Hubo 139 - Ndebele Bible (iBhayibhili Elingcwele) 1978

INkosi iyazi konke, ikhona ezindaweni zonke

1Nkosi, ungihlolile, uyangazi.

2Uyakwazi ukuhlala kwami lokusuka kwami;

uyayazi imicabango yami ukhatshana.

3Uyahlola ukuhamba kwami lokulala kwami,

uyazazi indlela zami zonke.

4Ngingakakhulumi ilizwi ngomlomo wami, Nkosi,

usulazi wena.

5Ungizingelezile emuva langaphambili,

ngesandla sakho uyangivikela.

6Ukwazi okunje kuyangimangalisa;

kuphakeme, ngingeke ngifinyelele kukho.

7Ngizakuya ngaphi ngisuke emoyeni wakho na?

Ngizabalekela ngaphi ngisuke ebusweni bakho na?

8Uba ngisenyukela ezulwini, wena ukhona lapho;

uba ngisendlala icansi lami endaweni yabafileyo, wena ulapho.

9Uba ngiphaphela empumalanga,

loba ngiyehlala entshonalanga,

10lalapho isandla sakho sizakungihola,

lesokunene sakho singibambe.

11Uba ngisithi: Umnyama kawungifihle,

lokukhanya kube yibusuku kimi;

12umnyama kawumnyama kuwe,

ubusuku bukhanya njengemini;

ngoba umnyama uyafana lokukhanya kuwe.

13Ngoba wena wayenza imibilini yami,

wangibumba ngisesiswini sikamama,

14Ngiyakubonga, ngoba wena uyesabeka;

imisebenzi yakho iyamangalisa.

Wena uyangazi kuhle;

15amathambo ami ayengafihlekanga kuwe,

lapho ngangisenziwa ekusithekeni,

ngibunjwa ezindaweni ezizikileyo zomhlaba.

16Amehlo akho angibona ngingakabunjwa;

zonke inzuku zami zalotshwa ogwalweni lwakho;

zalotshelwa mina zingakenziwa,

zingakabi khona lokuba khona.

17Imicabango yakho, Nkulunkulu, inzima kimi;

bukhulu kangaka ubunengi bayo!

18Uba ngingayibala, minengi kuletshebetshebe.

Lapho ngivukayo, ngilokhu ngilawe.

19Kungathi ungababulala ababi, Nkulunkulu!

Kungathi abantu begazi bangasuka kimi;

20abantu abakuhlambazayo,

bekuvukela wena!

21Kangibazondi yini abakuzondayo wena, Nkosi, na?

Kanginengwa yibo yini abakuvukelayo wena na?

22Ngiyabazonda ngenzondo epheleleyo;

ngithi bayizitha zami.

23Ngihlola, Nkulunkulu, uyazi inhliziyo yami;

ngilinga, uyazi imicabango yami,

24ubone ukuba ikhona indlela embi kimi yini,

ungihole endleleni engapheliyo.