Jobe 26 - Ndebele Bible (iBhayibhili Elingcwele) 1978

Impendulo kaJobe: ukhuluma ngobukhulu bukaNkulunkulu

1UJobe wasephendula esithi:

2Umsize kanjani ongelamandla na?

Umkhulule njani ophelelwe ngamandla na?

3Umluleke njani ongelakuhlakanipha?

Utshumayele njani izinto ezinengi ezihlakaniphileyo na?

4Ngubani okusize ukukutshela lezizinto?

Ngumoya kabani ophuma kuwe na?

5Izithunzi ziyathuthumela,

amanzi kanye labahlala kuwo.

6Indawo yabafileyo isikhamisile phambi kukaNkulunkulu,

lendawo yokubhubha kayilasisibekelo.

7Welulela inyakatho phezu kwendawo engelalutho,

aphanyeke umhlaba phezu kweze.

8Uyabophela amanzi emayezini akhe,

lamayezi kawadabuki ngaphansi kwawo.

9Uyasibekela inyanga,

endlale iyezi lakhe phezu kwayo.

10Umisile umkhawulo phezu kwamanzi,

ekucineni kokukhanya lomnyama.

11Insika zezulu ziyathuthumela,

zethuswa yikukhuza kwakhe.

12Ngamandla akhe wathulisa ulwandle,

langokuqonda kwakhe wachitha uRahabi.

13Ngomoya wakhe iphezulu liyacethula,

lesandla sakhe siyagwaza inyoka ebalekayo.

14Khangela, lokhu kungamaphethelo nje ezindlela zakhe;

kuyilizwi lokunyenyeza nje elizwakalayo ngaye.

Ngubani ongaqedisisa ukuduma kwamandla akhe na?