1 Sam 28 - Ndebele Bible (iBhayibhili Elingcwele) 1978

1Ngalezonsuku amaFilistiya abutha izimpi zawo ukuba alwe loIsrayeli. UAkishi wathi kuDavida: Yazi ukuba wena labantu bakho lizaphuma impi lami.

2UDavida wathi kuAkishi: Kulungile, uzabona ukuthi inceku yakho ingenzani. UAkishi wasesithi kuDavida: Kulungile, ngizakukubeka ube ngumlindi wekhanda lami kokuphela.

USawuli lowesifazana oledlozi eEndori

3USamuweli wayesefile; bonke abakoIsrayeli babemlilele, bamngcwabela eRama emzini wakibo. USawuli wayebaxotshile elizweni bonke abalamadlozi labathakathi.1 Sam 25:1; Levi 20:27; Dute 18:10, 11

4AmaFilistiya abuthana ayamisa eShunemi. USawuli wabutha wonke uIsrayeli, bamisa eGilibowa.

5Lapho uSawuli ebona impi yamaFilistiya, watshaywa luvalo, wathuthumela kakhulu.

6Lapho uSawuli ebuza eNkosini, iNkosi kayimphendulanga langamaphupho langenkatho iUrimi langabaprofethi.Nani 27:21

7USawuli wasesithi encekwini zakhe: Ngidingelani owesifazana oledlozi ukuze ngiye kuye, ngibuze kuye. Inceku zakhe zathi kuye: Kukhona owesifazana oledlozi eEndori.

8USawuli wazifihla, wagqoka ezinye izigqoko, wahamba lamadoda amabili; bafika kowesifazana ebusuku. Wathi: Akungivumisele ngedlozi, ungikhuphele engizamutsho kuwe.

9Owesifazana wathi kuye: Impela uyazi ukuba uSawuli wenzeni, ukuthi ubaqedile elizweni abalamadlozi labathakathi. Pho, ungithiyelani ukuba ungibulale na?

10Kodwa uSawuli wafunga iNkosi kuye, wathi: Ngifunga iNkosi, kawuyikuba lacala ngalokho.

11Owesifazana wasesithi: Ngikukhuphele ubani na? Wathi: Ngikhuphela uSamuweli.

12Lapho owesifazana embona uSamuweli, waklabalala, wathi kuSawuli: Ungikhohliseleni na? Ngoba unguSawuli wena.

13USawuli wathi kuye: Ungesabi; ubonani? Owesifazana wathi kuSawuli: Ngibona unkulunkulu ephuma phansi.

14USawuli wathi kuye: Unjani? Waphendula wathi: Kuphuma ixhegu elembethe ingubo. USawuli wasebona ukuthi nguSamuweli; wathi mbo ngobuso bakhe phansi, wakhuleka.

15USamuweli wasesithi kuSawuli: Ungikhathazeleni ngokungikhupha na? USawuli waphendula wathi: Ngiyahlupheka kakhulu; amaFilistiya alwa lami, loNkulunkulu usengifulathele, kasangiphenduli ngabaprofethi langamaphupho. Ngakhoke ngikubizile ukuba ungitshele ukuthi ngenzeni.

16USamuweli wathi: Pho, ubuzelani kimi, lokhu iNkosi isikufulathele, yaba yisitha sakho na?

17INkosi isikwenzile kuwe lokho eyakutsho ngami; ikuhluthunele umbuso, yawunika omunye umuntu, uDavida.1 Sam 15:28

18Kawulilalelanga ilizwi leNkosi, futhi kawukwenzanga lokho okolaka lwayo olutshisayo kumaAmaleki; ngakhoke iNkosi yenzile lokhu kuwe lamuhla.1 Sam 15:3–9

19Futhi iNkosi izanikela uIsrayeli kanye lawe kumaFilistiya; kusasa wena lamadodana akho lizakuba lami. Impela iNkosi izanikela impi yakoIsrayeli kumaFilistiya.

20USawuli wasedilikela phansi, walala wathi daca emhlabathini, wesaba kakhulu ngenxa yamazwi kaSamuweli. Wayengaselamandla ngoba wayengadlanga lutho usuku lonke lobusuku bonke.

21Owesifazana wasesiya kuSawuli, wabona ukuba wethukile kakhulu, wathi kuye: Incekukazi yakho ililalele ilizwi lakho, ngingenisile ukuphila kwami engozini, ngalalela lokho okukhulume kimi.

22Ngakhoke lawe akulalele ilizwi lencekukazi yakho; ngikunike isinkwa ukuba udle, ukuze uzuze amandla okuhamba indlela yakho.

23Kodwa wala wathi: Kangiyikudla. Kodwa zamcindezela inceku zakhe kanye lowesifazana; waselalela amazwi abo. Wasesukuma phansi, wahlala embhedeni.

24Owesifazana wayelethole elinonileyo ekhaya; walihlaba masinyane; wathatha impuphu, wayixova, wenza isinkwa esingelamvubelo,

25wasibeka phambi kukaSawuli lenceku zakhe; badla. Basuka bahamba ngalobobusuku.