1 Kho 4 - Ndebele Bible (iBhayibhili Elingcwele) 1978

Izikhulu zikaSolomoni

1Inkosi uSolomoni yabusa uIsrayeli wonke.

2Nanzi izikhulu zayo.

UAzariya indodana kaZadoki wayengumpristi;

3uElihorefi loAhija amadodana kaShisha ayengomabhalane;

uJehoshafati indodana kaAhiludi engumbhali;

4uBenaya indodana kaJehoyada wayeyinduna yempi —

uZadoki loAbiyatha babengabapristi —

5uAzariya indodana kaNathani wayeyinduna yababusi;

uZabudi indodana kaNathani wayengumngane wenkosi:

6uAhishari wayengumgcini wesigodlo;

loAdoniramu indodana kaAbida wayephethe izibhalwa.

7USolomoni wayelezinduna ezilitshumi lambili eziphethe wonke uIsrayeli, ezazidingela inkosi lendlu yayo ukudla, ileyo laleyo idinga ukudla kwenyanga eyodwa ngomnyaka.

8Nanka amabizo azo.

UBeni‐Huri wayeselizweni lezintaba zakoEfrayimi;

9uBeni‐Dekeri wayephethe iMakazi leShalibimi leBeti‐Shemeshi leEloni‐Betihanani;

10uBeni‐Hesedi wayeseArubothi, ephethe leSoko lalo lonke ilizwe laseHeferi;

11uBeni‐Abinadaba owayethethe indodakazi kaSolomoni uTafathi, wayephethe lonke ilizwe laseDori;

12uBahana indodana kaAhiludi wayephethe iTanaki leMegido leBeti‐Sheyani lonke aze afike eAbeli‐Mehola maqondana leZarethani, kusukela eBeti‐Sheyani ngaphansi kweJezereli aze afike eJokimeyama;

13uBeni‐Geheri wayephethe iRamothi‐Gileyadi kanye lemizi kaJayiri indodana kaManase eGileyadi, laselizweni eArigobi eliseBashani, imizi engamatshumi ayisithupha ebiyelweyo elemigoqo yethusi;

14uAhinadaba indodana kaIdo wayephethe iMahanayimi;

15uAhimazi wayephethe elakoNafitali, laye wayethethe indodakazi kaSolomoni uBasemathi;

16uBahana indodana kaHushayi wayephethe elakoAsheri leAlothi;

17uJehoshafati indodana kaParuwa wayephethe elakoIsakari;

18uShimeyi indodana kaEla wayephethe elakoBenjamini;

19uGeberi indodana kaUri wayephethe iGileyadi lelizwe likaSihoni inkosi yamaAmori, lelikaOgi inkosi yaseBashani.

Kwakukhona induna eyodwa phezu kwalaba elizweni lakoJuda.

Ukuhlakanipha lokuphumelela kukaSolomoni

20AbakoJuda labakoIsrayeli babebanengi njengetshebetshebe elingasolwandle, babesidla benatha bethokoza.

21USolomoni wabusa yonke imibuso kusukela emfuleni iYufrathi kuze kufike elizweni lamaFilistiya lasemingceleni yaseGibithe, yathela kuye, yamsebenzela zonke insuku zokuphila kwakhe.

22Ukudla kukaSolomoni ngosuku kwakungamasaka angamatshumi amahlanu empuphu ecolekileyo, lamasaka alikhulu empuphu,

23lenkabi ezilitshumi ezinonisiweyo, lamatshumi amabili enkomo ezivela emadlelweni, lezimvu ezilikhulu, ngaphandle kwempala lemiziki lempunzi lengalukhuni.

24Ngoba wayebusa lonke ilizwe elingasentshonalanga komfula iYufrathi kusukela eTifisa kusiya eGaza, lawo wonke amakhosi angasentshonalanga komfula iYufrathi, kukhona ukuthula kuzo zonke indawo.

25AbakoJuda labakoIsrayeli babevikelekile kusukela koDani kuze kufike eBerisheba, bonke babezihlalela ngaphansi kwezihlahla zabo zevini langaphansi kwezomkhiwa kuzo zonke insuku zokubusa kukaSolomoni.

26USolomoni wayelezibaya zamabhiza enqola zakhe zokulwa ezizinkulungwane ezingamatshumi amane, lamabhiza okulwa ayezinkulungwane ezilitshumi lambili.1 Kho 10:26; 2 Lan 1:14; 9:25

27Lezozinduna zadingela inkosi uSolomoni ukudla labo bonke ababesidla laye, ileyo laleyo ngenyanga yayo, kakuswelekanga lutho.

28Zaletha amabele kanye lotshani bamabhiza lobamabhiza alejubane endaweni lapho kufuneka khona, kwaba yileyo laleyo njengokumiselwa kwayo.

29UNkulunkulu wamnika uSolomoni ukuhlakanipha lokuqedisisa okukhulu, lengqondo ebanzi kakhulu,

30kwaze kwathi ukuhlakanipha kwakhe kwadlula ukuhlakanipha kwabo bonke abantu basempumalanga lokuhlakanipha konke kwaseGibithe.

31Ngoba wayehlakaniphile kulabo bonke abantu, wayehlakaniphile ukwedlula uEthani waseEzira loHemani loKalikoli loDarida amadodana kaMaholi; lodumo lwakhe lwagcwala ezizweni zonke ezazizingelezele.

32Waqamba izaga ezizinkulungwane ezintathu, lengoma zakhe zaziyinkulungwane lanhlanu.Zaga 1:1; 10:1; 25:1; Ngoma 1:1

33Wakhuluma ngezihlahla kusukela emikuswini yaseLebanoni kwaze kwafika kuzintelezi ezimila emidulini; wakhuluma ngenyamazana langezinyoni langezinanakazana langenhlanzi.

34Kwakufika abantu bevela ezizweni zonke ukuzwa ukuhlakanipha kukaSolomoni, bevela emakhosini wonke omhlaba ayezwe ngokuhlakanipha kwakhe.