Isa 55 - Ndebele Bible (iBhayibhili Elingcwele) 1978

INkosi izakuba lomusa kubo bonke abaphendukela kuyo

1INkosi ithi: We lina lonke elomileyo, wozani kukha amanzi,

laye ongelamali keze, athenge ukudla, adle.

Wozani lithenge iwayini lochago okungabizi mali.

2Lichithelani imali yenu kulokho okungeyisikho ukudla,

lamaholo enu kulokho okunganelisiyo na?

Ngizwisisani, lidle okuhle,

lizithokozise ngezibondlo.

3Lalelani, lize kimi, lizwe ukuze liphile;

ngizakwenza lani isivumelwano esingapheliyo,

ngothando olungapheliyo olwathenjiswa kuDavida.

4Ngamenza waba ngufakazi ebantwini,

waba ngumholi lomlawuli wamabutho ezizweni.

5Khangela, uzakubiza izizwe ongazaziyo,

lezizwe ezingakakwazi zizagijimela kuwe,

ngenxa yeNkosi, uNkulunkulu wakho, oNgcwele kaIsrayeli,

ngoba ikwenze waba lodumo.

6Dingani iNkosi iselokufunyanwa,

likhuleke kuyo iseseduze;

7omubi katshiye indlela yakhe,

longalunganga imicabango yakhe,

abuyele eNkosini ezakuba lomusa kuye,

lakuNkulunkulu wethu, ngoba uzamthethelela ngesihle.

8Ngoba imicabango yami kayifani leyenu,

lezindlela zami kazifani lezenu, kutsho iNkosi.

9Ngoba njengephezulu liphakeme kulomhlaba,

ngokunjalo indlela zami ziphakeme kulezenu,

lemicabango yami kulemicabango yenu.

10Njengalokhu izulu longqoqwane kusehla kuvela phezulu,

kungabuyeli khona kodwa kuthambisa umhlaba,

kuwenze ukuba uthele okuhlumayo,

unike umhlanyeli inhlanyelo, lodlayo ukudla,

11lizakuba njaloke lelizwi eliphuma emlonyeni wami;

kaliyikubuya kimi lize,

kodwa lizakwenza lokho engikufunayo,

liphumelelise lokho engilithumele khona.

12Lizakuphuma lina ngokuthokoza, liholwe ngokuthula;

izintaba lamaqaqa kuzahlokoma ngokuhlabela phambi kwenu,

lezihlahla zonke zeganga ziqakeze izandla zazo.

13Endaweni yameva kuzakumila iphane,

lasendaweni yokhula kumile umtshekisane;

lokhu kuzayenzela iNkosi udumo,

kube yisikhumbuzo esingapheliyo esingayikususwa.