1 Sam 10 - Ndebele Bible (iBhayibhili Elingcwele) 1978

USamuweli ugcoba uSawuli

1USamuweli wasethatha umfuma wamagcobo, wawathela ekhanda likaSawuli; wamanga esithi: INkosi iyakugcoba ukuba ube ngumbusi wabantu bayo uIsrayeli; uzabusa abantu beNkosi, ubakhulule ezitheni zabo ezibaphahlileyo. Lokhu kuzakuba yisiboniso kuwe ukuthi iNkosi ikugcobile ukuba ngumbusi wabantu bayo.

2Nxa ususukile kimi lamuhla uzahlangana labantu ababili elibeni likaRaheli eZeliza elizweni lakoBenjamini; bazakuthi kuwe: Obabhemi obuyebadinga sebebonakele, loyihlo useyekele ukucabanga ngabobabhemi, uselinqinekela esithi: Ngizakwenza njani ngendodana yami na?

3Nxa usudlule lapho waya phambili, uzafika esihlahleni esikhulu saseTabori; lapho uzahlangana labantu abathathu besiyakhuleka kuNkulunkulu eBetheli, omunye ephethe amazinyane amathathu, omunye ephethe izinkwa ezintathu, lomunye ephethe imbodlela yewayini.

4Bazakukubingelela bakunike izinkwa ezimbili; uzithathe.

5Emva kwalokho uzafika entabeni kaNkulunkulu lapho kuhlala khona ibutho lamaFilistiya; laphoke, nxa ufika nje emzini uzahlangana lexuku labaprofethi bevela endaweni ephakemeyo yokukhonzela betshaya amachacho, lesigubhu, lomhlanga, lomhubhe, beprofetha.

6Umoya kaNkulunkulu uzakwehlela phezu kwakho masinyane, uprofethe kanye labo, uphenduke omunye umuntu.

7Kuzakuthi lapho lezizibonakaliso zikufikela, wenze lokho okufanele lesosikhathi; uNkulunkulu uzakuba lawe.

8Uzangandulela eGiligali; ngizakuza kuwe nginikele iminikelo yokutshiswa lemihlatshelo yokuthula. Uzangilindela insuku eziyisikhombisa ngize ngifike kuwe, ngikutshele lokho ozakukwenza.

9Kwathi lapho uSawuli esefulathele uSamuweli, uNkulunkulu wamnika inhliziyo entsha; zonke lezizibonakaliso zagcwaliseka mhlalokho.

10Lapho befika entabeni kaNkulunkulu bahlangana lexuku labaprofethi; umoya kaNkulunkulu wehlela phezu kwakhe masinyane, waprofetha kanye labo.

11Kwathi bonke ababemazi ngaphambili bembona eprofetha labaprofethi, babuzana besithi: Kuyini lokhu okwehlele indodana kaKishi na? Kanti loSawuli uphakathi kwabaprofethi na?

12Kwaphendula owakhona wathi: Ngubani uyise wabo na? Ngakho kwasekusiba yisaga ukuthi: Kanti loSawuli uphakathi kwabaprofethi na?1 Sam 19:23, 24

13Eseqedile ukuprofetha wafika endaweni ephakemeyo yokukhonzela.

14Uyise omncinyane kaSawuli wathi kuye lencekwini yakhe: Beliye ngaphi na? Wathi: Besiyedinga obabhemi; kuthe lapho singababoni sasesisiya kuSamuweli.

15Uyise omncinyane kaSawuli wathi: Utheni kini uSamuweli na?

16USawuli wasesithi kuyise omncinyane: Usitshelile impela ukuthi obabhemi sebebonakele. Kodwa indaba yombuso akhuluma ngayo uSamuweli kamtshelanga ngayo.

17USamuweli wababizela abantu eNkosini eMizipa;

18wathi kibo abakoIsrayeli: INkosi uNkulunkulu kaIsrayeli ithi: Ngamkhupha uIsrayeli eGibithe, ngalikhulula kumaGibithe lakuyo yonke imibuso eyayilicindezela.

19Kodwa lamuhla limlahlile uNkulunkulu wenu owalikhululayo engozini zonke lasensizini zenu; lathi: Atshi, sibekele inkosi. Ngakho manini phambi kweNkosi uNkulunkulu ngezizwe zenu langezinsendo zenu.

20USamuweli wasesondeza zonke izizwe zakoIsrayeli; isizwe sakoBenjamini sadliwa yinkatho.

21Wasesondeza isizwe sakoBenjamini ngezindlu zaso, indlu yakoMatiri yadliwa yinkatho. Wasondeza indlu yakoMatiri ngamuntu munye, inkatho yadla uSawuli indodana kaKishi. Kodwa kuthe sebemdinga bamswela.

22Babuya babuza futhi eNkosini bathi: Lowomuntu uke wafika lapha na? INkosi yathi: Nango ucatshile empahleni.

23Basebegijima bamlanda khona, lapho esema phakathi kwabantu, wayemude kulabo bonke abantu kusukela emahlombe akhe kusiya phezulu.

24USamuweli wasesithi kubo bonke abantu: Liyambona lowo iNkosi emkhethileyo na? Kakho loyedwa onjengaye kubo bonke abantu. Bonke abantu bamemeza bathi: Bayethe!

25USamuweli wasebatshela abantu amalungelo lomsebenzi wobukhosi; wakuloba encwadini, wayibeka phambi kweNkosi uNkulunkulu. USamuweli wasebadabulela bonke abantu, bonke baya emakhaya abo.

26USawuli laye waya ekhaya eGibeya, kwahamba laye amadoda angamaqhawe ezinhliziyo zawo uNkulunkulu wayezithintile.

27Kodwa amadoda amabi athi: Uzasisiza njani lumuntu na? Bamdelela, kabamnikanga sipho; kodwa yena wazithulela.