2 Sam 3 - Ndebele Bible (iBhayibhili Elingcwele) 1978

1Kwakukhona ukulwa isikhathi eside phakathi kwendlu kaSawuli lendlu kaDavida; uDavida waya eqina, kodwa indlu kaSawuli yaya isiba buthakathaka.

Amadodana kaDavida

2UDavida wazala amadodana eHebroni; izibulo lakhe lalinguAmnoni kuAhinowama waseJezereli;

3eyesibili yayinguKileyabi kuAbigayili umkaNabali waseKarmeli; eyesithathu yayinguAbisalomu indodana kaMahaka indodakazi kaTalimayi, inkosi yaseGeshuri;

4eyesine yayinguAdonija indodana kaHagithi; eyesihlanu yayinguShefathiya indodana kaAbithali;

5eyesithupha yayinguIthereyamu kuEgila, umkaDavida. Laba bazalwa nguDavida eHebroni.

Ukuvumelana kukaDavida loAbineri

6Khonokho kusekhona ukulwa phakathi kwendlu kaSawuli lendlu kaDavida, uAbineri waqina waba lamandla endlini kaSawuli.

7USawuli wayelomunye umfazi, ibizo lakhe linguRizipha indodakazi kaAya; uIshiboshethi wathi kuAbineri: Ungeneleni kumkababa na?

8UAbineri wasethukuthela kakhulu ngenxa yalawomazwi kaIshiboshethi, wasesithi: Ngiyinja yakoJuda na? Kuze kube lamuhla ngithembekile endlini kaSawuli uyihlo, lakubafowabo, lakubangane bakhe, kangikunikelanga esandleni sikaDavida; kodwa ungibeka icala ngalowesifazana.

9UNkulunkulu amhlanekele uAbineri, engezelele futhi, uba ngingamenzeli uDavida lokho iNkosi ekufunge kuye,

10ukususa umbuso endlini kaSawuli, kumiswe isihlalo sobukhosi sikaDavida koIsrayeli lakoJuda, kusukela koDani kuze kufike eBerisheba.1 Sam 15:28

11UIshiboshethi wayengelakumphendula uAbineri ngelinye ilizwi futhi, ngoba wayemesaba.

12UAbineri wasethuma izithunywa kuDavida eHebroni, esithi: Ngelikabani ilizwe na? Yenza isivumelwano lami, ngizakukusiza ukubuyisela wonke uIsrayeli kuwe.

13UDavida wathi: Kulungile; ngizakwenza isivumelwano lawe, kodwa yinye into engiyifuna kuwe, ngeyokuthi kawuyikubonana lami, uba ungalethi kuqala uMikhali indodakazi kaSawuli, lapho usiza ukubonana lami.

14UDavida wasethuma izithunywa kuIshiboshethi indodana kaSawuli, esithi: Nginika umkami uMikhali engamlobola ngamajwabu alikhulu amaFilistiya.1 Sam 18:27

15UIshiboshethi wasethumela, wamthatha endodeni yakhe uPalitiyeli indodana kaLayishi.

16Kodwa indoda yakhe yahamba laye, ihamba ikhala, yamlandela kwaze kwaba seBahurimi. UAbineri wasesithi kuyo: Buyela. Yasibuyelake.

17UAbineri wasekhuluma labadala bakoIsrayeli esithi: Ngezikhathi ezidlulileyo lafuna ukuba uDavida abe yinkosi yenu.

18Kwenzeni lokho khathesi, ngoba iNkosi uNkulunkulu itshilo ngoDavida ukuthi: Ngesandla senceku yami uDavida ngizakhulula abantu bami uIsrayeli ezandleni zamaFilistiya lezandleni zazo zonke izitha zabo.

19UAbineri wakhuluma futhi labakoBenjamini; wasesiyabikela uDavida eHebroni konke okwakukuhle koIsrayeli lakuyo yonke indlu yakoBenjamini.

20Kwathi efika uAbineri kuDavida eHebroni labantu abangamatshumi amabili, uDavida wamenzela idili labantu ababelaye.

21UAbineri wasesithi kuDavida: Sengihamba, ngibuthanise wonke uIsrayeli kuwe, nkosi yami, ukuba benze isivumelwano lawe, ukuba ubuse kukho konke okufiswa yinhliziyo yakho. UDavida wasemvumela uAbineri ukuba ahambe, wazihambela kuhle.

UJowabi ubulala uAbineri

22Inceku zikaDavida zabuya loJowabi zivela ekuhlaseleni zilempango enengi. Kodwa uAbineri wayengasekho kuDavida eHebroni, ngoba wamvumela ukuba ahambe, wazihambela kuhle.

23Esefikile uJowabi lebutho lakhe lonke, bamtshela bathi: UAbineri indodana kaNeri ubefikile enkosini, imyekele wahamba, wazihambela kuhle.

24UJowabi wasesiya enkosini, wathi: Wenzeni na? UAbineri ubefikile kuwe; umvumeleleni ukuba ahambe, wazihambela na?

25Uyazi ukuba uAbineri indodana kaNeri wayeze ukukukhohlisa, ukuba azi ukuhamba kwakho konke, lakho konke okwenzayo.

26Esephumile uJowabi kuDavida wathuma izithunywa ukulandela uAbineri, zambuyisa emthonjeni waseSira; kodwa uDavida wayengakwazi lokho.

27UAbineri esebuyile eHebroni, uJowabi waya laye eceleni ngasesangweni ukuba bakhulume bebodwa; wasemgwaza esiswini, wafa, ephindisela uAsaheli umfowabo.

28Kwathi uDavida esekuzwile lokho wathi: Mina lombuso wami kasilacala phambi kweNkosi kuze kube nininini ngegazi likaAbineri indodana kaNeri.

29Kalehlele ekhanda likaJowabi lakuyo yonke indlu kayise. Kungasweleki endlini kaJowabi olamanxeba abhibhidlayo, lolesifo esibi, longasebenza umsebenzi wamanina kuphela, lobulawa empini, loswela ukudla.

30UJowabi loAbishayi umfowabo bambulala uAbineri, ngoba wayebulele umfowabo uAsaheli empini, eGibeyoni.

31UDavida wasesithi kuJowabi lakubo bonke abantu ababelaye: Dabulani izigqoko zenu, ligqoke izambatho zokulila, lililele uAbineri. Inkosi uDavida walandela ithala.

32UAbineri bamngcwabela eHebroni, inkosi yakhala kakhulu engcwabeni lakhe, labantu bonke bakhala.

33Inkosi yamlilela uAbineri yathi:

Afe uAbineri njengesithutha na?

34Izandla zakho bezingabotshwanga,

lenyawo zakho bezingafakwanga emaketaneni;

ufile njengomuntu obulawa ngabantu ababi.

Bonke abantu baphinda bamkhalela.

35Bonke abantu basebesiza ukumncenga uDavida ukuba adle kusesemini; kodwa uDavida wafunga wathi: UNkulunkulu angihlanekele ngokwengezelelweyo uba ngithinta ukudla loba okunye nje lingakatshoni ilanga.

36Bonke abantu bakubona, kwabathokozisa; njengoba konke eyayikwenza inkosi kwakubathokozisa bonke abantu.

37Basebesazi bonke abantu laye wonke uIsrayeli ngalolosuku ukuba kwakungesiyo inkosi eyabulala uAbineri indodana kaNeri.

38Inkosi yathi encekwini zayo: Kalazi yini ukuthi kufile iqhawe lomuntu omkhulu koIsrayeli lamuhla na?

39Lami lamuhla ngibuthakathaka lanxa ngigcotshwe ngaba yinkosi; lababantu, amadodana kaZeruya, bayangahlula. INkosi uNkulunkulu kayiphindisele owenza okubi ngobubi bakhe.