KwabaseFiliphi 2 - Ndebele Bible (iBhayibhili Elingcwele) 1978

Ukuzithoba kukaKristu lokuphakanyiswa kwakhe

1Ngakhoke uba kukhona ukukhuthaza kuKristu, uba kukhona ukukhuthaza kothando, uba kukhona ukuhlanganyela kukaMoya, uba kukhona ububele lesihawu,

2gcwalisani ukuthokoza kwami ngokuba langqondonye, libe lothando lunye, libe lenhliziyonye lokuqonda kunye.

3Lingenzi lutho ngokubangisana langokuziqhenya, kodwa ngokuthobeka litshaye sengathi abanye bangcono kulani.

4Kakube yilowo lalowo angakhathaleli okwakhe yedwa, kodwa kakhathalele lokwabanye.

5Kawube kini lowomqondo owawukhona kuKristu Jesu,

6yena owathi elesimo sikaNkulunkulu, katshongo ukuthi kuyinto yokuphangwa ukulingana loNkulunkulu,

7kodwa wazidela, wathatha isimo senceku, waba ngumuntu.

8Wathi esebuntwini, wazithoba, walalela uNkulunkulu kwaze kwaba sekufeni, yebo, ekufeni esiphambanweni.

9Ngakhoke uNkulunkulu wamphakamisa kakhulu, wamnika ibizo elikhulu kulawo wonke,

10ukuze kuthi ebizweni likaJesu amadolo wonke aguqe, awabasezulwini, lawabasemhlabeni, lawabangaphansi komhlaba,Isa 45:23

11lezindimi zonke zivume ukuthi uJesu Kristu uyiNkosi, kube ludumo lukaNkulunkulu uYise.

Ukupheleliswa komsebenzi wokusiliswa

12Ngakhoke, bathandiweyo bami, njengalokho lilalela ngezikhathi zonke, kungesikho nxa ngikhona kuphela, kodwa ikakhulu nxa ngingekho, phelelisani umsebenzi wokusiliswa kwenu ngokwesaba langokuthuthumela,

13ngoba uNkulunkulu usebenza kini elenza ukuba lithande lisebenzele intando yakhe.

14Yenzani zonke izinto ngokungasoli langokungabuzi,

15ukuze lingasoleki, libe msulwa, abantwana bakaNkulunkulu abangelasici phakathi kwesizukulwana esingaqondanga lesiphambeneyo, elikhanya phakathi kwaso njengezinkanyezi emhlabeni;Dute 32:5

16libambelele ngokuqinileyo elizwini lokuphila ukuba ngibe lokuzincoma osukwini lukaKristu ngokuthi kangigijimelanga ize, kangisebenzelanga ize.

17Yebo, loba nginikelwa emhlatshelweni ongumnikelo wokukholwa kwenu, ngiyathokoza kanye lani lonke.

18Ngokunjaloke thokozani lani, lithokoze kanye lami.

UPawuli uzakuthumela uTimothi loEpafrodithu

19Ngiyathemba eNkosini uJesu ukuthuma uTimothi kini masinyane, ukuze lami ngithokoziswe yikuzwa indaba zenu.

20Kangilaye omunye onjengaye, ozananzelela indaba zenu ngobuqotho;

21ngoba bonke bazifunela okwabo, bengafuni okukaJesu Kristu.

22Kodwa liyakwazi ukuthembeka kukaTimothi ukuthi usebenzile kanye lami ngenxa yevangeli njengomntwana kuyise.

23Ngiyathembake ukumthuma masinyane, nxa sengibonile ukuthi okuqondene lami kuphelela ngaphi.

24Njalo ngiyathemba eNkosini ukuthi lami ngizakuza kini masinyane.

25Ngibonile ukuthi kufanele ngithume kini loEpafrodithu, umzalwane lesisebenzi lolibutho kanye lami, lesithunywa senu sokungisebenzela ekusweleni kwami;

26ngoba wayelilangatha lonke, ekhathazekile ngoba lizwile ukuthi ubegula.

27Lempela wagula waphos’ukufa; kodwa uNkulunkulu wamhawukela, engahawukeli yena yedwa, kodwa ehawukela lami, ukuze ngingabi losizi phezu kolunye.

28Ngakhoke ngitshisekela ukumthuma, ukuze kuthi nxa selimbona futhi, lithokoze, losizi lwami lunciphe.

29Mamukelenike eNkosini ngokuthokoza konke, abanjaloke libahloniphe;

30ngoba ngenxa yomsebenzi kaKristu waphose wafa edela ukusila kwakhe, ukuze aphelelise okusileleyo ekungisebenzeleni kwenu.