1Ngomnyaka wesibili kaDariyu inkosi, ngosuku lokuqala lwenyanga yesithupha, ilizwi leNkosi lafika ngoHagayi umprofethi kuZerubabeli indodana kaSalatiyeli umbusi wakoJuda, lakuJoshuwa indodana kaJehozadaki umpristi omkhulu;Ezra 4:24—5:2; 6:14
2lathi: INkosi yamabandla thi: Lababantu bathi kakukabi yisikhathi sokwakha futhi ithempeli leNkosi.
3Laselifika ilizwi leNkosi ngoHagayi umprofethi
4lisithi: Kuyisikhathi yini sokuba lina lihlale ezindlini zenu ezinhle, kanti lindlu ilunxiwa na?
5Ngakhoke iNkosi yamabandla ithi: Ake libone ukuthi izinto zilimele njani.
6Lihlanyele okunengi, lavuna okuyingcosana; liyadla, kodwa kalisuthi; liyanatha, kodwa kalikholwa; ligqoke lingakhudumali, lohola imali uholela ukuyifaka esikhwameni esivuzayo.
7INkosi yamabandla ithi: Ake libone ukuthi izinto zilimele njani.
8Khwelani ezintabeni ligamule izigodo, lakhe indlu engithokozisayo, lapho ngingabonakalisa khona udumo lwami, kutsho iNkosi.
9Beliqaphele okunengi, kodwa kube yingcosana elikuzuzileyo; lapho likuletha ekhaya, ngikuphephule konke. Kungani na? kutsho iNkosi yamabandla. Kungenxa yendlu yami elunxiwa, lina lilibele ngezindlu zenu.
10Ngenxa yalokhuke izulu ngaphezulu livalekile ukuba lingazuzi amazolo, lomhlabathi uvalekile ukuba lingazuzi izithelo zawo.
11Ngilethile ukoma elizweni lasezintabeni laphezu kwamabele laphezu kwewayini lamafutha laphezu kwakho konke okuvela emhlabathini, ebantwini lasenkomeni lakho konke abakwenzayo.
12Ngakho uZerubabeli indodana kaSalatiyeli loJoshuwa indodana kaJehozadaki umpristi omkhulu, labo bonke abantu ababesele, balilalela ilizwi leNkosi uNkulunkulu wabo, lamazwi kaHagayi umprofethi owayethunywe yiNkosi uNkulunkulu wabo; abantu bayesaba iNkosi.
13UHagayi isithunywa seNkosi wasekhuluma ebantwini ilizwi leNkosi, wathi: Ngilani, kutsho iNkosi.
14INkosi yavusa umoya kaZerubabeli indodana kaSalatiyeli umbusi wakoJuda, lomoya kaJoshuwa indodana kaJehozadaki umpristi omkhulu, lomoya wabo bonke abantu ababesele; beza ukuba basebenze endlini yeNkosi yamabandla uNkulunkulu wabo,
15ngosuku lwamatshumi amabili lane lwenyanga yesithupha.
Who We AreWhat We EelieveWhat We Do
2025 by iamachristian.org,Inc All rights reserved.
