Hubo 44 - Ndebele Bible (iBhayibhili Elingcwele) 1978

Ukukhululwa kwasendulo lokuhlupheka kwalesisikhathi

1Nkulunkulu, sizwile ngendlebe zethu,

okhokho basitshelile ngezenzo owazenza ensukwini zabo,

ensukwini zasendulo.

2Wababeka bona elizweni, kodwa wazixotsha izizwe ngesandla sakho;

wazichitha izizwe, kodwa wabandisa bona.

3Ngoba kabalithumbanga ilizwe ngemikhonto yabo,

kabanqobanga ngamandla abo,

kodwa ngesandla sakho langamandla akho,

langokukhanya kobuso bakho;

ngoba wawubathanda.

4Wena uyiNkosi yami loNkulunkulu wami,

onika uJakobe ukunqoba.

5Ngawe sizakunqoba izitha zethu,

langebizo lakho zizakubanyathela phansi abasivukelayo.

6Ngoba kangithembeli kuwo umtshoko wami,

futhi umkhonto wami kawulamandla okungisiza.

7Kodwa wena usikhulule ezitheni zethu,

wabachitha labo abasizondayo.

8Sizincomile ngoNkulunkulu njalonjalo;

sizakulibonga ibizo lakho kuze kube nininini.

9Kanti ususilahlile wasiyangisa,

kawusaphumi lezimpi zethu.

10Usenze ukuba sibalekele izitha zethu;

izitha zethu ziyaziphangela nje.

11Usenza sibe njengezimvu zokuhlatshwa,

wasichithachitha phakathi kwezizwe.

12Ngoba uthengisile abantu bakho ngokuncinyane nje,

ungabizi intengo enkulu ngabo.

13Usenze saba lihlazo kwabakhelene lathi,

inhlekisa lendumazo kwabasiphahlileyo.

14Usenze saba yisiga phakathi kwezizwe,

into yokuhlekisa phakathi kwabantu.

15Usuku lonke ngiyadunyazwa,

ngibanjwe zinhloni,

16ngenxa yamazwi abaklolodayo labahlambazayo,

langenxa yesitha lomphindiseli.

17Konke lokhu kwehlela phezu kwethu,

lanxa singakukhohlwanga wena,

singasaphulanga isivumelwano sakho.

18Inhliziyo zethu kazibuyelanga emuva,

lezinyathelo zethu kaziphambukanga endleleni yakho,

19ukuba usiphahlaze ngasendaweni yamakhanka,

usambese ngomnyama omkhulu.

20Uba besilikhohliwe ibizo likaNkulunkulu wethu,

loba sakhonza unkulunkulu wezizweni,

21uNkulunkulu ubengayikukubona lokhu na?

Ngoba uyayazi imfihlo yenhliziyo.

22Yebo, ngenxa yakho siyabulawa usuku lonke,

kuthiwa siyizimvu zokuhlatshwa.

23Vuka, Nkosi! Ulaleleni na? Vuka!

Ungasilahli kokuphela.

24Uzifihleleni kithi na?

Ukukhohlwelani ukuhlupheka kwethu lokucindezelwa kwethu na?

25Ngoba siwele phansi othulini,

silala phansi sinqotshiwe.

26Vuka, uzesisiza

usikhulule ngenxa yothando lwakho olungapheliyo.