Isa 36 - Ndebele Bible (iBhayibhili Elingcwele) 1978

Ukuhlaselwa kwelizwe lakoJuda nguSenakeribi

1Kwathi ngomnyaka wetchumi lane wokubusa kwenkosi uHezekiya, uSenakeribi inkosi yaseAsiriya wafika wahlasela yonke imizi ebiyelweyo yakoJuda, wayithatha.2 Kho 18:13–27; 2 Lan 32:1–19

2Inkosi yaseAsiriya yathumela inceku enkulu isuka eLakishi, yaya kuHezekiya inkosi yaseJerusalema lempi enkulu. Yema ngasemfolweni wechibi elingaphezulu, elisemgwaqweni weNsimu yoMgezisi.

3Kwasekusiya kuyo uEliyakimi indodana kaHilikiya, owayengumgcini wesigodlo, loShebina umabhalane, loJowa indodana kaAsafi umbhali.

4Inceku enkulu yathi kubo: Mtsheleni uHezekiya ukuthi nanti ilizwi lenkosi enkulu, inkosi yaseAsiriya ithi: Uthembeni ngalesisibindi sakho na?

5Uthi amazwi nje angathatha isikhundla samaqhinga lamandla okulwa na? Usuthembe bani ukuthi ungivukele na?

6Siyazi ukuthi uthembe iGibithe elinjengomhlanga owephukileyo, ohlabayo isandla somuntu obambelela ngawo. Unjaloke uFaro inkosi yaseGibithe kubo bonke abathembela kuye.Hez 29:6, 7

7Uba lisithi kimi: Thina sithemba iNkosi uNkulunkulu wethu; kanti angithi yiyo elezindawo zayo eziphakemeyo zokukhonzela lama‐altare ayo uHezekiya awasusileyo, wathi ebantwini bakoJuda labaseJerusalema: Lizakhonza phambi kwaleli ialtare?

8Ngakhoke yenza isivumelwano lenkosi yami, inkosi yaseAsiriya, ngizakukunika amabhiza azinkulungwane ezimbili, uba wena ungazuza abantu bokuwagada.

9Uzakwala omunye wabancinyane nje bezinceku zenkosi yami, uthembele ukuzuza izinqola labagadi bamabhiza eGibithe na?

10Futhi ngizile yini ukulichitha lelilizwe ngaphandle kwemvumo yeNkosi uNkulunkulu na? Ithe kimi: Hamba uyehlasela lelilizwe, ulichithe.

11UEliyakimi loShebina loJowa bathi encekwini enkulu: Ake ukhulume lezinceku zakho ngesiAramu, ngoba siyasizwa; ungakhulumi lathi ngolimi lwakoJuda abantu abasemdulini besizwa.

12Inceku enkulu yathi: Inkosi yami ingithumile ukukhuluma lamazwi enkosini yenu lakini kuphela, kodwa ukuba ingawakhulumi ebantwini abahlezi phezu komduli abazakudla ubulongwe babo, banathe umchamo wabo kanye lani na?

13Yasisukuma inceku enkulu, yamemeza ngelizwi elikhulu ngolimi lwakoJuda yathi: Zwanini amazwi enkosi enkulu, inkosi yaseAsiriya.

14Yona ithi: Lingamvumeli uHezekiya ukuba alikhohlise, ngoba kayikuba lamandla okulikhulula;

15lingamvumeli ukuba alenze lithembele eNkosini uNkulunkulu ngokuthi: INkosi izakusikhulula sibili, lumuzi kawuyikunikelwa esandleni senkosi yaseAsiriya.

16Lingamlaleli uHezekiya, ngoba inkosi yaseAsiriya ithi: Yenzani isivumelwano sokuthula lami, liphume lize kimi; lonke lizazidlela izithelo zamavini enu, lezithelo zemikhiwa yenu, lizinathele amanzi emithombo yenu,

17ngize ngifike, ngilithathe, ngilise elizweni elifanana lelizwe lakini, ilizwe eligcwele amabele lewayni, ilizwe eligcwele ukudla lezivini.

18Qaphelani ukuba uHezekiya angalikhohlisi ngokuthi: INkosi uNkulunkulu izakusikhulula. Kambe onkulunkulu bezinye izizwe bawakhulula yini amazwe abo esandleni senkosi yaseAsiriya na?

19Bangaphi onkulunkulu baseHamathi laseArpadi na? Bangaphi onkulunkulu baseSefavayimi na? Onkulunkulu baseSamariya balikhulule yini iSamariya esandleni sami na?

20Nguwuphi kubo bonke onkulunkulu balawomazwe okhulule ilizwe lakhe esandleni sami, ukuba iNkosi uNkulunkulu ikhulule iJerusalema esandleni sami na?

21Abantu bathula, kabaze baphendula langelilodwa ilizwi, ngoba inkosi yayithe: Lingamphenduli.

22Basebefika kuHezekiya oEliyakimi indodana kaHilikiya umgcini wesigodlo, loShebina umabhalane, loJowa indodana kaAsafi owayengumbhali, izigqoko zabo zidatshuliwe, bamtshela amazwi enceku enkulu.