Hubo 132 - Ndebele Bible (iBhayibhili Elingcwele) 1978

Isithembiso sikaDavida lesithembiso seNkosi

1Nkosi, mkhumbule uDavida

ngezinhlupheko zakhe zonke azihluphekayo,

2ukuthi wafunga eNkosini,

wenza isithembiso kuSomandla kaJakobe,

3wathi: Kangiyikungena endlini yami,

loba ngilale embhedeni wami;

4kangiyikunika amehlo ami ubuthongo,

lezinkophe zami ukuphumula,

5ngize ngiyizuzele indawo iNkosi,

indawo yokuhlala uSomandla kaJakobe.

6Khangela, sezwa ngomtshokotsho wesivumelwano eEfratha,

sawufumana elizweni laseJari.

7Asiyeni endlini yeNkosi,

sikhonze phambi kwayo.

8Vuka, Nkosi, uye endaweni yakho yokuphumula,

wena lomtshokotsho wamandla akho!

9Abapristi bakho kabambathe ukulunga,

labangcwele bakho bathabe kakhulu.

10Ngenxa yenceku yakho uDavida

ungafulatheli ogcotshiweyo wakho.

11INkosi yafunga kuDavida ngeqiniso,

kayiyikusaphula isifungo sayo;

yathi: Enye yamadodana akho ngizakuyibeka esihlalweni sakho sobukhosi.

12Uba abantwana bakho begcina isivumelwano sami

lemilayo yami engizakubafundisa yona,

labantwana babo bazakuhlala esihlalweni sakho sobukhosi kuze kube nininini.

13Ngoba iNkosi ilikhethile iZiyone,

yalithanda ukuba libe yindawo yayo yokuhlala.

14Yathi: Le yindawo yami yokuhlala kuze kube nininini;

ngizakuhlala khona, ngoba ngiyikhethile.

15Ngizakwandisa ukudla kwalo,

ngisuthise abayanga balo.

16Abapristi balo ngizakubembesa ngokukhulula,

labangcwele balo bazakuthaba kakhulu.

17Lapho ngizakuvusa usendo lukaDavida;

ngilungisele ogcotshiweyo wami isibane.

18Izitha zakhe ngizakuzithela ihlazo,

kodwa umqhele wakhe wobukhosi uzakukhazimula ekhanda lakhe.