uNehimiya 2 - Ndebele Bible (iBhayibhili Elingcwele) 1978

UNehemiya uvunyelwa ukuya eJerusalema

1Ngenyanga kaNisani, ngomnyaka wamatshumi amabili wokubusa kwenkosi uAtakisekisi, iwayini laliphambi kwenkosi, ngalithatha ngayinika. Ngema phambi kwayo ngangidanile kakhulu.

2Yathi kimi: Kungani ukhangeleka udanile na? Kawuguli; kodwa udanile nje. Ngangisesaba kakhulu,

3ngathi enkosini: Bayethe, nkosi! Ngizayekelelani ukudana nxa umuzi wakithi, indawo yamangcwaba abokhokho, usulunxiwa, lamasango awo asatshiswa ngomlilo na?2 Kho 25:8–10; 2 Lan 36:19; Jer 52:12–14

4Inkosi yasisithi kimi: Ukhala ngani na? Ngasengikhuleka kuNkulunkulu ophezulu.

5Ngathi enkosini: Uba kuyithokozisa inkosi, lenceku yakho isifumene umusa emehlweni akho, ngithumela koJuda emzini wamangcwaba abokhokho ukuba ngiwakhe futhi.

6Inkosi yathi kimi, lenkosikazi ihlezi phansi kwayo: Uzahamba okwesikhathi esingakanani, ubuye nini na? Yavuma inkosi ukuba ngihambe, ngayitshela ukuba ngizahamba okwesikhathi esinganani.

7Ngasengisithi enkosini: Uba kulungile enkosini kayinginike izincwadi eziya kubabusi belizwe elingaphetsheya komfula iYufrathi ukuze bangivumele ukudlula, ngiyefika koJuda,

8lencwadi eya kuAsafi, umphathi wegusu lenkosi, ukuba anginike izigodo zokwenza insika zamasango enqaba ehlangene lethempeli, lezokwenza umduli womuzi, lezendlu engizahlala kiyo. Inkosi yanginika engikucelayo, ngoba uNkulunkulu wami wayelami.

9Ngasengifika kubabusi belizwe elingaphetsheya kweYufrathi, ngabanika incwadi zenkosi. Inkosi yayithumele lami induna zempi labagadi bamabhiza.

10Kodwa kwathi lapho uSanibalati waseHoroni loTobiya inceku, umAmoni, besizwa lokhu, kwabacunula kakhulu ukuba kukhona ofikileyo ukubenzela okuhle abakoIsrayeli.

UNehemiya ukhuthaza abaseJerusalema ukwakha imiduli yomuzi

11Ngafikake eJerusalema, ngahlala khona insuku ezintathu.

12Ngavuka ebusuku kanye lamadoda athile ayingcosana; kangitshelanga muntu ngalokho uNkulunkulu wami ayekufake enhliziyweni yami ukuba ngikwenzele iJerusalema. Ngangingelanyamazana ngaphandle kwaleyo engangiyigadile.

13Ngaphuma ebusuku ngeSango leSigodi, ngaqonda eMthonjeni woMgobho ngaseSangweni loMquba, ngahlola imiduli yaseJerusalema eyayidilikile lamasango ayetshiswe ngomlilo.

14Ngasengidlulela eSangweni loMthombo lasechibini lenkosi; kodwa kwakungelandawo yokudlula inyamazana engangiyigadile.

15Ngasengihamba esigodini ebusuku ngihlola umduli; ngabuyela emuva, ngangena ngeSango leSigodi.

16Izinduna zazingazi ukuba bengingaphi lokuba bengisenzani. Ngangingakabatsheli abaJuda labapristi lezikhulu lezinduna kanye labanye ababezakuphatha umsebenzi.

17Ngasengisithi kibo: Liyabona inhlupheko esikiyo ukuthi iJerusalema lidilikile lamasango alo atshile. Wozani sakhe umduli waseJerusalema ukuba singabi lahlazo.

18Ngabatshela ngomusa uNkulunkulu wami angenzela wona langamazwi inkosi eyayiwakhulume kimi. Basebesithi: Asisukeni, sakhe. Bakhuthala ukwenza kuhle umsebenzi.

19Kodwa kwathi lapho uSanibalati waseHoroni loTobiya inceku, umAmoni, loGeshema umArabiya bekuzwa lokhu basihleka ulunya, baseyisa besithi: Kambe kuyini lokhu elikwenzayo na? Liyayivukela inkosi na?

20Mina ngathi kibo: UNkulunkulu ophezulu uzasiphumelelisa; lathi esiyizinceku zakhe sizasuka sakhe; kodwa lina kalilasabelo lelungelo lesikhumbuzo eJerusalema.