Isa 44 - Ndebele Bible (iBhayibhili Elingcwele) 1978

INkosi inguNkulunkulu oyedwa

1Kodwa zwanake, wena Jakobe, nceku yami,

wena Israyeli engikukhethileyo.

2INkosi eyakwenzayo, yakubumba esiswini, ezakukusiza,

ithi: Ungesabi, Jakobe, nceku yami.

wena Jeshuruni engikukhethileyo.

3Ngoba ngizathela amanzi phezu komhlaba owomileyo,

lezikhukhula emhlabathini owomileyo;

ngithele umoya wami phezu kwenzalo yakho,

lesibusiso sami phezu kwabantwana bakho.

4Bazakuhluma njengotshani obuphakathi kwamanzi,

lanjengenhlokotshiyane engasemifuleni yamanzi.

5Omunye uzakuthi: Mina ngingoweNkosi;

omunye azibize ngebizo likaJakobe,

lomunye alobe esandleni sakhe ukuthi: NgingoweNkosi;

azibonge ngebizo likaIsrayeli.

6INkosi, uMbusi kaIsrayeli, loMhlengi wakhe, iNkosi yamabandla,

ithi: Ngingowokuqala lowokucina;

ngaphandle kwami kakukho omunye unkulunkulu.

7Ngubani ofanana lami?

Kasukume akhulume, atsho njalo phambi kwami.

Kabikezele izinto ezizayo,

asitshele ngokuzakwenzeka.

8Lingesabi, lingatshaywa luvalo;

angithi ngalitshela kusukela endulo na?

Lina lingofakazi bami.

Kambe kukhona uNkulunkulu ngaphandle kwami na?

Atshi, kalikho iDwala elinjengami, kangilazi.

Ngezithombe

9Bonke abenza izithombe bayize, lezinto zabo ezithandekayo kazisizi lutho; labo abazidumisayo kababoni, futhi kabazi, ngakho bazayangeka.

10Kuyize ukwenza unkulunkulu, lokubumba isithombe esingelakusiza.

11Bonke abasidumisayo bazayangeka. Abenzi bezithombe bangabantu nje; kabeze ekuthonisweni, bazatshaywa luvalo, bayangeke bonke.

12Umkhandi uthatha insimbi ayikhande isatshisa, ayibumbe ngengalo yakhe elamandla; lapho eselambile uyaphela amandla, nxa engelamanzi okunathwa uyadinwa.

13Umbazi yena welula intambo, adwebe isigodo ngepenseli, asibaze ngezancele, asidwebe ngensimbi ecijileyo, enze ngaso umfanekiso womuntu, umuntu omuhle olesimo esihle, ukuba uhlale endlini.

14Ugamula umkusu, kumbe athathe iphane loba isihlahla esikhulu asikhethe ezihlahleni zegusu, loba mhlawumbe ahlanyele umkusu, lezulu liwukhulise.

15Kuthi omunye ube zinkuni zokubaswa, othe umlilo wazo, apheke ngazo ukudla kwakhe; omunye enze ngawo unkulunkulu, abaze ngawo isithombe, akhothame kuso.

16Ingxenye yakho ubasa ngakho umlilo osa ngakho inyama ukuze adle asuthe; yebo, uyotha athi: Halala! ngiyafudumala, umlilo muhle.

17Okuseleyo kwakho enze ngakho isithombe, akhothame kuso, asikhonze, akhuleke kuso athi: Wena ungunkulunkulu wami; ngisilisa.

18Kabazi, kabaqedisisi; ngoba amehlo abo avalekile ukuze bangaboni, lengqondo zabo zivalekile ukuze bangaqedisisi.

19Owenza izithombe kacabangi, kalakwazi lokuhlakahipha ukuba athi: Ngibasile ingxenye yakho emlilweni, ngapheka ngawo isinkwa, ngosa inyama, ngayidla; kambe ngizakwenza isithombe esiyisinengiso ngokuseleyo na? Ngizaguqa phambi kwesigodo na?

20Kufana nje lokudla umlotha; ingqondo yobuthutha iyamkhohlisa; kaboni ukuthi lokhu akuphethe ngesandla kakusunkulunkulu.

INkosi inguMhlengi kaIsrayeli

21INkosi ithi: Khumbula lezizinto, wena Jakobe,

lawe Israyeli, ngoba uyinceku yami;

ngakubumba, uyinceku yami.

Wena Israyeli, kangiyikukukhohlwa.

22Ngesule iziphambeko zakho njengeyezi,

lezono zakho njengenkungu;

buyela kimi, ngoba ngikuhlengile.

23Thokozani, lina mazulu, iNkosi ikwenzile;

lijabule, lina zindawo ezizikileyo zomhlaba;

lihlabele, lina zintaba, lawe gusu lazo zonke izihlahla ezikuwe.

Ngoba iNkosi isimhlengile uJakobe,

izakudunyiswa koIsrayeli.

24INkosi, uMhlengi wakho, eyakubumba esiswini,

ithi: NgiyiNkosi eyenza zonke izinto,

ngendlala iphezulu ngedwa ngenza lomhlaba ngedwa.

25Nginguye ofilisa imihlolo yezangoma,

athuthaze izanuse,

abuyisele emuva abahlakaniphileyo,

aphendule ukwazi kwabo kube yibuthutha;

26ogcwalisa ilizwi lenceku zakhe,

aphumelelise amacebo ezigijimi zakhe,

othi ngeJerusalema: Lizakuba labantu futhi;

langemizi yakoJuda: Izakwakhiwa futhi,

ngizavusa amanxiwa abo;

27otshoyo kulo ulwandle ukuthi: Tshana,

ngizakomisa imifula yakho;

28lotshoyo ngoKurosi ukuthi: Yena ungumalusi wami,

uzaphelelisa lonke icebo lami;

ukuze lakhiwe futhi iJerusalema,

kubekwe lezisekelo zethempeli.