Jobe 9 - Ndebele Bible (iBhayibhili Elingcwele) 1978

Impendulo kaJobe: wehluleka ukumphendula uNkulunkulu

1UJobe wasephendula esithi:

2Impela ngiyazi ukuba kunjalo.

Kodwa umuntu angalunga yini phambi kukaNkulunkulu?

3Uba umuntu efisa ukuphikisana laye,

uNkulunkulu kayikuphendula lowodwa emibuzweni eyinkulungwane.

4Ulenhliziyo ehlakaniphileyo, ulamandla amakhulu.

Ngubani ongamelana laye aphumelele na?

5UNkulunkulu uyasusa izintaba lanxa zingakwazi,

azigenqule lapho esethukuthele.

6Unyikinya umhlaba, awususe endaweni yawo,

kunyikinyeke lensika zawo,

7alawule ilanga ukuba lingaphumi,

avalele inkanyezi ngophawu lwakhe.

8Nguye yedwa owendlala izulu,

ohamba phezu kwamavinqo olwandle.

9Inkanyezi ezithiwa ziNgulube leziNja zenziwa nguye,

lesiLimela lenkanyezi zaseningizimu.

10Nguye owenza izinto ezinkulu ezingelakuqedisiswa,

lezimangalisayo ezingelakubalwa.

11Yebo, uyedlula phansi kwami ngingamboni,

edlule ngingamuzwa.

12Uba ebamba ulutho, ngubani ongamkhalimela na?

Ngubani ongathi kuye: Wenzani na?

13UNkulunkulu kayinqandi intukuthelo yakhe.

Abasizi bakaRahabi bawela phansi ngasenyaweni zakhe.

14Phoke, mina ngingamphendula ngithini,

ngikhethe amazwi ami okuqondana laye na?

15Loba bengilungile, bengingeke ngamphendula;

ngizacela isihawu kongibeka icala.

16Uba bengimbizile, wangisabela,

bengingayikukholwa ukuba ulilalele ilizwi lami.

17Uyangilimaza ngesiphepho,

andise amanxeba ami ngeze,

18engavumi ukuba ngiphefumule,

kodwa engigcwalisa ubuhlungu.

19Uba ngizama ngamandla, ulamandla kakhulu.

Uba ngimmangalela, ngubani ongambiza na?

20Loba ngingelacala, umlomo wami uzangilahla;

uba ngiqondile, uzakuthi ngonakele.

21Kangilacala, kangizikhathaleli;

ngiyanengwa yikuphila kwami.

22Kanti ukuphela kunye nje; ngakho ngithi:

Uyabhubhisa olungileyo kanye lomubi.

23Lapho umkhuhlane omkhulu uletha ukufa,

uyahleka ukuhlupheka kwabangelacala.

24Umhlaba unikelwe ezandleni zababi;

uvala amehlo abahluleli bawo.

Uba kungesuye, pho, ngubanike?

25Insuku zami zilejubane kulesigijimi,

ziyabaleka, kaziboni okuhle.

26Ziyantsheza njengezikepe zemihlanga,

njengokhozi olutheleka empangweni yalo.

27Uba ngisithi: Ngizakhohlwa ukusola kwami,

ngiqede ukunyukumala kwami, ngincibilike;

28ngiyesaba bonke ubuhlungu bami,

ngoba ngiyazi ukuthi kawuyikungiphatha njengongelacela.

29Ngizalahlwa mina,

phoke, ngizatshikatshikelani na?

30Uba ngizigezisa ngongqoqwane,

ngihlambulule izandla zami ngesepa,

31kanti uzangiphosela emgodini,

ngize ngenyanywe yizigqoko zami.

32Ngoba kasuye umuntu onjengami ukuba ngimphendule,

lokuba siye ekuthonisweni sonke.

33Kakukho umqamuli phakathi kwethu

ongabeka izandla zakhe phezu kwethu sobabili,

34ukuba uNkulunkulu asuse intonga yakhe kimi,

ukuze ngingehlelwa luvalo lokumesaba.

35Ng’khona ngizakhuluma ngingamesabi,

ngoba ngiyazi ukuthi inhliziyo yami injani.