Hez 15 - Ndebele Bible (iBhayibhili Elingcwele) 1978

IJerusalema linjengevini elingelazithelo

1Ilizwi leNkosi lafika kimi lathi:

2Ndoda, isihlahla sevini sedlula ngani ezinye,

singcono kulogatsha lwesinye isihlahla eguswini na?

3Kuyazuzakala isigodo kiso esifanele ukwenza ulutho olusizayo na?

Abantu bangenza isikhonkwane ngaso,

balengise izinto kiso na?

4Uba sibaswa emlilweni, lezihloko zaso zitshiswe ngumlilo,

kuhaqazeke umzaca waso,

singenza ulutho olusizayo na?

5Sisaphelele sasingasetshenziswa lutho;

pho, lapho umlilo ususitshisile sesihaqazekile,

singabe sisasetshenziswa na?

6Ngakho iNkosi uNkulunkulu ithi:

Njengenkuni zevini ezihlahleni zegusu

engizenze zaba zinkuni zomlilo,

ngokunjaloke ngizaphatha abakhileyo eJerusalema.

7Ngizamelana labo;

lanxa bephunyuka emlilweni, umlilo uzabaqeda;

lizakwazi ukuba ngiyiNkosi, nxa sengimelana labo.

8Ngizalenza ilizwe libe yinkangala,

ngoba bangidelile;

kutsho iNkosi uNkulunkulu.