uNehimiya 3 - Ndebele Bible (iBhayibhili Elingcwele) 1978

Ukulungiswa kwemiduli yeJerusalema

1Kwasekusuka eEliyashibi umpristi omkhulu labanye abapristi, baqalisa umsebenzi. Bakha iSango leZimvu; bamisa imigubazi yalo, bafaka lezivalo endaweni zazo; bakha baze bayafika eMphotshongweni weKhulu laseMphotshongweni waseHananeli.

2Eceleni kwakhe kwakusakha abantu baseJeriko; eceleni kwabo kwakusakha uZakuri indodana kaImri.

3Amadodana kaHasenaya akha iSango leNhlanzi; amisa imigubazi yalo, lezivalo zalo, lamabhawudo alo, leminxibo yalo.

4Eceleni kwawo kwakusakha uMeremothi indodana kaUriya kaHakozi; eceleni kwakhe kusakha uMeshulamu indodana kaBerekiya kaMeshezabeli; eceleni kwakhe kusakha uZadoki indodana kaBahana;

5eceleni kwakhe kusakha abaseTekowa; kodwa izikhulu zabo zala ukusebenzela umphathi wabo.

6UJoyada indodana kaPaseya loMeshulamu indodana kaBesodeya bakha iSango elidala; bamisa imigubazi yalo, lezivalo zalo, lamabhawudo alo, leminxibo yalo.

7Eceleni kwabo kwakusakha uMelatiya waseGibeyoni loJadoni waseMerenothi, labantu baseGibeyoni labaseMizipa ababengaphansi kombusi welizwe elingaphetsheya komfula iYufrathi.

8Eceleni kwabo kwakusakha uUziyeli indodana kaHarihaya, umkhandi wensimbi; eceleni kwakhe kusakha uHananiya, umenzi wamakha; bakha iJerusalema baze bayafika eMdulini obanzi.

9Eceleni kwabo kwakusakha uRefaya indodana kaHuri, umbusi wengxenye yomuzi waseJerusalema.

10Eceleni kwakhe kwakusakha uJedaya indodana kaHarumafi maqondana lendlu yakhe; eceleni kwakhe kusakha uHathushi indodana kaHashabineya.

11OMalikiya indodana kaHarimi loHashubi indodana kaPahathi‐Mowabi bakha isigaba sesibili loMphotshongo weSithando somlilo.

12Eceleni kwabo kwakusakha uShaluma indodana kaHaloheshi, umbusi wengxenye yomuzi waseJerusalema elamadodakazi akhe.

13UHanuni labaseHanowa bakha iSango leSigodi; balilungisa, bamisa izivalo zalo, lamabhawudo alo, leminxibo yalo, balungisa umduli oyizingalo eziyinkulungwane kwaze kwaba seSangweni loMquba.

14UMalikiya indodana kaRekabi, umbusi welizwe laseBeti‐Hakerema wakha iSango loMquba; walilungisa, wamisa izivalo zalo, lamabhawudo alo, leminxibo yalo.

15UShaluma indodana kaKolihoze, umbusi welizwe laseMizipa, wakha iSango loMthombo; walilungisa, walifulela, wamisa izivalo zalo lamabhawudo alo leminxibo yalo; wakha lomduli weChibi laseShela ngasensimini yenkosi, waze waba ngasezikhwelweni eziphuma emzini kaDavida.

16Ngemva kwakhe kwakha uNehemiya indodana kaAzibuki, umbusi wengxenye yelizwe laseBeti‐Zuri, waze wafika maqondana lamangcwaba kaDavida, lasechibini elimbiweyo lendlini yamaqhawe.

17Ngemva kwakhe kwakusakha amaLevi, uRehuma indodana kaBani, elandelwa nguHashabiya, umbusi wengxenye yelizwe laseKeyila, owayesebenzela indawo yakibo.

18Ngemva kwakhe kwakusakha izihlobo zabo, uBinuwi indodana kaHenadadi, umbusi wengxenye yelizwe laseKeyila,

19elandelwa nguEzeri indodana kaJeshuwa, umbusi waseMizipa, owakha enye ingxenye emaqondana lendlela yokuya endlini yezikhali, eNgonsini.

20Ngemva kwakhe kwakusakha uBaruki indodana kaZabayi enye indawo esukela eNgonsini kusiya emnyango wendlu kaEliyashibi umpristi omkhulu.

21Ngemva kwakhe kwakusakha uMeremothi indodana kaUriya kaHakozi enye indawo esukela emnyango wendlu kaEliyashibi waze wafika ekucineni kwayo.

22Ngemva kwakhe kwakusakha abapristi ababehlala endaweni ezizingelezele iJerusalema.

23Ngemva kwabo kwakusakha oBenjamini loHashubi maqondana lendlu yakhe; ngemva kwabo kusakha uAzariya indodana kaMahaseya kaAnaniya eduze lezindlu zabo.

24Ngemva kwakhe kwakusakha uBinuwi indodana kaHenadadi enye indawo esukela endlini kaAzariya kusiya eNgonsini lasejikweni.

25UPalali indodana kaUzayi wakha maqondana leNgonsi lomphotshongo othutsha ngaphezu kwendlu yenkosi engaphezulu ngasegumeni labalindi. Ngemva kwakhe kwakusakha uPedaya indodana kaParoshi,

26waze wafika endaweni emaqondana leSango laManzi lasemphotshongweni othutsha lapho. — Inceku zasethempelini zazihlala eOfeli —

27Ngemva kwakhe abaseTekowa babesakha enye ingxenye maqondana lomphotshongo omkulu othutshayo, kwaze kwaba semdulini waseOfeli.

28Abapristi bakha phezu kweSango leBhiza, yilowo lalowo emaqondana lendlu yakhe.

29Ngemva kwabo kwakha uZadoki indodana kaImeri maqondana lendlu yakhe. Ngemva kwakhe kwakha uShemaya indodana kaShekaniya, umgcini weSango lasempumalanga.

30Ngemva kwakhe oHananiya indodana kaShelemiya loHanuni indodana yesithupha kaZalafi bakha enye indawo. Ngemva kwabo kwakha uMeshulamu indodana kaBerekiya maqondana lendlwana yakhe.

31Ngemva kwakhe kwakha uMalikiya omunye wabakhandi bensimbi waze waba sendlini yezinceku zasethempelini leyabathengi maqondana leSango laBalindi, kusiya endlini engaphezu kwengonsi.

32Phakathi kwendlu engaphezu kwengonsi leSango leZimvu kwakusakha abakhandi bensimbi labathengi.