Seb 22 - Ndebele Bible (iBhayibhili Elingcwele) 1978

UPawuli ulandisa abaJuda ngokuphenduka kwakhe(9:1–19; 26:12–18)

1Bobaba, labazalwane, zwanini ukuziphendulela kwami engikwenza phambi kwenu.

2Kwathi sebezwile ukuba ukhuluma labo ngolimi lwamaHeberu, bathula kakhulu, wasesithi:

3Mina ngingumJuda owazalelwa eTarsusi elaseKilikhiya, kodwa ngakhulela kulumuzi, ngasenyaweni zikaGamaliyeli ngafundiswa ngokuqinileyo umlayo wabokhokho ngitshisekela uNkulunkulu njengani lonke lamhlanje.Seb 5:34–39

4Ngazingela abantu baleyoNdlela kwaze kwaba sekufeni, ngibabopha, ngibanikela entolongweni abesilisa labesifazana,Seb 8:3; 26:9–11

5njengokuba umpristi omkhulu lomphakathi wonke wabadala ungangifakazela, ngazuza kubo incwadi eziya kubazalwane, ngaya eDamaseko ukuba lababekhona lapho ngibalethe eJerusalema bebotshiwe, ukuze batshaywe.

6Kwathi ngisahamba sengisondela eDamaseko phakathi kwemini, kwahle kwangizingelezela ukukhanya okukhulu okuvela ezulwini.

7Ngawela phansi, ngezwa ilizwi lisithi kimi: Sawuli, Sawuli, ungizingelelani na?

8Ngaphendula ngathi: Ungubani, Nkosi, na? Wathi kimi: NginguJesu waseNazaretha omzingelayo.

9Labo ababelami bakubona ukukhanya, kodwa kabalizwanga ilizwi lalowo owakhuluma lami.

10Ngathi: Ngenzeni, Nkosi, na? INkosi yathi kimi: Sukuma, uye eDamaseko, uzakutshelwa khona konke okumiselwe ukuba ukwenze.

11Njengokuba ngangingasaboni ngenxa yenkazimulo yalokhokukhanya, ngadonswa ngesandla yilabo ababelami, ngafika eDamaseko.

12UAnaniya othile, indoda ekholwayo ngokomlayo, eyayinconywa yibo bonke abaJuda abahlala khona,

13weza kimi, wema phansi kwami, wathi kimi: Sawuli, mzalwane, buya ubone futhi. Mina ngasengibona ngalesosikhathi, ngamkhangela.

14Wasesithi: UNkulunkulu wabokhokho ukumisile ukuba uyazi intando yakhe, lokuba ubone oLungileyo, uzwe ilizwi eliphuma emlonyeni wakhe,

15ngoba uzakuba ngufakazi wakhe kubo bonke abantu walokho okubonileyo lokuzwileyo.

16Pho, usalindeleni na? Sukuma, ubhaphathizwe, uhlanjululwe ezonweni zakho ngokukhuleka ebizweni lakhe.

17Kwathi sengibuyele eJerusalema ngikhuleka ethempelini, ngafikelwa yisiyezi,

18ngambona; wathi kimi: Phangisa uphume eJerusalema, ngoba kabazukubamukela ubufakazi bakho ngami.

19Ngasengisithi: Nkosi, bayazi bona ukuthi yimi engangibabopha ngibatshaya emasinagogeni wonke labo abakholwa kuwe;

20lamuhla kuchithwa igazi likaStefane ufakazi wakho, ngangimi khona mina, ngivuma, ngilondoloze ingubo zalabo abambulalayo.Seb 7:58

21Wasesithi: Hamba, ngoba ngizakukuthumela khatshana kwabezizwe.

AbaJuda bafuna ukumbulala uPawuli

22Bamlalela kwaze kwafika kulelolizwi; basebephakamisa ilizwi labo, bathi: Msuseni umuntu onje emhlabeni! Ngoba kakufanele ukuba asile.

23Kwathi besamemeza, bezunguza ingubo zabo, bephosa uthuli emoyeni,

24induna enkulu yalaya ukuba angeniswe endlini yamabutho, yathi kahlolwe ngokutshaywa, ukuze ibone ukuthi kungani bememeza kangaka ngaye.

25Kwathi sebembophile ngemichilo, uPawuli wathi enduneni yekhulu eyayimi khona: Kuvunyelwe yini ukutshaya umuntu ongumRoma engalahlwanga licala na?

26Induna yekhulu isikuzwile lokhu yaya enduneni enkulu, yathi kuyo: Uzakwenza njani na? Ngoba lumuntu ungumRoma.

27Ngakho induna enkulu yafika, yathi kuye: Ngitshele, wena ungumRoma na? Yena wathi: Yebo.

28Induna enkulu yaphendula yathi: Mina ngalithenga lelolungelo ngemali enkulu. UPawuli wathi: Kodwa mina ngazalwa lalo.

29Ngakho labo ababezakumhlola basuka kuye masinyane; lenduna enkulu layo yesaba isisazi ukuthi uPawuli ungumRoma lokuthi ibimbophile.

30Kwathi kusasa ifuna ukwazi iqiniso lalokhu abaJuda abammangalela ngakho, yamkhulula, yalaya ukuba abapristi abakhulu lomphakathi wonke ubuthane, yamletha uPawuli yammisa phambi kwabo.