Eks 10 - Ndebele Bible (iBhayibhili Elingcwele) 1978

Inhlupheko yesificaminwembili: Isikhongwane

1INkosi yasisithi kuMose: Yana kuFaro, ngoba ngiyenze yaba lukhuni inhliziyo yakhe lezinhliziyo zezinceku zakhe ukuze ngibonakalise lezizibonakaliso zami phambi kwabo,

2lokuba utshele indodana yakho lendodana yendodana yakho izinto ezihlekisayo engizenze phezu kwamaGibithe lezibonakaliso engizenze phakathi kwawo, ukuze lazi ukuthi ngiyiNkosi.

3UMose loAroni baya kuFaro bathi kuye: INkosi, uNkulunkulu wamaHeberu, ithi: Koze kube nini usala ukuzithoba phambi kwami na? Vumela abantu bami ukuba bahambe, bayengikhonza.

4Ngoba uba ungabavumeli ukuba bahambe, ngizakuthumela kusasa elizweni lakho isikhongwane,

5esizakusibekela lonke ilizwe ukuba lingabonakali kumuntu, sidle konke lokho okwasalayo esiqhothweni, sidle zonke izihlahla zakho ezisegangeni.

6Sizagcwala izindlu zakho lezindlu zenceku zakho zonke lezindlu zawo wonke amaGibithe, abangazanga basibone esinje oyihlo laboyise baboyihlo selokhu baba khona emhlabeni kuze kube lamhla. Waphenduka, wasuka kuFaro.

7Inceku zikaFaro zathi kuye: Lumuntu uzasihlupha kuze kube nini na? Bavumele abantu ukuba bahambe, bayekhonza iNkosi uNkulunkulu wabo; kawukazi yini ukuthi iGibithe liyachitheka na?

8UMose loAroni babuyiselwa kuFaro; wathi kubo: Hambani liyeyikhonza iNkosi uNkulunkulu wenu. Kodwa ngobani phakathi kwenu abazakuhamba na?

9UMose wathi: Sizahamba labatsha bethu labadala bethu, lamadodana ethu lamadodakazi ethu, lezimvu zethu lezinkomo zethu, siyenzele iNkosi umkhosi.

10Wathi kubo: INkosi ibe lani, uba ngilivumela ukuba lihambe labantwana benu! Ngibona ukuba lifuna ukwenza okubi.

11Atshi! kodwa kakuhambe amadoda, ayeyikhonza iNkosi, ngoba yikho lokhu elikufisayo. Basebexotshwa phambi kukaFaro.

12INkosi yathi kuMose: Yelula isandla sakho phezu kwelizwe laseGibithe ukuba kufike isikhongwane elizweni laseGibithe, sidle imibhida yonke lakho konke okwasala esiqhothweni.

13UMose wayiphakamisa intonga yakhe phezu kwelizwe laseGibithe; iNkosi yaletha umoya wasempumalanga elizweni kulo lonke lolosuku lakubo bonke lobobusuku; kwathi sekusile, umoya wasempumalanga waletha isikhongwane.

14Isikhongwane safika elizweni lonke laseGibithe, sahlala endaweni zonke zaseGibithe, sasinengi kakhulu. Kwakungazanga kube khona isikhongwane esingangaso ngaphambi kwaso, futhi kakuyikuba khona esingangaso emva kwaso.Isam 9:2, 3

15Ngoba sagcwala ilizwe lonke, kwaze kwaba mnyama elizweni; sadla yonke imibhida lazo zonke izithelo zezihlahla ezasala esiqhothweni; kakusalanga lutho oluluhlaza, lesihlahla lombhida weganga kulo lonke ilizwe laseGibithe.

16UFaro wasephangisa ukubabiza oMose loAroni, wathi kubo: Ngonile eNkosini uNkulunkulu wenu lakini.

17Ngakhoke ake lingithethelele isono sami okwalesisikhathi esisodwa nje, liyincenge iNkosi uNkulunkulu wenu ukuze isuse kimi lokhukufa.

18UMose waphuma kuFaro, wayincenga iNkosi.

19INkosi yaletha umoya olamandla owasentshonalanga owasusa isikhongwane, wasixotshela oLwandle oluBomvu; kakusalanga sikhongwane lesisodwa elizweni lonke laseGibithe.

20Kodwa iNkosi yenza inhliziyo kaFaro yaba lukhuni, kazabavumela abakoIsrayeli ukuba bahambe.

Inhlupheko yesificamunwemunye: Umnyama ophuntshuthwayo

21INkosi yasisithi kuMose: Phakamisela isandla sakho phezulu ukuba kube khona umnyama elizweni laseGibithe, umnyama ongaphuntshuthwa ngesandla.

22UMose wasephakamisela isandla sakhe phezulu; kwaba khona umnyama omkhulu elizweni lonke laseGibithe insuku ezintathu.Hubo 105:28; Isam 16:10

23Bahluleka ukubonana, futhi kakusukanga muntu endaweni yakhe insuku zaze zabantathu; kodwa emizini yabakoIsrayeli kwakukhona ukukhanya.

24UFaro wasembiza uMose wathi: Hambani liyeyikhonza iNkosi, bahambe lani labantwana benu, kodwa kusale izimvu lezinkomo zenu.

25Kodwa uMose wathi: Kuhle ukuba usivumele ukuba sithathe imihlatshelo leminikelo yokutshiswa, ukuze siyihlabele iNkosi uNkulunkulu wethu.

26Ngakho lezinkomo zethu zizahamba kanye lathi, kungasali emuva lankomo eyodwa; ngoba sifanele sizithathe siyikhonze iNkosi uNkulunkulu wethu ngazo, ngoba kasikwazi esizakuyikhonza ngakho iNkosi size sifike khona.

27Kodwa iNkosi yayenza yaba lukhuni inhliziyo kaFaro, kazabavumela ukuba bahambe.

28UFaro wathi kuye: Suka lapha, uqaphele ukuba ungabonani lami futhi; ngoba mhla ubonana lami uzakufa.

29UMose wathi: Ukhulume kuhle, kangisayikubonana lawe.