Seb 25 - Ndebele Bible (iBhayibhili Elingcwele) 1978

UPawuli umangalelwa phambi kukaFestusi

1Kwathi uFestusi esengenile esikhundleni, emva kwensuku ezintathu wasuka eKesariya, wakhuphukela eJerusalema;

2abapristi abakhulu lezikhulu zabaJuda bammangalela uPawuli kuye bemncenga,

3bacela ukuba abenzele umusa ngokumthumela eJerusalema, beqonde ukumcathamela bambulale endleleni.

4Kodwa uFestusi waphendula ngokuthi uPawuli ugciniwe eKesariya lokuthi laye uzakuya khona masinyane;

5wathi: Akuthi abayizikhulu phakathi kwenu behlele khona kanye lami; uba kukhona ulutho olubi ngaleyondoda, bayimangalele.

6Kwathi esehlale labo insuku ezingadluli ezificaminwembili ingabe ezilitshumi, wehlela eKesariya; kusasa wahlala esihlalweni sokuthonisisa, walaya ukuba uPawuli alethwe.

7Esefikile, abaJuda ababehlile bevela eJerusalema bema bemhanqile, bemmangalela ngezinto ezinengi ezinzima, ababengelakuziqinisa.

8UPawuli eziphendulela wathi: Kangonanga lutho emlayweni wabaJuda, lasethempelini, lakuKesari.

9Kodwa uFestusi ethanda ukubongwa ngabaJuda, wathi kuPawuli: Uyathanda yini ukwenyukela eJerusalema, uthonisiswe khona ngalezizinto phambi kwami na?

UPawuli ucela ukuthonisiswa nguKesari

10Kodwa uPawuli wathi: Ngimi phambi kwesihlalo sokuthonisisa sikaKesari, lapho okufanele ngithonisiswe khona. Kangonanga lutho kubaJuda njengokuba lawe usazi kuhle.

11Uba ngonile ngenze ulutho olufanele ukufa, kangali ukufa; kodwa uba kungekho lutho lwalokho abangimangalela ngakho, kakulamuntu onganginikela kubo. Ngilidlulisela kuKesari.

12Kwang’khona uFestusi esekhulume lomphakathi wakhe waphendula wathi: Ulidlulisele kuKesari; uzakuya kuKesari.

UAgripha ubikelwa indaba kaPawuli

13Kwathi sekudlule insuku ezithile, uAgripha inkosi loBernike bafika eKesariya ukubingelela uFestusi.

14Sebehlezi khona insuku ezinengi, uFestusi wayilandisela inkosi ngendaba kaPawuli esithi: Kukhona indoda lapha eyatshiywa nguFelike iyisibotshwa;

15kwathi ngiseJerusalema, abapristi abakhulu labadala babaJuda bangibikela ngayo becela ukuba ilahlwe.

16Ngabaphendula ngathi: Kakusiwo umkhubo wamaRoma ukumnikela umuntu omangalelweyo engamiswanga phambi kwabammangaleleyo, azuze ithuba lokuziphendulela ngecala amangalelwa ngalo.

17Ngakho sebebuthene lapha, kangiphuzanga; kodwa ngosuku olulandelayo ngahlala esihlalweni sokuthonisisa, ngalaya ukuba leyondoda ilethwe.

18Basukuma abammangalelayo, kodwake kabavezanga cala ngayo lalezozinto ezimbi ebengizicabangela,

19kodwa babelokuphikisana okuthile laye ngenkolo yakibo langomunye othile othiwa nguJesu, owafayo; kodwa uPawuli uthi uyaphila.

20Kuthe mina ngisadidekile ukuba leyondaba ngizakuyihlola kanjani, ngambuza ukuthi angathanda ukukhuphukela eJerusalema ayethonisiswa khona ngalezozinto.

21Kodwa kwathi uPawuli eselidlulisile wacela ukuba agcinwe lize lithethwe yinkosi enkulu, ngalaya ukuba agcinwe ngize ngimthumele kuKesari.

22UAgripha wathi kuFestusi: Lami bengithanda ukuba kengiyizwe leyondoda. Yena wathi: Uzakuyizwa kusasa.

23Ngakho kusasa oAgripha loBernike bafika begqoke ubucwazicwazi langodumo, bangena endlini yokuthethela amacala kanye lezinduna ezinkulu lezikhulu zomuzi. Ngakho uFestusi walaya ukuba uPawuli alethwe.

24UFestusi wasesithi: Nkosi Agripha, lani lonke elikhona lapha kanye lathi, liyayibona lindoda esangicela ngayo sonke isizwe sabaJuda eJerusalema lalapha, simemeza sisithi kayisafanele ukusila.

25Kodwa mina kangifumananga ukuba wenze ulutho olufanele ukuba afe; kwathi yena eselidlulisele enkosini enkulu ngaquma ukumthumela khona.

26Kodwa kangilalutho oluqinileyo ngaye engingayilobela inkosi; ngakho ngimlethile phambi kwenu, ikakhulu phambi kwakho, nkosi Agripha, ukuze kuthi esehloliwe ngibe lakho engingakuloba.

27Ngoba mina ngibona kungaqondanga ukuba kuthunyelwe isibotshwa, kungatshiwo icala laso.