1 Sam 19 - Ndebele Bible (iBhayibhili Elingcwele) 1978

USawuli ufuna ukumbulala uDavida

1USawuli watshela uJonathani lazo zonke inceku zakhe ukuthi uDavida uzabulawa. Kodwa uJonathani indodana kaSawuli wayemthanda kakhulu uDavida.

2UJonathani wamtshela uDavida wathi: USawuli ubaba ufuna ukukubulala; ngakhoke uxwaye kusasa, uhlale ekusithekeni, ucatshe.

3Mina ngizaphuma ngiye kubaba emmangweni lapha ukhona, ngikhulume laye ngawe; aluba ngibona okuthile ngizakukutshela.

4UJonathani wakhuluma okuhle ngoDavida kuSawuli uyise, wathi kuye: Inkosi kayingayoni inceku yayo uDavida, ngoba wena kakonanga, lezenzo zakhe kuwe zilungile.

5Wazifaka engozini ngokubulala umFilistiya; leNkosi uNkulunkulu yamnika wonke uIsrayeli ukunqoba okukhulu. Lawe wakubona lokhu, wathokoza; uzamonelani umuntu ongelacala ngokubulala uDavida engonanga lutho na?

6USawuli walilalela ilizwi likaJonathani, wafunga wathi: Ngifunga iNkosi, kayikubulawa.

7UJonathani wasembiza uDavida, wamtshela konke lokho. UJonathani wasemusa uDavida kuSawuli, wahlala laye njengakuqala.

8Kwabuya kwaba khona impi futhi; uDavida waphuma wayakulwa lamaFilistiya, wawabulala kakhulu aze ambalekela.

9Umoya omubi ovela eNkosini wamehlela uSawuli ehlezi endlini yakhe ephethe umkhonto; uDavida wayetshaya ichacho.

10USawuli wazama ukumbandakanya lomduli ngomkhonto; kodwa wawuvika, umkhonto wahlaba umduli. UDavida waphunyuka, wabaleka.

11Ngalobobusuku uSawuli wathuma izithunywa endlini kaDavida ukuba zimqaphele, ukuze ambulale ekuseni. Kodwa uMikhali umkaDavida wamxwayisa wathi: Uba ungabaleki ngalobubusuku, uzabulawa kusasa.

12Ngakho uMikhali wasemehlisa uDavida ngewindi, wabaleka.

13UMikhali wasethatha isithombe, wasilalisa embhedeni, wabeka umqamelo woboya bembuzi ngekhanda laso, wasembesa ngezingubo.

14Lapho uSawuli esethuma izithunywa ukubamba uDavida, wathi: Uyagula.

15USawuli wasezibuyisela izithunywa ukumbona uDavida esithi: Limlethe lapha kimi ngombheda ukuze ngimbulale.

16Lapho izithunywa zingena, kwakulesithombe embhedeni, lomqamelo woboya bembuzi ungekhanda laso.

17USawuli wasesithi kuMikhali: Ungikhohliseleni ngokunje, wavumela isitha sami sabaleka sahamba na? UMikhali waphendula uSawuli wathi: UDavida wathi kimi: Ngiyekela ngihambe, funa ngikubulale.

18UDavida waphunyuka, wabaleka, waya kuSamuweli eRama; wamtshela konke uSawuli ayekwenze kuye. Yena loSamuweli basuka bayahlala eNayothi.

19USawuli wabikelwa kwathiwa uDavida useNayothi eRama.

20USawuli wasethuma izithunywa ukumbamba uDavida, lapho zibona ixuku labaprofethi beprofetha, loSamuweli emi engumkhokheli wabo, umoya kaNkulunkulu wazehlela izithunywa zikaSawuli, lazo zaprofetha.

21Lapho ebikelwa uSawuli, wathuma ezinye izithunywa, lazo zaprofetha. USawuli wasephinda ethuma ezinye futhi ngokwesithathu, lazo zaprofetha.

22Wasesiya yena uqobo eRama, wafika emthonjeni omkhulu oseSeku; wabuza wathi: Bangaphi oSamuweli loDavida na? Kwathiwa: BaseNayothi eRama.

23Wasesuka lapho waya eNayothi eRama; umoya kaNkulunkulu wehlela laphezu kwakhe; wahamba eprofetha waze wafika eNayothi eRama.

24Laye wakhumula izigqoko zakhe, waprofetha phambi kukaSamuweli, walala phansi enqunu lonke lolosuku labo bonke lobobusuku. Yikho abantu besithi: USawuli laye uphakathi kwabaprofethi na?