1 Kho 12 - Ndebele Bible (iBhayibhili Elingcwele) 1978

AbakoIsrayeli bavukela indlu kaDavida

1URehobowamu waya eShekema ngoba bonke abakoIsrayeli babeye khona ukumbeka abe yinkosi.

2Kwathi uJerobowamu indodana kaNebati ekuzwa lokhu, wabuya evela eGibithe, ngoba wayelokhu eseGibithe lapho ayebalekele khona, ebalekela inkosi uSolomoni.

3AbakoIsrayeli beza bathi kuRehobowamu:

4Uyihlo wasithwalisa umthwalo onzima; wenake ake uphungule ubunzima asethwesa bona, wethule lemithwalo abesithwalise yona, ng’khona sizakukukhonza.

5Yena wathi kibo: Buyani futhi emva kwensuku ezintathu. Basebehambake.

6Inkosi uRehobowamu yasicebisana labadala ababeloyise uSolomoni esaphila, yathi: Lithi angithini kulababantu na?

7Bathi: Uba uzakuba yinceku yalababantu lamhla ubakhonze, ukhulume kibo amazwi amahle nxa ubaphendula, bazakuba zinceku zakho kokuphela.

8Kodwa yena wasidelela iseluleko sabadala, wacebisana lamajaha ayeyintanga yakhe, ayesizana laye.

9Wathi kuwo: Lithi sibaphendule sithini lababantu abathe kimi: Ake uphungule ubunzima esabethweswa nguyihlo?

10Amajaha ayeyintanga yakhe athi: Uzakutsho kulababantu abathi kuwe: Uyihlo wasethwesa ubunzima, kodwa akusiphungulele bona; uthi kibo: Ucikilicane wami uqatha kulokhalo lukababa.

11Ubaba walethwesa ubunzima, mina ngizakwengezelela kubo. Ubaba walitshaya ngesiswepu, kodwa mina ngizalitshaya ngemichilo elameva.

12Bonke abantu babuya kuRehobowamu ngosuku lwesithathu njengokutsho kwakhe ukuthi: Libuye kimi futhi ngosuku lwesithathu.

13Inkosi yabaphendula ngolaka abantu, yadela iseluleko sabadala,

14yalandela esamajaha yathi: Ubaba walethwesa ubunzima, mina ngizakwengezelela kubo; walitshaya ngesiswepu, kodwa mina ngizalitshaya ngemichilo elameva.

15Inkosi kayibalalelanga abantu; ngoba lokhu kwenziwa yiNkosi uNkulunkulu ukuze igcwalise ilizwi layo eyayilikhulume ngoAhija waseShiloni kuJerobowamu indodana kaNebati.

16Lapho bonke abakoIsrayeli bebona ukuthi inkosi kayibalaleli, bayiphendula bathi:

Silesabelo bani kuDavida na?

Kasilalifa thina endodaneni kaJese.

Yanini emizini yenu, lina bakoIsrayeli!

Sala lendlu yakho, Davida.

Basebehambake abakoIsrayeli, baya emizini yabo.2 Sam 20:1

17URehobowamu wabusa labakoIsrayeli ababehlala emizini yakoJuda.

18Inkosi uRehobowamu yasithuma uAdoniramu owayengumphathi wezibhalwa; bonke abakoIsrayeli bamkhanda ngamatshe, bambulala. Inkosi uRehobowamu yakhwela masinyane inqola yayo yokulwa, yabalekela eJerusalema.

19Kusukela kulesosikhathi abakoIsrayeli bayihlamuka indlu kaDavida kuze kube lamhla.

20Kwathi abakoIsrayeli bonke sebezwile ukuthi uJerobowamu usebuyile, bambizela emhlanganweni, bamenza inkosi yakoIsrayeli wonke. Kakubanga khona abalandela indlu kaDavida ngaphandle kwesizwe sakoJuda sodwa.

21Kwathi uRehobowamu esefikile eJerusalema wabuthanisa bonke abakoJuda lesizwe sakoBenjamini, amadoda empi ayizinkulungwane ezilikhulu lamatshumi aficaminwembili ukuba alwe labakoIsrayeli ukubuyisa umbuso.2 Lan 11:1–4

22Kodwa ilizwi likaNkulunkulu lafika kuShemaya umuntu kaNkulunkulu lathi:

23Tshela uRehobowamu indodana kaSolomoni, inkosi yakoJuda, labo bonke abantu bakoJuda labakoBenjamini labantu abaseleyo,

24uthi iNkosi ithi: Lingaphumi ukulwa lezihlobo zenu abantu bakoIsrayeli. Buyelani lonke emizini yenu, ngoba lokhu kuyintando yami. Basebelilalela ilizwi leNkosi uNkulunkulu, babuyela emizini yabo njengokutsho kwayo.

UJerobowamu uduhisa abakoIsrayeli

25UJerobowamu wasesakha iShekema entabeni zakoEfrayimi, wahlala khona; wasuka lapho wayakwakha iPenuweli.

26UJerobowamu wacabanga wathi: Umbuso uzabuyela endlini kaDavida;

27uba lababantu besiyanikela imihlatshelo ethempelini eJerusalema, inhliziyo zabo zizabuyela futhi enkosini yabo, uRehobowamu inkosi yakoJuda, bangibulale babuyele kuye.

28Emva kokunakana ngalindaba wenza amathole amabili egolide, wathi ebantwini: Seliye kakhulu eJerusalema; khangelani, nampa onkulunkulu benu, Israyeli, abalikhupha eGibithe.Eks 32:4

29Wasemisa elinye ithole eBetheli, lelinye walimisa koDani.

30Lokhu kwaba yisono koIsrayeli; abantu baya eBetheli ukukhonza elakhona, bahamba ummango wonke besiya koDani ukukhonza elinye.

31Wakha lamathempeli endaweni eziphakemeyo zokukhonzela, wabeka abapristi ebantwini bonke ababengesiwo amaLevi.

32UJerobowamu wamisa umkhosi ngosuku lwetshumi lanhlanu lwenyanga yesificaminwembili onjengomkhosi owakoJuda, wanikela imihlatshelo phezu kwealtare. Wenza njalo eBetheli ehlabela amathole ayewenzile. Wabeka eBetheli abapristi endaweni eziphakemeyo zokukhonzela ayezenzile.Levi 23:33–34

33Waya ealtareni ayelenzile eBetheli ngosuku lwetshumi lanhlanu enyangeni yesificaminwembili ayeyikhethile yena; wamisela abantu bakoIsrayeli umkhosi, wayatshisa impepha kulo ialtare.