Zaga 27 - Ndebele Bible (iBhayibhili Elingcwele) 1978

1Ungazincomi ngelakusasa,

ngoba kawazi ukuba usuku luzavezani.

2Ukudunyiswa kwakho kakuvele komunye, loba engowemzini,

ungazidumisi wena.

3Ilitshe linzima, letshebetshebe liyasinda,

kodwa ukucatshulwa yisithutha kunzima kulakho kokubili.

4Ulaka lulolunya, lentukuthelo injengesikhukhula;

kodwa ngubani ongema phambi komona na?

5Kungcono ukukhuzwa ngokusobala

kulokufihlelwa uthando.

6Lingcono inxeba lomngane

kulokwangiwa yisitha.

7Umuntu osuthiyo kathandi ukudla inyosi,

kodwa olambileyo konke lokubabayo kumnandi.

8Umuntu okhatshana lomuzi wakhe

unjengenyoni eduhele khatshana lesidleke sayo.

9Amafutha lamakha athokozisa umuntu,

lobungane obumnandi buyamqinisa.

10Ungalahli umngane wakho lomngane kayihlo;

uba uhlupheka ungayi kumfowenu ukucela usizo;

umakhelwana oseduze angasiza kakhulu kulomfowenu okhatshana.

11Mntanami, hlakanipha, ungithokozise,

ukuba ngibe lempendulo kongisolayo.

12Olengqondo ehlakaniphileyo nxa ebona ingozi isiza uyacatsha,

kodwa ongelalwazi uqonda kuyo ahlupheke.

13Thatha isigqoko somuntu othembise ukusiza owemzini,

sibe yisibambiso sowezizwe.

14Ovuka ekuseni, abingelele umakhelwana wakhe ngelizwi elikhulu,

uzakuba njengomqalekisayo.

15Owesifazana oxabanayo ufana lamanzi athonta kokuphela nxa izulu lisina;

16kulula ukukhuza umoya kulaye,

kulula ukubamba amagcobo ngesandla.

17Njengalokhu insimbi ilola insimbi,

umuntu angakhaliphisa omunye.

18Olondoloza isihlahla somkhiwa uzakudla izithelo zaso,

lenceku elondoloza inkosi yayo izakuba lodumo.

19Njengalokhu umuntu angabona ubuso bakhe emanzini,

ngokunjalo angabona isimo sakhe ngesimo somunye.

20Indawo yabafileyo kayisuthi,

lezifiso zomuntu kazaneliswa.

21Igolide lesiliva kuhlolwa esithandweni somlilo,

isimo somuntu sihlolwa ngokudunyiswa kwakhe.

22Giga isithutha ngomgigo engigeni,

ubuthutha baso kabusoze buphele kuso.

23Yelusa kuhle izimvu zakho lenkomo zakho,

24ngoba imfuyo kayiyikuhlala kokuphela,

lenotho kayihlali kuzo zonke izizukulwana.

25Lapho utshani sebuphelile, kuhlume amahlungu,

kubuthwe utshani obuluhlaza obusezintabeni,

26uzazuza izigqoko ngoboya bamawundlu,

lemali yokuthenga isiqinti ngezimbuzi,

27uzuze ezimbuzini uchago lube yikudla okwanele wena lendlu yakho lencekukazi zakho.