Hubo 135 - Ndebele Bible (iBhayibhili Elingcwele) 1978

Ukudumisa iNkosi ngezimangaliso zayo

1Dumisani iNkosi!

dumisani ibizo leNkosi,

dumisani lina zinceku zeNkosi,

2lina elima endlini yeNkosi,

emagumeni endlu kaNkulunkulu wethu.

3Dumisani iNkosi, ngoba ilungile;

hlabelelani ibizo layo, ngoba ilomusa.

4Ngoba iNkosi izikhethele uJakobe,

loIsrayeli ukuba abe ngowayo.

5Ngiyazi ukuthi iNkosi yinkulu,

lokuthi iNkosi yethu iphezu kwabo bonke onkulunkulu.

6Konke iNkosi ekuthandayo iyakwenza,

ezulwini lasemhlabeni, olwandle lasezinzikini zonke.

7Yiyo ekhupha amayezi emikhawulweni yomhlaba,

eyenza imibane ihambe ndawonye lezulu,

ekhupha imimoya eziphaleni zayo.

8Yiyo eyabulala amazibulo aseGibithe,

awabantu kanye lawenyamazana;

9eyathuma izibonakaliso lezimangaliso

phakathi kwakho, Gibithe,

phezu kukaFaro lezinceku zakhe zonke.

10Yatshaya izizwe ezinengi,

yabulala amakhosi alamandla,

11uSihoni inkosi yamaAmori,

loOgi inkosi yaseBashani,

lawo wonke amakhosi aseKanani,

12yanikela ilizwe labo laba ngelabantu bayo,

ngelikaIsrayeli, isizwe sayo.

13Ibizo lakho, Nkosi, limi kuze kube nininini,

lodumo lwakho, Nkosi, lumi kuzo zonke izizukulwana.

14Ngoba iNkosi izakwahlulela abantu bayo,

ibe lesihawu ezincekwini zayo.

15Izithombe zezizwe ngezesiliva legolide,

umsebenzi wezandla zabantu.

16Zilemilomo, kodwa kazikhulumi;

zilamehlo, kodwa kaziboni;

17zilendlebe, kodwa kazizwa;

lomoya kawukho emilonyeni yazo.

18Abazenzayo bafana lazo,

kanye labo bonke abathemba kuzo.

19Wena ndlu kaIsrayeli, bonga iNkosi;

wena ndlu kaAroni, bonga iNkosi;

20lawe ndlu kaLevi, bonga iNkosi.

Lina eliyesabayo iNkosi, ibongeni iNkosi.

21Kayibongwe iNkosi eZiyone,

yona ehlala eJerusalema.

Dumisani iNkosi!