Levi 27 - Ndebele Bible (iBhayibhili Elingcwele) 1978

Imilayo yezithembiso ezithile

1INkosi yathi kuMose:

2Tshono ebantwini bakoIsrayeli uthi: Nxa umuntu ethembisa isithembiso esithile eNkosini sokunika okulingana lomuntu,

3akwenze lokhu. Owesilisa oleminyaka engamatshumi amabili kusiya eminyakeni engamatshumi ayisithupha, uzakulingana lamashekeli esiliva angamatshumi amahlanu ngokweshekeli lendlu engcwele;

4owesifazana uzakulingana lamashekeli angamatshumi amathathu.

5Owesilisa oleminyaka emihlanu kusiya eminyakeni engamatshumi amabili, uzakulingana lamashekeli angamatshumi amabili; owesifazana uzalingana lamashekeli alitshumi.

6Umntwana olenyanga eyodwa kusiya eminyakeni emihlanu, uba engumfana, uzakulingana lamashekeli amahlanu; uba eyinkazana, uzalingana lamashekeli amathathu.

7Umuntu oleminyaka engamatshumi ayisithupha lengaphezulu, uba engowesilisa, uzalingana lamashekeli alitshumi lanhlanu; uba engowesifazana, uzalingana lamashekeli alitshumi.

8Uba umuntu othembisileyo engumyanga, esehluleka ukunika ngokunjalo, uzakuletha lowomuntu kumpristi; umpristi uzakumlinganisa njengokwamandla akhe owathembisayo.

9Uba kuyinyamazana okunganikelwa ngayo eNkosini, konke okunje okunikelwa ngakho eNkosini kungcwele.

10Umuntu angathathi okunye endaweni yayo, futhi angenaniseli ngayo, loba enhle ngembi loba embi ngenhle. Uba usenaniselana lomunye inyamazana ngenyamazana, zombili zizakuba ngcwele.

11Uba kuyinyamazana engcolileyo okungavunyelwa ukunikelwa ngayo eNkosini, umuntu uzakuyiletha kumpristi,

12umpristi ayilinganise, atsho ukuthi yinhle loba yimbi; izakuba yilokho okuzatshiwo ngumpristi.

13Kodwa uba efisa ukuyihlenga, uzakwengezelela okwesihlanu kwayo phezu kwalokho kokulinganisa kwakhe.

14Nxa umuntu esahlukanisela iNkosi indlu yakhe, umpristi uzakuyilinganisa, atsho ukuthi yinhle loba yimbi; izakuba njengokutsho kompristi.

15Uba lowo oyehlukanisela iNkosi efisa ukuyihlenga, uzakwengezelela phezu kwemali yokulinganiswa kwayo okwesihlanu, indlu ibe ngeyakhe.

16Uba umuntu esahlukanisela iNkosi ingxenye yensimu eyilifa lakhe, okulinganiswa kwayo kuzalingana lenhlanyelo engahlanyelwa lapho. Ihomeri lebhali lizakulingana lamashekeli esiliva engamatshumi amahlanu.

17Uba esahlukanisela iNkosi insimu yakhe ngomnyaka weJubili, lokho okulingana layo kuzakuma.

18Kodwa uba esahlukanisela iNkosi insimu yakhe emva kweJubili, umpristi uzakubala imali yeminyaka eseleyo kuze kufike umnyaka weJubili, kuncitshiswe ngemali leyo.

19Uba lowo owehlukanisela iNkosi insimu efisa ukuyihlenga, uzakwengezelela phezu kwemali yokulinganiswa kwayo okwesihlanu, ibe ngeyakhe.

20Kodwa uba engafisi ukuyihlenga insimu, loba eseyithengisele omunye umuntu, kayisayikuhlengwa futhi;

21lapho iyekelwa ngomnyaka weJubili izakuba ngcwele eNkosini, ibe njengensimu eyahlukaniswayo, ibe ngeyompristi.

22Uba esahlukanisela iNkosi insimu ayithengileyo, engesiyo insimu eyilifa lakhe,

23umpristi uzakubala imali yeminyaka eseleyo kuze kufike umnyaka weJubili, lomuntu akhuphe leyomali ngalolosuku, ibe yinto engcwele eNkosini.

24Ngomnyaka weJubili insimu izabuyiselwa kulowo eyathengwa kuye, ngoba insimu iyilifa lakhe.

25Konke ukulinganisa kuzakuba ngokweshekeli lendlu engcwele; amagera angamatshumi amabili azakulingana leshekeli.

26Izibulo lenyamazana, ngoba izibulo ngeleNkosi, kalisoze lehlukaniselwa iNkosi ngumuntu; loba lingelenkomo loba lingelemvu, lingeleNkosi.

27Uba liyinyamazana engcolileyo, umuntu angalihlenga ngokunika okulingana lalo, kodwa engezelele kulo okwesihlanu; uba lingahlengwa, lizakuthengiswa ngokulinganiswa kwalo.

28Kodwa lokho umuntu akwehlukanisele iNkosi, kakuyikuthengiswa, futhi kakuyikuhlengwa; ngitsho konke alakho, loba kungumuntu, loba inyamazana, loba insimu eyilifa lakhe; konke okwehlukaniselwe iNkosi kungcwele kakhulu eNkosini.Nani 18:14

29Umuntu oqalekisiweyo angeke ahlengwe; uzakubulawa.

Mayelana lokwetshumi

30Okwetshumi konke kwelizwe, loba okwenhlanyelo yelizwe loba okwezithelo zezihlahla, kungokweNkosi; kungcwele eNkosini.Nani 18:21; Dute 14:22–29

31Uba umuntu efisa ukuhlenga okuthile okokwetshumi kwakhe, uzakwengezelela kukho okwesihlanu kwakho.

32Lakho konke okwetshumi kwezinkomo lezimvu, okwetshumi kwazo zonke ezidlula ngaphansi kwentonga yomalusi, kuzakuba ngcwele eNkosini.

33Umuntu angayihloli ukuba abone ukuthi yinhle loba yimbi, futhi angenaniselani ngayo. Uba esenaniselana ngayo, yona lalokho enaniselana ngakho kuzakuba ngcwele, kakuyikuhlengwa.

34Leyo yimilayo iNkosi eyamnika yona uMose entabeni yaseSinayi ukuba ayinike abantu bakoIsrayeli.