1Basebehambake inkosi loHamani ukuyakudla lenkosikazi uEsta.
2Ngosuku lwesibili besanatha iwayini inkosi yabuya yathi kuEsta: Loba kuyini okucela kimi, nkosikazi Esta, uzakunikwa khona; loba kuyini ofisa ngikwenzele khona, loba kuyingxenye yombuso wami, kuzakwenziwa.
3Inkosikazi uEsta waphendula wathi: Uba ngifumene umusa emehlweni enkosi, loba kukuhle enkosini, isicelo sami lokuncenga kwami yikuthi mina labantu bakithi siyekelwe siphile.
4Ngoba mina labantu bakithi sithengisiwe ukuba sibhujiswe sibulawe siphele; uba bekuyinto yokuba sithengiswe ebugqilini abesilisa labesifazana ngokufananayo, ngabe ngithule; ngoba bekungafanele ukuba sicele inkosi ukusivikela kulokho.
5Inkosi uAhasuweru yasisithi enkosikazini uEsta: Ngubani, futhi ungaphi lowomuntu obeqonde ukwenza okunje na?
6UEsta wathi: Isitha lomhluphi nguye lo uHamani omubi. UHamani waseqhaqhazela phambi kwenkosi lenkosikazi.
7Inkosi yasuka edilini ngokuthukuthela okukhulu, yaya esivandeni sesigodlo; uHamani yena wasala khonapho ukuba azincengele ukuphila kwakhe kuEsta, ngoba wabona ukuthi inkosi izimisele ukumchitha.
8Kwathi inkosi isibuyile edilini ivela esivandeni sesigodlo. uHamani wayeseziphosele phezu kombheda, uEsta ecambalele kuwo; inkosi yasibabaza isithi: Hawu! Uzakudlova inkosikazi khonapha phambi kwami endlini yami na? Kwathi inkosi isand’ukuwatsho lawomazwi, bahle bambomboza ubuso bukaHamani.
9UHaribona omunye wabathenwa owayelenkosi wathi: Emzini kaHamani kumi ugodo ubude balo buzingalo ezingamatshumi amahlanu, yena uqobo ubelulungisele uMoridekayi owake wayikhonza kuhle inkosi. Inkosi yathi: Mlengiseni kulo uHamani.
10Basebemlengisa kulologodo ayelulungisele uMoridekayi. Ngemva kwalokho kwasekudeda ukuthukuthela kwenkosi.
Who We AreWhat We EelieveWhat We Do
2025 by iamachristian.org,Inc All rights reserved.