2 Kho 18 - Ndebele Bible (iBhayibhili Elingcwele) 1978

Ukubusa kukaHezekiya

1Ngomnyaka wesithathu wokubusa kukaHosheya indodana kaEla, inkosi yakoIsrayeli, uHezekiya indodana kaAhazi inkosi yakoJuda waba yinkosi.

2Wayeleminyaka engamatshumi amabili lanhlanu lapho eqalisa ukubusa; wabusa iminyaka engamatshumi amabili lesificamunwemunye eJerusalema. Ibizo likanina lalinguAbija indodakazi kaZekariya.

3Wenza okulungileyo phambi kweNkosi njengokwenza konke kukaDavida ukhokho wakhe.

4Wavala indawo eziphakemeyo zokukhonzela, wadiliza insika zokukhonzela, wagamulela phansi insika zikankulunkulukazi uAshera, wachoboza inyoka yethusi uMose ayeyenzile, ngoba kuze kube yilezonsuku abantu bakoIsrayeli babelokhu betshisela impepha kuyo, bayibiza ngokuthi nguNehushitani.Nani 21:9

5Wayithemba iNkosi, uNkulunkulu kaIsrayeli. Kakubanga khona leyodwa inkosi efana loHezekiya emakhosini wonke akoJuda ayengaphambi kwakhe lamlandelayo.

6Wabambelela waqina eNkosini, kaphambukanga ekuyilandeleni, kodwa wagcina imilayo iNkosi eyalaya ngayo uMose.

7INkosi yaba laye, waphumelela kukho konke akwenzayo. Wayivukela inkosi yaseAsiriya, kazabe esaba ngaphansi kwayo.

8Wawanqoba amaFilistiya waze wafika eGaza lasendaweni zakhona, kanye lenqaba zokulinda lemizi ebiyelweyo.

Ukunqotshwa kweSamariya

9Ngomnyaka wesine wokubusa kukaHezekiya owawungumnyaka wesikhombisa wokubusa kukaHosheya indodana kaEla, inkosi yakoIsrayeli, kwafika uShalimaneseri inkosi yaseAsiriya, wavimbezela iSamariya.

10Walithatha ngemva kweminyaka emithathu. Ngomnyaka wesithupha wokubusa kukaHezekiya owawungumnyaka wesificamunwemunye wokubusa kukaHosheya inkosi yakoIsrayeli lathathwa iSamariya.

11Inkosi yaseAsiriya yabathumba abakoIsrayeli, yabasa eAsiriya, yababeka eHala elaseHabori umfula waseGozani, lemizini yamaMede,

12ngoba bengalilalelanga ilizwi leNkosi uNkulunkulu wabo, kodwa besaphula isivumelwano sayo, lakho konke uMose inceku yeNkosi ayebalaye khona; kabezwanga, kabalalelanga.

Ukuhlaselwa kwelizwe lakoJuda nguSenakeribi

13Ngomnyaka wetshumi lane wokubusa kwenkosi uHezekiya, uSenakeribi inkosi yaseAsiriya wafika wahlasela yonke imizi yakoJuda ebiyelweyo, wayithatha.2 Lan 32:1–19; Isa 36:1–21

14UHezekiya inkosi yakoJuda wathumela ilizwi enkosini yaseAsiriya eLakishi esithi: Ngonile; phuma elizweni lami, ngizahlawula loba kuyini okubiza kimi. Ngakho inkosi yaseAsiriya yasihlawulisa uHezekiya inkosi yakoJuda amathalenta esiliva angamakhulu amathathu, lamashekeli egolide azinkulungwane ezificamunwemunye.

15UHezekiya wayinika sonke isiliva esasikhona ethempelini laso sonke esasisezindlini zezinotho zesigodlo senkosi.

16Ngalesosikhathi uHezekiya waxexebula igolide elalisezivalweni zethempeli leNkosi, lasemigubazini ayelinamathisele khona, walinika inkosi yaseAsiriya.

17Inkosi yaseAsiriya yathumela induna enkulu, lenduna yabathenwa, lenceku enkulu zilempi enkulu zisuka eLakishi ukuba ziye enkosini uHezekiya eJerusalema. Zahambake zafika eJerusalema. Sezifikile zafika zema ngasemfolweni wechibi elingaphezulu, elisemgwaqweni weNsimu yoMgezisi.

18Lapho zibiza inkosi, kweza kizo uEliyakimi indodana kaHilikiya owayengumphathi wesigodlo, loShebina umabhalane, loJowa indodana kaAsafi owayengumbhali.

19Inceku enkulu yathi kibo: Mtsheleni uHezekiya ukuthi nanti ilizwi lenkosi enkulu, inkosi yaseAsiriya, ithi: Uthembeni ngalesisibindi sakho na?

20Uthi amazwi nje angathatha isikhundla samaqhinga lamandla okulwa na? Usuthembe bani ukuthi ungivukele na?

21Siyazi ukuthi uthembe iGibithe elinjengomhlanga owephukileyo ohlabayo isandla somuntu obambelela ngawo. Unjaloke uFaro inkosi yaseGibithe kubo bonke abathembela kuye.

22Uba lisithi kimi: Thina sithemba iNkosi uNkulunkulu wethu; kanti angithi yiyo elezindawo zayo eziphakemeyo zokukhonzela lama‐altare ayo uHezekiya awasusileyo, wathi ebantwini bakoJuda labaseJerusalema: Lizakhonza phambi kwaleli ialtare eliseJerusalema?

23Ngakhoke yenza isivumelwano lenkosi yami, inkosi yaseAsiriya; ngizakukunika amabhiza azinkulungwane ezimbili, uba wena ungazuza abantu bokuwagada.

24Uzakwala omunye wabancinyane nje bezinceku zenkosi yami, uthembele ukuzuza izinqola labagadi bamabhiza eGibithe na?

25Futhi ngizile yini ukuchitha lindawo ngaphandle kwemvumo yeNkosi uNkulunkulu na? Ithe kimi: Hamba uyehlasela lelilizwe, ulichithe.

26UEliyakimi indodana kaHilikiya loShebina loJowa bathi encekwini enkulu: Akukhulume lezinceku zakho ngesiAramu, ngoba siyasizwa; ungakhulumi lathi ngolimi lwakoJuda abantu abasemdulini besizwa.

27Inceku enkulu yabaphendula yathi: Inkosi yami ingithumile ukukhuluma lamazwi enkosini yenu lakini kuphela, kodwa ukuba ingawakhulumi ebantwini abahlezi phezu komduli abazakudla ubulongwe babo, banathe umchamo wabo kanye lani na?

28Inceku enkulu yasisukuma yamemeza ngelizwi elikhulu ngolimi lwakoJuda isithi: Zwanini ilizwi lenkosi enkulu, inkosi yaseAsiriya.

29Yona ithi: Lingamvumeli uHezekiya ukuba alikhohlise, ngoba kayikuba lamandla okulikhulula esandleni sami;

30lingamvumeli ukuba alenze lithembele eNkosini uNkulunkulu ngokuthi: INkosi izakusikhulula sibili, lumuzi kawuyikunikelwa esandleni senkosi yaseAsiriya.

31Lingamlaleli uHezekiya, ngoba inkosi yaseAsiriya ithi: Yenzani isivumelwano sokuthula lami, liphume lize kimi; lonke lizazidlela izithelo zamavini enu lezithelo zemikhiwa yenu, lizinathele amanzi emithombo yenu,

32ngize ngifike ngilithathe, ngilise elizweni elifanana lelizwe lakini, ilizwe eligcwele amabele lewayini lomumbu lezivini lezihlahla zamaoliva lenyosi, ukuze liphile lingafi. Lingamlaleli uHezekiya nxa elikhohlisa ngokuthi: INkosi uNkulunkulu izakusikhulula.

33Kambe onkulunkulu bezinye izizwe bawakhulula yini amazwe abo esandleni senkosi yaseAsiriya na?

34Bangaphi onkulunkulu baseHamathi leArpadi na? Bangaphi onkulunkulu abaseSefavayimi labaseHena labaseIva na? Bangaphi onkulunkulu baseSamariya na?

35Nguwuphi kubo bonke onkulunkulu balawomazwe okhulule ilizwe lakhe esandleni sami, ukuba iNkosi uNkulunkulu ikhulule iJerusalema esandleni sami na?

36Abantu bathula, kabaze baphendula langelilodwa ilizwi, ngoba inkosi yayithe: Lingamphenduli.

37UEliyakimi indodana kaHilikiya owayengumgcini wesigodlo, loShebina umabhalane, loJowa indodana kaAsafi, owayengumbhali, beza kuHezekiya izigqoko zabo zidatshuliwe, bamtshela amazwi enceku enkulu.