Hlu 18 - Ndebele Bible (iBhayibhili Elingcwele) 1978

UMika labakoDani

1Ngalezonsuku kwakungelankosi koIsrayeli; isizwe sakoDani sazifunela indawo yokuhlala, ngoba kuze kube ngalesosikhathi babengelandawo phakathi kwezizwe zakoIsrayeli.

2Ngakho abakoDani basebethuma amadoda amahlanu angamaqhawe phakathi kwaso sonke isizwe sabo, beseZora leEshitawoli, ukuhlola ilizwe. Afika entabeni zakoEfrayimi, emzini kaMika, angenisa khona.

3Kwathi esemzini kaMika alazi ilizwi lensizwa engumLevi; asesondela kuyo athi: Ngubani owakuletha lapha na? Wenzani kulindawo na? Ufunani lapha?

4Yona yathi kibo: Ngumsebenzi kaMika lo; ungiqatshile, sengingumpristi wakhe.

5Asesithi kuyo: Ake ubuze uNkulunkulu ukuze sazi ukuba uhambo lwethu luzaphumelela yini.

6Umpristi wathi kibo: Hambani kuhle. Uhambo lwenu lusesandleni seNkosi.

7Asehamba lawomadoda amahlanu, ayafika eLayishi, abona ukuthi abantu bakhona behlezi kuhle njengamaSidoni, belokuthula, bengethuki lutho, bengasweli lutho, benothile lokuthi babekhatshana lamaSidoni, bengasebenzelani lamaAramu.

8Esebuyele eZora leEshitawoli abakibo bathi kuwo: Lingabikani?

9Athi: Wozani siyebahlasela, ngoba sibonile ilizwe elivundileyo kakhulu. Kaliyikwenza lutho na? Lingaphuzi ukusuka liyelithatha ilizwe.

10Ekufikeni kwenu khona lizafumanisa abantu abangethuki lutho; ilizwe likhulu, uNkulunkulu ulinikele ezandleni zenu; yindawo lapho kungasweleki lutho khona.

11Amadoda esizwe sakoDani angamakhulu ayisithupha ehlomile izikhali zempi aphuma eZora leEshitawoli,

12ayamisa eKiriyathi‐Jeyarimi koJuda. Ngenxa yalokho leyondawo ibizwa ngokuthi yiMahane‐Dani kuze kube lamuhla, ingasentshonalanga kweKiriyathi‐Jeyarimi.

13Adlula lapho, aya entabeni zakoEfrayimi, afika emzini kaMika.

14Amadoda amahlanu ayehambile ukuhlola ilizwe laseLayishi athi kubafowabo: Liyazi nje ukuthi kulezizindlu kukhona ingubo yamahlombe lezithombe ezathiwa ngamaterafi lesithombe sesiliva na? Ake licabange ukuba lizakwenzani.

15Basebephambuka, baya endlini yomLevi emzini kaMika, bambuza ukuphila.

16Amadoda akoDani angamakhulu ayisithupha ayehlomile ema esangweni.

17Lawomadoda amahlanu ayehambile ukuhlola ilizwe angena, athatha isithombe sesiliva, lezithombe ezithiwa ngamaterafi, lezinye izithombe, umpristi esemi esangweni lamadoda angamakhulu ayisithupha ahlomileyo izikhali zempi.

18Labo abahlanu sebengenile endlini kaMika bathatha isithombe sesiliva, lezithombe ezithiwa ngamaterafi, lezinye izithombe, umpristi wathi kibo: Lenzani na?

19Bona bathi kuye: Thula! Vala umlomo wakho, usilandele, ube ngubaba kithi lompristi wethu. Kungcono yini kuwe ukuba ube ngumpristi emzini womuntu oyedwa kulokuba ube ngumpristi wesizwe lowosendo lwakoIsrayeli na?

20Kwamthokozisa lokhu umpristi; wasethatha ingubo yamahlombe lezithombe ezithiwa ngamaterafi lesithombe sesiliva, wangena phakathi kwabo.

21Basebesuka behamba, babeka abantwana lenkomo lempahla ngaphambi kwabo.

22Sebekhatshana lomuzi kaMika, abantu ababesemizini eseduze lokaMika babizwa ukuba baphume, babalandele babafica abakoDani.

23Babamemeza abakoDani abaphenduka bathi kuMika: Uhlutshwa yini ukuze usilandele lexuku elingaka na?

24Yena wathi: Lithethe onkulunkulu bami engabenzayo, lompristi, lahamba labo; ngisaselelani na? Lingibuzelani lisithi: Uhlutshwa yini na?

25AbakoDani bathi kuye: Ungasibangeli umsindo, ngoba kukhona amadoda alolaka phakathi kwethu, angakusukela, akubulale wena labendlu yakho.

26Basebezihambela abakoDani. Lapho uMika esebonile ukuthi balamandla kulaye, waphenduka wabuyela emzini wakhe.

27AbakoDani bathatha lokho uMika ayekwenzile lompristi wakhe, baya eLayishi ebantwini ababehlala ngokuthula bengethuki lutho, babachitha, batshisa umuzi ngomlilo.

28Kwakungekho owayengabalamulela, ngoba umuzi wabo wawukhatshana leSidoni, bengasebenzelani lamaAramu. Wawusesihotsheni saseBeti‐Rehobi. AbakoDani bawuvusa umuzi, bahlala kiwo.

29Basebewutha ibizo lokuthi yiDani ngebizo likakhokho wabo uDani owazalwa koIsrayeli. Kodwa lona ibizo lalowomuzi kuqala laliyiLayishi.

30AbakoDani bazimisela isithombe. UJonathani indodana kaGereshoma, kaMose, lamadodana akhe baba ngabapristi esizweni sakoDani kwaze kwaba lusuku lokuthunjwa kwelizwe.

31Basebemisa isithombe uMika ayesenzile, sahlala sonke isikhathi indlu kaNkulunkulu iseShilo.