Hez 30 - Ndebele Bible (iBhayibhili Elingcwele) 1978

Ukuchitheka kweGibithe

1Ilizwi leNkosi lafika kimi lathi:

2Ndoda, tshumayela uthi: INkosi uNkulunkulu ithi:

Maye ngalolosuku!

3Usuku selusondele,

usuku lweNkosi selusondele,

luzakuba lusuku olulamayezi,

isikhathi sokuchitheka kwezizwe.

4Impi izakwehlela eGibithe,

losizi lube khona eEtiyopiya,

lapho abanengi bebulawa eGibithe,

lenotho yalo ithunjwa,

lezisekelo zalo zidilizelwa phansi.

5IEtiyopiya lePuti leLudi lalo lonke iArabiya leLibiya labantu belizwe abahlangene labo bazabulawa kanye labo.

6INkosi ithi:

Labo abasekela iGibithe bazakufa,

lamandla alo aziphakamisileyo ehliselwe phansi;

kusukela eMigidoli ngasenyakatho kuze kube seSiyene ngaseningizimu

bazabulawa empini,

kutsho iNkosi uNkulunkulu.

7Ilizwe lizachitheka ukwedlula amazwe wonke achithekileyo,

lemizi yalo ibe phakathi kwemizi echithekileyo.

8Ng’khona bazakwazi ukuba ngiyiNkosi,

lapho sengithungele iGibithe ngomlilo

labo bonke abasizi balo sebechithiwe.

9Ngalolosuku izithunywa ezilesiqubu zizasuka kimi ukwesabisa amaEtiyopiya angethuswanga lutho, ehlelwe lusizi ngalolosuku lokuchitheka kwamaGibithe, ngoba usuku luyeza.

10INkosi uNkulunkulu ithi:

Ngizaqeda inotho yaseGibithe

ngesandla sikaNebukadineza inkosi yaseBabiloni.

11Yena labantu bakhe, abesabeka ukwedlula izizwe zonke,

bazakuza ukulichitha ilizwe;

bazalihlasela iGibithe ngemikhonto yabo,

bagcwalise ilizwe ngezidumbu.

12Ngizakwenza umfula iNile utshe,

ngithengise ilizwe ebantwini ababi,

ngilichithe ilizwe lakho konke okukilo ngezandla zabezizwe;

mina Nkosi ngikhulumile.

13INkosi uNkulunkulu ithi:

Ngizakuchitha izithombe,

ngiqede onkulunkulu bamanga eMemfisi;

kungabe kusaba khona isikhulu elizweni laseGibithe,

ngilethe ukwesaba eGibithe.

14Ngizachitha iPatrosi,

ngithungele iZowani ngomlilo,

ngijezise iThebesi.

15Ngizakwehlisela ulaka lwami phezu kweSini,

eliyinqaba yaseGibithe,

ngiqede ixuku laseThebesi.

16Ngizathungela iGibithe ngomlilo,

leSini ibe lobuhlungu obukhulu.

Imiduli yeNo izakufohlelwa,

lezimpophoma zamanzi zitheleke phakathi kwalo.

17Amajaha aseOni lawasePibesethi azabulawa yimpi,

labesifazana bathunjwe.

18ETahafanesi ukukhanya kuzakuba mnyama,

lapho ngiqeda khona ukubusa kweGibithe,

lamandla aziphakamisileyo azaphela,

lamayezi afike phezu kwalo,

kuthunjwe lamadodakazi alo.

19Ngokunjalo ngizalithonisisa iGibithe.

Ng’khonake bazakwazi ukuba ngiyiNkosi.

20Ngomnyaka wetshumi lanye, ngosuku lwesikhombisa enyangeni yokuqala, ilizwi leNkosi lafika kimi lathi:

21Ndoda, ngiyephule ingalo kaFaro inkosi yaseGibithe, kayibotshwanga, ukuba ipholiswe yikufakwa uhlaka, ukuze iqinele ukuphatha umkhonto.

22Ngakhoke iNkosi uNkulunkulu ithi: Ngimelene loFaro inkosi yaseGibithe, ngizakwephula ingalo zakhe, ingalo eqinileyo lengalo eyaphukileyo, ngenze umkhonto uphunyuke esandleni sakhe.

23Ngizachithachitha amaGibithe phakathi kwezizwe, ngiwahlakazele emazweni wonke.

24Ngizaqinisa ingalo zenkosi yaseBabiloni, ngibeke umkhonto wami esandleni sayo; kodwa ngizakwaphula ingalo zikaFaro, abubule phambi kwayo njengomuntu olimele kubi.

25Ngizaqinisa ingalo zenkosi yaseBabiloni, kodwa ingalo zikaFaro zizakuwa; bazakwazi ukuba ngiyiNkosi. Nxa sengifakile umkhonto wami esandleni senkosi yaseBabiloni, izakuwuphakamisela elizweni laseGibithe;

26ngizachithachitha amaGibithe phakathi kwezizwe, ngiwahlakazele emazweni wonke. Ng’khona bazakwazi ukuba ngiyiNkosi.