2 Sam 21 - Ndebele Bible (iBhayibhili Elingcwele) 1978

AbaseGibeyoni bayaphindisela

1Kwaba khona indlala ensukwini zikaDavida iminyaka emithathu ngokulandelana; uDavida wabuza iNkosi uNkulunkulu. Yathi: USawuli ulecala legazi kanye lendlu yakhe, ngoba wabulala abaseGibeyoni.

2Ngakho inkosi yasibiza abaseGibeyoni. AbaseGibeyoni babengesibo abantu bakoIsrayeli, kodwa babengabasalayo bamaAmori; lanxa abakoIsrayeli babefungile ukubayekela, uSawuli wafuna ukubabulala ekutshisekeleni kwakhe abakoIsrayeli labakoJuda.Josh 9:3–15

3UDavida wathi kwabaseGibeyoni: Ngingalenzelani na? Ngingakwenza kanjani ukubuyisana ukuba libusise abantu beNkosi uNkulunkulu na?

4AbaseGibeyoni bathi kuye: Indaba yethu loSawuli lendlu yakhe ingehlawulwe ngesiliva langegolide; futhi kasidingi ukubulala umuntu koIsrayeli. Wasesithi: Pho, lithi ngilenzeleni na?

5Basebesithi enkosini: Umuntu owasibulalayo, wayeqonde ukusibhubhisa, ukuze singabi landawo elizweni lonke lakoIsrayeli,

6asinikwe amadodana akhe ayisikhombisa ukuze siwaphanyeke phambi kweNkosi uNkulunkulu eGibeyoni entabeni yayo. Inkosi yathi: Ngizalinika bona.

7Kodwa yamtshiya uMefiboshethi indodana kaJonathani kaSawuli ngenxa yesifungo uDavida loJonathani indodana kaSawuli ababesenzile ebizweni leNkosi uNkulunkulu.1 Sam 20:15–17; 2 Sam 9:1–7

8Yathatha amadodana amabili kaRizipa indodakazi kaAya ayewazele kuSawuli, uArimoni loMefiboshethi, lamadodana amahlanu kaMerabi indodakazi kaSawuli ayewazele kuAdriyeli indodana kaBarizilayi waseMehola,1 Sam 18:19

9yabanikela ezandleni zabaseGibeyoni, babaphanyeka entabeni phambi kweNkosi uNkulunkulu, bafa labo abayisikhombisa bonke. Babulawa ensukwini zokuqala zokuvuna, ekuqaleni kokuvunwa kwebhali.

10URizipa indodakazi kaAya wathatha isaka, wazendlalela lona phezu kwedwala, kusukela ekuqaleni kokuvuna baze banethwa lizulu; kavumelanga inyoni zaphezulu ukuba zihlale phezu kwabo emini, lezilo zeganga ebusuku.

11Lapho uDavida ebikelwa lokho okwenziwe nguRizipa indodakazi kaAya, omunye umfazi kaSawuli,

12uDavida wasuka wayathatha amathambo kaSawuli lakaJonathani ebantwini baseJabeshi‐Gileyadi ababewebile emdangeni waseBeti‐Shani, lapho amaFilistiya ayebaphanyeke khona mhla ebulala uSawuli eGilibowa.1 Sam 31:8–13

13Wathatha lapho amathambo kaSawuli lawendodana yakhe uJonathani; waqoqa lamathambo alabo ababephanyekiwe.

14Bawangcwaba amathambo kaSawuli lakaJonathani indodana yakhe elizweni lakoBenjamini eZela, engcwabeni likaKishi uyise. Bakwenza konke inkosi eyayibalaye khona. Emva kwalokho uNkulunkulu wayizwa imikhuleko eyenzelwa ilizwe.

Abantu bakaDavida babulala iziqhwaga

15AmaFilistiya abuye alwa impi futhi loIsrayeli; uDavida wahamba kanye lenceku zakhe, bayakulwa lamaFilistiya; ekulweni kwabo uDavida wadinwa.

16UBenobi owayengomunye wabantwana beziqhwaga, omkhonto wakhe wawulobunzima obungamashekeli angamakhulu amathathu ethusi, wayehlome ngomhedla omutsha, wayesezambulala uDavida.

17Kodwa uAbishayi indodana kaZeruya wamlamulela, wamtshaya umFilistiya wambulala. Abantu bakaDavida basebefunga kuye besithi: Kawusayikuphuma impi lathi, funa ucime isibane sikaIsrayeli.

18Emva kwalokhu kwaba khona impi futhi lamaFilistiya eGobi; uSibekayi waseHusha wabulala uSafi, omunye wabantwana beziqhwaga.

19Kwaba khona futhi impi lamaFilistiya eGobi; uElihanani indodana kaJayiri waseBetlehema, wabulala uGoliyathi waseGiti, oluthi lomkhonto wakhe lwalungangogodo lomaluki.

20Kwabuye kwaba khona impi eGathi, lapho kwakukhona umuntu omude, owayeleminwe eyisithupha esandleni, lamazwane ayisithupha onyaweni, kungamatshumi amabili lane kukonke; laye wayengomunye wabantwana beziqhwaga.

21Lapho eseyisa uIsrayeli, uJonathani indodana kaShimeya, umfowabo kaDavida, wambulala.

22Labo bobane babezalwa yiziqhwaga eGathi; bonke babulawa nguDavida layizinceku zakhe.