Jobe 18 - Ndebele Bible (iBhayibhili Elingcwele) 1978

Inkulumo yesibili kaBilidadi: uthi ababi bazachithwa

1Wasephendula uBilidadi waseShuhi esithi:

2Koze kube nini ukhuluma na?

Ake ucabange, andubana sikhulume.

3Kungani usikhangela njengenkomo na?

Kungani usikhangela njengezithutha na?

4Wena ozidabula ngokuthukuthela,

umhlaba uzatshiywa ngenxa yakho,

loba amadwala asuswe endaweni yawo na?

5Yebo, ukukhanya komubi kuyacima,

lelangabi lomlilo wakhe kalikhanyi.

6Ukukhanya kufiphele ethenteni lakhe,

lesibane sakhe ngaphezu kwakhe siyacima.

7Izinyathelo zakhe ezilamandla ziyafinyezwa,

lamacebo akhe ayamwisela phansi.

8Ezakhe inyawo zimfaka embuleni,

ahambe phezu komjibila.

9Umjibila umbamba isithende,

abanjwe yizihitshela.

10Uthiywe ngegoda emhlabathini,

langomjibila endleleni.

11Ukwesaba kuyamethusa inxa zonke,

kuxotshane laye enyaweni zakhe.

12Ukuchitheka kumlambele,

lokuhlupheka kulindele ukukhubeka kwakhe.

13Isikhumba sakhe sidliwa ngumkhuhlane,

ukufa okwesabekayo kudla izitho zakhe.

14Uyahluthunwa ethenteni athembe kilo,

asiwe enkosini yokuFa.

15Ethenteni lakhe kuyahlala okungesikho okwakhe,

kuvuvuzelwe isolufa emzini wakhe.

16Impande zakhe ziyoma ngaphansi,

kubune ingatsha ngaphezulu.

17Ukukhunjulwa kwakhe kuyaphela emhlabeni,

angabi labizo elizweni.

18Ukhutshwa ekukhanyeni axotshelwe emnyameni,

axotshwe emhlabeni.

19Kalabantwana labazukulu ebantwini bakibo,

kakusali loyedwa owakhe lapho abehlala khona.

20Abentshonalanga bayethuswa lusuku lwakhe lokuchitheka,

labempumalanga behlelwe yikwesaba.

21Impela zinjalo izindlu zabangamesabiyo uNkulunkulu,

injalo indawo yongamaziyo yena.