathi: Loba umbono,

uwenze ucace ematsheni, ukuze ufundwe kalula nguye ogijimayo.

3Ngoba umbono ungowesikhathi sawo;

uyaphangisa ukuya ekupheleni, kawuyikukhohlisa.

Uba uphuza, uwulindele;

ngoba uzakufika impela, kawuyikuphuza.

4Khangela, lowo ongelabuqotho uzakwehluleka,

kodwa olungileyo uzakuphila ngokukholwa kwakhe.

5Iwayini liyakhohlisa;

umuntu ozikhukhumezayo kayikuma;

ubuhwaba bakhe bubanzi njengendawo yabafileyo;

kasuthi njengokufa;

uzibuthela zonke izizwe, aziqoqele bonke abantu.

Ukuxwayiswa kwababi

6Bonke bayahlekisana ngaye yini bemklolodela besithi:

Maye kuye owandisa okungesikho okwakhe —

Koze kube nini na? —

ozethwesa ngezibambiso.

7Labo olezikwilidi zabo kabayikukujuma na?

bakuvukele labo abazakukwenza uthuthumele na?

Uzakuba yimpango yabo.

8Ngoba uziphangile izizwe ezinengi,

wachitha igazi labantu,

wenza ububi emhlabeni, emizini yonke lakubo bonke abahlala kiyo,

bonke abaseleyo emhlabeni bazakukuphanga.

9Maye kulowo ozuzela indlu yakhe inzuzo embi,

ukuba akhele isidleke sakhe phezulu ukuze avikeleke engozini!

10Indlu yakho uyenzele ihlazo ngokuchitha abantu abanengi,

ukulahlile ukuphila kwakho.

11Ngoba ilitshe lizakukhala lisemdulini,

lothungo luphendule lusephahleni.

12Maye kuye owakha umuzi ngegazi, awuqinise ngobubi!

13Kakumiswanga yiNkosi yamabandla

ukuthi umsebenzi wezizwe uphelele emlilweni,

labantu basebenzele ize na?

14Ngoba umhlaba uzagcwala ukwazi ngobukhulu beNkosi

njengamanzi agcwalisa ulwandle.

15Maye kuye onathisa omakhelwana bakhe inkezo yolaka lwakhe,

abenze ukuba badakwe, ukuze abukele ubuze babo!

16Wena uzazisuthisa ngehlazo endaweni yodumo;

natha lawe, udakwe!

Inkezo esesandleni seNkosi izafinyelela kuwe,

lehlazo lehlele phezu kodumo lwakho.

17Ububi obenziwa eLebanoni buzakwehlela kuwe,

ukuchitheka kwenyamazana kukwethuse ngenxa yegazi labantu

lobubi obenziwa emhlabeni,

emizini lakubo bonke abahlala kiyo.

18Sisizani isithombe esibaziweyo,

lokhu umenzi waso esibazile na?

Siyinto ebunjiweyo eqamba amanga.

Kusizani ukuba umenzi waso athembe kiso,

lokuba enze isithombe esingakhulumiyo na?

19Maye kulowo otshoyo esigodweni esibaziweyo ukuthi: Vuka!

lelitsheni eliyisimungulu ukuthi: Phaphama!

Lokhu kungamfundisa ulutho na?

Kunanyekwe ngegolide langesiliva,

kakulamoya wokuphefumula.

20Kodwa iNkosi isethempelini layo elingcwele;

umhlaba wonke kawuthule phambi kwayo.