uNehimiya 5 - Ndebele Bible (iBhayibhili Elingcwele) 1978

UNehemiya ulaya ukuba ukucela izibambiso kuyekelwe

1Kwaba khona ukukhala okukhulu kwabantu labomkabo ngabaJuda abakibo.

2Kwaba khona abathi: Sibambisa ngamadodana ethu langamadodakazi ethu ukuba sizuze ukudla kokusiphilisa.

3Kwaba khona abanye abathi: Sibambisa ngamasimu ethu langezivini zethu langezindlu zethu ukuba sizuze amabele ngenxa yendlala.

4Labanye bathi: Seboleka imali yokuthela enkosini ngamasimu ethu langezivini zethu.

5Sinyamanye labazelwane bethu, labantwana bethu bayafanana lababo; kanti khathesi sicindezelwa ukuba senze amadodana ethu lamadodakazi ethu abe yizigqili; amanye amadodakazi ethu aseyizigqili; kasilawo amandla okuwasiza, ngoba abanye abantu sebesithathele amasimu ethu lezivini zethu.

6Ngathukuthela kakhulu nxa ngisizwa ukukhala kwabo lalamazwi.

7Ngathi sengicabangile ngasola izikhulu lezinduna, ngathi kuzo: Khangelani ubunzima omunye lomunye wenu abethwese umfowabo! Ngababizela umhlangano omkhulu, ngabasola,Eks 22:25; Levi 25:35–37; Dute 23:19, 20

8ngathi kibo: Thina ngamandla esilawo sibahlengile abakithi abaJuda ababethengiswe kwezinye izizwe; kodwa lina selithengisa abakini, lizabuya libathenge lina uqobo na? Bathula bathi zwi, ngoba bengelakho abangakutsho.

9Ngasengisithi: Into eliyenzayo kayilunganga. Kufanele ukuba lihambe ngokumesaba uNkulunkulu wethu ukuze liqede ukukloloda kwezizwe eziyizitha zethu.

10Mina uqobo lezihlobo zami kanye lezinceku zami besikade sinika abantu imali lamabele. Asiyekeleni ukwethwesa abantu ubunzima lobo.

11Babuyiseleni abantu lamhlanje amasimu abo, lezivini zabo, lezihlahla zabo zamaoliva, lezindlu zabo, liyekele lokuthatha inzuzo yemali leyamabele leyewayini leyamafutha ebeliyizuza kubo.

12Basebesithi: Sizabuyisela konke lokhu, singabizi lutho kubo. Sizakwenza njengokutsho kwakho. Ngasengibiza abapristi ngabafungisa labo ababesenza lokho ukuba benze njengokuthembisa kwabo.

13Ngasengithintitha ingubo yami ngisithi: Ngokunjalo uNkulunkulu kathintithe bonke abantu ezindlini zabo lasemisebenzini yabo abangasenziyo lesisithembiso. Bathintithwe ngokunjalo, bachithwe. Lonke ibandla lathi: Kakube njalo. Bayidumisa iNkosi; benza njengokuthembisa kwabo.

14Futhi eminyakeni elitshumi lambili ngingumbusi wakoJuda kusukela emnyakeni wamatshumi amabili wokubusa kukaAtakisekisi, kuze kube semnyakeni wamatshumi amathathu lambili, kasizanga sidle mina labakithi ukudla okuyisabelo sombusi.

15Ababusi ababengaphambi kwami babathwalisa nzima abantu, bethatha kibo ukudla kwensuku ngensuku lewayini okulingana lamashekeli esiliva angamatshumi amane. Lezinceku zabo zabaphatha kalukhuni abantu. Kodwa mina kangikwenzanga lokho ngenxa yokwesaba uNkulunkulu.

16Futhi nganikela wonke amandla ami emsebenzini wokwakha lumduli, kangaze ngazizuzela umhlaba; labantu bami bonke babuthana lapho emsebenzini.

17Nganginika ukudla abantu abalikhulu lamatshumi amahlanu ababengabaJuda lezinduna, nginika lalabo ababevela ezizweni esakhelene lazo.

18Insuku ngensuku ngangihlaba inkabi eyodwa lezimvu ezinonileyo eziyisithupha, lezinkukhu ezinengi; langemva kwazo zonke insuku ezilitshumi ngiletha lemigodla yewayini elinengi. Phezu kwakho konke lokhu kangizanga ngibize isabelo sokudla kombusi, ngoba abantu bathi kimi kunzima.

19Akungikhumbule ngokuhle, Nkulunkulu wami, ngakho konke lokhu engikwenzele lababantu.