uNehimiya 4 - Ndebele Bible (iBhayibhili Elingcwele) 1978

Izitha zibahlupha abakhayo

1Kwathi uSanibalati esezwile ukuthi siyawakha umduli, wathukuthela kakhulu, wabahleka ulunya abaJuda.

2Wathi phambi kwabakibo laphambi kwempi yaseSamariya: LababaJudanyana bathi benzani na? Bathi bazayilungisa indawo na? Bathi bazanikela umnikelo, bawuqede umsebenzi ngasuku lunye na? Bangenza amatshe yini ngezinqwaba zengcekeza, layo ingetshileyo na?

3UTobiya umAmoni wayelaye, yena wathi: Yebo, lalokho abakwakhayo, uba ikhanka likhwela phezu komduli wakho wamatshe lingakudilizela phansi.

4Ngasengikhuleka ngisithi: Akuzwe, Nkulunkulu wethu, ukweyiswa kwethu okungaka! Buyisela ukukloloda kwabo emakhanda abo, ubenze baphangwe, bathunjelwe kwelinye ilizwe.

5Ungaligubuzeli icala labo, lesono sabo ungasicimi emehlweni abo, ngoba basithukuthelisile thina esingabakhi.

6Sawakhake umduli, yaze yahlangana yonke ingxenye yokuphakama kwawo, ngoba abantu babezimisele ukusebenza.

7Kodwa kwathi oSanibalati loTobiya lamaArabiya lamaAmoni labaseAshidodi sebezwile ukuthi ukwakhiwa kwemiduli yaseJerusalema kuyaqhubekela phambili lokuthi izikhala seziqala ukuvaleka, bathukuthela kakhulu;

8basebesenza icebo bonke lokuba bahlangane balwe leJerusalema, badunge phakathi kwalo.

9Sakhuleka kuNkulunkulu wethu, sabeka abalindi ukuba basivikele emini lebusuku.

10Kodwa abakoJuda bathi: Amandla abathwali asephelile, kanti izibi zisenengi; sesisahluleka ukusebenza emdulini.

11Lezitha zethu zathi: Bengakazi, bengakaboni lutho, sizatheleka kibo sibabulale, siwumise umsebenzi.

12Kwathi abaJuda ababehlala lazo befika emzini basixwayisa kanenginengi ukuthi bazakusihlasela bevela endaweni zonke.

13Ngasengimisa abantu ngezindlu zabo behlomile ngemihedla lemikhonto lemitshoko, ngaphansi endaweni ezisobala ngemva komduli.

14Sengibonile ukuthi bayesaba, ngathi kuzo izikhulu lezinduneni lakwabanye abantu: Lingabesabi. Khumbulani iNkosi enkulu leyesabekayo, lilwele abafowenu lamadodana enu lamadodakazi enu labomkenu lemizi yenu.

15Kwathi izitha zethu sezizwile ukuthi sesikwazi konke lokuthi uNkulunkulu ufilisile icebo labo, sabuyela sonke emsebenzini wethu wokwakha umduli.

16Kusukela mhlalokho ingxenye yabantu bami yasebenza ekwakheni, lengxenye yaphatha imikhonto lezihlangu lemitshoko, igqoke amabhatshi ensimbi. Izinduna zakhangela abakoJuda

17ababesakha umduli. Ababethwala imithwalo bayithwala ngesinye isandla, baphatha izikhali ngakwesinye.

18Bonke abakhi babehlomile imihedla yabo ngasenhlangothini zabo ekwakheni kwabo. Umuntu wokukhalisa impondo wema eceleni lami.

19Ngathi kuzo izikhulu lezinduneni lakwabanye abantu: Umsebenzi mkhulu, futhi ubanzi; lathi sixekelene emdulini, omunye ukhatshana lomunye.

20Lapho lisizwa kukhala uphondo, gijimelani ngakithi; uNkunlunkulu wethu uzasilwela.

21Ngakho saqhubeka emsebenzini; ingxenye yaphatha izikhali kusukela emadabukakusa kwaze kwaphuma izinkanyezi.

22Ngathi futhi ebantwini ngalesosikhathi: Bonke abantu lezinceku zabo kabalale phakathi kweJerusalema ukuba sivikelwe ebusuku, sisebenze emini.

23Ngakhoke mina, lezihlobo zami, lalabo ababephethwe yimi, labangilindayo, kasizanga sikhumule izigqoko zethu, sahlala sihlomile izikhali zethu.