Mark 11 - Ndebele Bible (iBhayibhili Elingcwele) 1978

UJesu ungena eJerusalema(Mat 21:1–11; Luka 19:28–40; Joha 12:12–19)

1Kwathi besondela eJerusalema, eBetfage, laseBethani, ngasentabeni ethiwa iOliveti, wathuma ababili kubafundi bakhe,

2wathi kibo: Hambani liye emzini okhangelene lani; kuzakuthi lisangena lizakufumana ithole likababhemi likhulekiwe, okungazanga kuhlale kulo umuntu; lilikhulule, lililethe.

3Uba umuntu esithi kini: Likwenzelani lokhu na? lithi: INkosi iyalifuna; izakulibuyisa masinyane.

4Bahambake, bafumana ithole likhulekiwe ngasesangweni ngaphandle endleleni; balikhulula.

5Abanye kwababemi khona bathi kubo: Lenzani likhulula ithole na?

6Batsho kubo njengokutsho kukaJesu; basebebayekela.

7Baliletha ithole kuJesu, babeka ingubo zabo phezu kwalo, wakhwela kulo.

8Abanengi bendlala ingubo zabo endleleni, labanye amahlamvu abawagamule egangeni.

9Ababehamba phambili lababelandela bamemeza besithi:

Hosana! Ubusisiwe ozayo ebizweni leNkosi.

10Ubusisiwe umbuso ozayo kababa uDavida.

Hosana kweliphezulu!

11Wangena eJerusalema, waya ethempelini; wathi esekhangele konke, ngoba isikhathi sesihambile, waphuma waya eBethani labalitshumi lambili.

Ukuthukwa komkhiwa(Mat 21:18–19)

12Kusasa bevela eBethani walamba.

13Ebona umkhiwa ukhatshana, ulamahlamvu, wasondela esithi mhlawumbe angafumana ulutho kuwo; efika kuwo kafumananga lutho, amahlamvu wodwa, ngoba kwakungesiso isikhathi sezithelo zawo.

14Wathi kuwo: Kakungabe kusadla umuntu loyedwa isithelo kuwe lanini. Abafundi bakhe bakuzwa.

Ukuhlanjululwa kwethempeli(Mat 21:12–17; Luka 19:45–48; Joha 2:12–22)

15Bafika eJerusalema. Wangena ethempelini, waqala ukuxotsha labo ababethengisa lababethenga ethempelini, wagenqula amatafula ababentshintshelana imali lezihlalo zalabo ababethengisa inkwilimba;

16wayengavumeli ukuba umuntu adabule ethempelini ethwele impahla.

17Wafundisa, wathi kubo: Kakulotshiwe yini ukuthi indlu yami izakubizwa ngokuthi yindlu yokukhuleka yezizwe zonke? Kodwa lina seliyenze ubhalu lwabaphangi.Isa 56:7; Jer 7:11

18Abapristi abakhulu lababhali bekuzwa lokhu bafuna indlela yokumbulala, ngoba babemesaba, ngoba lonke ixuku lamangala ngokufundisa kwakhe.

19Ngokuhlwa wayayaphume emzini.

Ukuzuza amandla ngokukholwa(Mat 21:20–22)

20Ekuseni besadlula babona umkhiwa ubunile kusukela empandeni.

21UPetro wakhumbula, wathi kuye: Mfundisi, khangela, umkhiwa owuthukileyo ubunile.

22UJesu wabaphendula wathi kibo: Kholwani uNkulunkulu.

23Ngiqinisile ngithi kini: Ilowo lalowo ozakuthi kulintaba: Quphuka, uphoseke olwandle; engathandabuzi enhliziyweni yakhe kodwa ekholwa ukuthi akutshoyo kuyenzeka, uzakwenzelwa.Mat 17:20; 1 Kor 13:2

24Ngakho ngithi kini: Konke elikukhulekelayo lelikucelayo, kholwani ukuthi selikwamukele, lizakuba lakho.

25Nxa limi likhuleka, thethelelani, uba lilomlandu lomuntu, ukuze uYihlo osezulwini laye alithethelele iziphambeko zenu.Mat 6:14–15

Amandla kaJesu(Mat 21:23–27; Luka 20:1–8)

27Babuya bafika eJerusalema; kwathi ehamba ethempelini, abapristi abakhulu lababhali labadala beza kuye,

28bathi kuye: Izinto lezi uzenza ngawaphi amandla, ingabe ngubani okunike lamandla okwenza lezizinto na?

29UJesu wathi kubo: Lami ngizakulibuza umbuzo ube munye, lingiphendule; kung’khona ngizakulitshela ukuthi ngenza lezizinto ngawaphi amandla.

30Ubhaphathizo lukaJohane lwavela ezulwini ingabe ebantwini na? Ngiphendulani.

31Bakhulumisana bodwa, besithi: Uba sisithi: Ezulwini, uzakuthi: Pho, kalikholwanga kuye ngani na?

32Kodwa uba sisithi: Ebantwini — besaba ixuku, ngoba bonke bathi uJohane wayengumprofethi impela.

33Basebemphendula uJesu, bathi: Kasazi. UJesu wathi kibo: Lami kangilitsheli ukuthi ngenza lezizinto ngawaphi amandla.