Hubo 65 - Ndebele Bible (iBhayibhili Elingcwele) 1978

Ukubonga izipho zikaNkulunkulu

1Sifanele ukukudumisa, wena Nkulunkulu, eZiyone,

lezifungo zenziwe kuwe.

2Wena ozwayo imikhuleko bazakuza kuwe abantu bonke,

3ngenxa yezono.

Lapho iziphambeko zethu zisahlula,

uyasithethelela.

4Ubusisiwe omkhethayo wena, omsondezayo

ukuba ahlale emagumeni akho.

Sizakusutha ngokuhle kwendlu yakho,

ithempeli lakho elingcwele.

5Ngezenzo ezesabekayo uyasiphendula,

usikhulule, Nkulunkulu ongumsizi wethu,

wena olithemba labantu bomhlaba wonke,

lelabantu abahlala ngaphetsheya kolwandle olukhatshana,

6wena omisa izintaba ngamandla akho,

owambethe amandla;

7uthulisa ukuduma kwezinlwandle,

lenhlokomo yamavinqo azo;

lokuxokozela kwabantu,

8ukuze abakhileyo emikhawulweni yomhlaba

besabe izibonakaliso zakho;

wenza abahlala empumalanga lasentshonalanga bathokoze kakhulu.

9Uyahambela umhlaba uwunethise ngezulu,

uwuvundise kakhulu;

imifula kaNkulunkulu igcwele amanzi;

uyabalungisela abantu ukudla.

Uwulungisa ngokunjalo umhlaba,

10uyathelela imisele yawo, ulalise imigelo yawo,

uyithambise ngezihlambo, ubusise ukumila kwawo.

11Uyaphelelisa umnyaka ngokuphana kwakho;

izindlela zakho zigcwele okunengi.

12Amadlelo eganga agcwele,

lezintaba zambethe ukuthokoza.

13Amadlelo agcwele izimvu,

lezigodi zisitshekelwe ngamabele;

konke kuyajabula kakhulu, kuhlabele.