Hez 36 - Ndebele Bible (iBhayibhili Elingcwele) 1978

Ukubuyiswa kukaIsrayeli

1Ndoda, tshumayela ngentaba zakoIsrayeli uthi: Lina zintaba zakoIsrayeli, zwanini ilizwi leNkosi.

2INkosi uNkulunkulu ithi: Ngoba izitha zatsho kini zathi: Iya! khathesi intaba zasendulo sezingezethu;

3ngalokhoke tshumayela uthi: INkosi uNkulunkulu ithi: Ngoba abantu abalihanqileyo balichitha, balichoboza laze lanqotshwa langezinye izizwe, laba yingxoxo lokunyeya okubi kwabantu.

4Ngalokho, lina zintaba zakoIsrayeli, zwanini ilizwi leNkosi uNkulunkulu ezintabeni lasemaqaqeni, lasezindongeni lasezihotsheni, lasemizini echithekileyo langamanxiwa asephenduke impango lenhlekisa yezizwe ezizingelezeleyo.

5INkosi uNkulunkulu ithi: Ngikhuluma ngomona wami otshisayo ngezinye izizwe, ikakhulu ngalo lonke iEdoma, abazithathela ilizwe lami ngokuthokoza langokudelela ukuba libe ngelabo, bahlale kilo.

6Ngalokho tshumayela ngelizwe lakoIsrayeli, utsho ezintabeni lasemaqaqeni, lasezindongeni lasezihotsheni uthi: INkosi uNkulunkulu ithi: Ngikhuluma ngomona wami langolaka lwami, ngoba lithwele ihlazo lezizwe.

7Ngalokhoke iNkosi uNkulunkulu ithi: Ngiyazifunga ukuthi izizwe ezilihanqileyo yizo ezizathwala ihlazo.

8Kodwa, lina zintaba zakoIsrayeli, lizahluma ingatsha zenu, livezele abantu bami uIsrayeli izithelo, ngoba sebezakubuya ekhaya.

9Ngoba mina ngilani, ngizaphendukela ngakini, lizalinywa lihlanyelwe.

10Ngizakwandisa abantu phezu kwenu, uIsrayeli wonke, wonke ngoluthi lwakhe; imizi izahlala abantu, kwakhiwe lendawo ezichithekileyo;

11ngandise phezu kwenu abantu lenyamazana, kuzalane kwande. Ngizakwenza ukuba kwakhiwe kini njengakudala, ngilenzele okuhle kakhulu kulakuqala. Ngalokho, lina zintaba, lizakwazi ukuba ngiyiNkosi.

12Ngizahambisa abantu phezu kwenu, yebo abantu bami uIsrayeli. Bazahlala kini, libe zintaba zabo, kalisayikubabulala abantwana babo.

13INkosi uNkulunkulu ithi: Abantu bathi liyilizwe elidla abantu, libulala abantwana besizwe sakini.

14Kodwa kalisayikudla abantu, kalisayikubulalela isizwe sakini abantwana baso, kutsho iNkosi uNkulunkulu.

15Kangisayikuliyekela lizwe inhlamba yezizwe futhi, kalisayikuthwala ihlazo labantu loba likhubekise isizwe sakini, kutsho iNkosi uNkulunkulu.

16Ilizwi leNkosi lafika kimi lathi:

17Ndoda, lapho uIsrayeli esahlala elizweni lakhe, walingcolisa ngendlela zakhe langezenzo zakhe, ukuziphatha kwakhe phambi kwami kwakufana lokungcola kowesifazana osemfuleni.

18Ngakho ngasengehlisela phezu kwabo ulaka lwami ngenxa yegazi abalichitha elizweni, langenxa yezithombe abalingcolisa ngazo.

19Ngabachithachitha phakathi kwezizwe, bahlakazekela emazweni wonke; ngabathonisisa ngokufanele ukuziphatha kwabo lezenzo zabo.

20Kodwa nxa befika ezizweni lakuyiphi indawo abafika kiyo, bangcolisa ibizo lami elingcwele, abantu baze bathi ngabo: Laba bangabantu beNkosi, kodwa bakhutshiwe elizweni layo.

21Kodwa ngalikhathalela ibizo lami elingcwele abalingcolisayo abakoIsrayeli phakathi kwezizwe abaya kizo.

22Ngalokho tshono kuIsrayeli uthi: INkosi uNkulunkulu ithi: Kangikwenzi lokhu ngenxa yenu, lina Israyeli, kodwa ngikwenza ngenxa yebizo lami elingcwele elilingcolisileyo phakathi kwezizwe elaya kizo.

23Ngizabonakalisa ubungcwele bebizo lami elikhulu elingcoliswe phakathi kwezizwe, elilingcolisileyo lina phakathi kwazo; lezizwe zizakwazi ukuba ngiyiNkosi, kutsho iNkosi uNkulunkulu, nxa sengibonakalisa ubungcwele bebizo lami ngani phambi kwazo.

24Ngoba ngizalithatha ezizweni, ngilibuthe emazweni wonke, ngililethe elizweni lenu.

25Ngizalifafaza ngamanzi ahlambulukileyo, lihlambuluke kukho konke ukungcola kwenu, ngilihlambulule lakuzo zonke izithombe zenu.

26Ngizalinika inhliziyo entsha, ngifake lomoya omutsha phakathi kwenu, ngikhuphe inhliziyo elukhuni kini, ngilinike inhliziyo ebuthakathaka.Hez 11:19–20

27Ngizafaka umoya wami phakathi kwenu, ngilenze ukuba lihambe ngezimiso zami, lokuba linanzelele ukugcina imithetho yami.

28Lizahlala elizweni engalinika okhokho benu, libe ngabantu bami, lami ngibe nguNkulunkulu wenu.

29Ngizalikhulula kukho konke okulingcolisayo. Ngizabiza amabele, ngiwenze abe manengi, ngingalehliseli indlala.

30Ngizakwenza izithelo zezihlahla lezithelo zeganga zibe zinengi, ukuba lingaphindi futhi lithwale ihlazo lendlala phakathi kwezizwe.

31Lizakhumbula izindlela zenu ezimbi, lezenzo zenu ezingalunganga; lizazizonda ngenxa yezono zenu langenxa yamanyala enu.

32Kangikwenzi lokhu ngenxa yenu, kutsho iNkosi uNkulunkulu; kakwaziwe yini lokhu. Wobani lenhloni, liyangeke ngendlela zenu, lina Israyeli.

33INkosi uNkulunkulu ithi: Mhla ngilihlambulula ebubini benu bonke, ngizakwenza ukuba imizi ihlale abantu, kwakhiwe indawo ezichithekileyo.

34Ilizwe ebeselichithekile lizalinywa futhi, endaweni yokuba libe yikhangala kubo bonke abedlula khona.

35Bazakuthi: Lelilizwe ebeseliyinkangala selifana lensimu yaseEdeni; lemizi ebisichithekile isiyinkangala isingamanxiwa, isibiyiwe ihlala abantu.

36Izizwe ezisele zilizingelezele zizakwazi ukuba mina Nkosi ngizakhile indawo ezingamanxiwa, ngahlanyela kutsha ilizwe ebeseliyinkangala. Mina Nkosi ngikhulumile, ngizakukwenza.

37INkosi uNkulunkulu ithi: Lalokhu abakoIsrayeli bazangicela ukuba ngibenzele khona, ukuba ngandise abantu babo ngangomhlambi,

38ngangomhlambi womhlatshelo, ngangomhlambi eJerusalema ngesikhathi semikhosi emisiweyo. Ngokunjaloke imizi echithekileyo izagcwala abantu. Ng’khona bazakwazi ukuba ngiyiNkosi.