Isa 50 - Ndebele Bible (iBhayibhili Elingcwele) 1978

1INkosi ithi:

Ingaphi incwadi yesahlukaniso engimlahle ngayo unyoko na?

Loba ngubani engilesikwelede kuye engilithengise kuye na?

Khangelani, lathengiswa ngenxa yobubi benu,

lonyoko walahlwa ngenxa yeziphambeko zenu.

2Kungani ngingafumananga muntu ekufikeni kwami na?

Kungani kungasabelanga muntu ekubizeni kwami na?

Licabanga ukuba isandla sami siyehluleka ukukhulula yini,

lokuthi kangiselamandla okulikhulula na?

Ngokukhuza kwami ngiyomisa ulwandle,

ngiphendule imifula ibe yinkangala,

izinhlanzi zayo zife ngenxa yokuswela amanzi.

3Ngembathisa iphezulu umnyama,

ngalembesa ngengalo yokulila.

Ukulalela kwenceku yeNkosi

4INkosi uNkulunkulu inginikile ulimi lofundisayo,

lokwazi ukuba ngiduduze abakhatheleyo.

Ingivusa ekuseni insuku zonke,

ukuba ngizwe njengofundisiweyo.

5INkosi uNkulunkulu iyivulile indlebe yami,

lami kangihlamukanga, kangibuyelanga emuva.

6Ngambulela umhlane wami ukutshwaya,

ngavumela indevu zami ukucuthwa;

kangisithelisanga ubuso bami ehlazweni lokukhafulwa ngamathe.

7Ngoba iNkosi uNkulunkulu iyangisiza;

ngakhoke kangiyangekanga;

ngibuqinisile ubuso bami njengesengentshe,

ngiyazi ukuba kangiyikuyangeka,

8ngoba useduze yena ongimelayo.

Ngubani ongamelana lami na?

Kasondele siphikisane.

Ngubani oyisitha sami na?

Kasondele.

9Khangela, iNkosi uNkulunkulu iyangisiza;

ngubani ozakuthi ngilecala na?

Bonke bazakuguga njengengubo,

badliwe yinondo.

10Lowo ophakathi kwenu oyesabayo iNkosi

kalalele ilizwi lenceku yayo:

ohamba emnyameni ongelakukhanya,

kathembele ebizweni leNkosi,

abambelele kuNkulunkulu wakhe.

11Khangelani, lina lonke eliphemba umlilo,

libase izikhuni,

ngenani phakathi komlilo wenu,

laphakathi kwenkuni elizibasileyo.

Lizakwamukela lokhu esandleni sami,

lizalala phansi ngobuhlungu.