2 Kho 1 - Ndebele Bible (iBhayibhili Elingcwele) 1978

Ukufa kukaAhaziya

1Emva kokufa kukaAhabi iMowabi lavukela uIsrayeli.

2UAhaziya wawa ewindini endlini yakhe ephezulu eSamariya, walimala. Wathuma izithunywa, wathi kuzo: Hambani liyebuza kuBali‐Zebubi unkulunkulu waseEkroni ukuthi ngizasila yini ekuguleni kwami.

3Isithunywa seNkosi uNkulunkulu sathi kuElija waseTishibi: Hamba uyehlangabeza izithunywa zenkosi yaseSamariya, uthi kizo: Kungenxa yokuba kakulankulunkulu yini koIsrayeli ukuba liyebuza kuBali‐Zebubi unkulunkulu waseEkroni na?

4Ngakhoke iNkosi ithi: Kawuyikuvuka embhedeni olele kuwo; uzafela khona. UElija wasehambake.

5Izithunywa zabuyela kuAhaziya; wathi kuzo: Libuyeleni masinyane kangaka na?

6Zathi kuye: Sihlangene lomuntu othile osilaye ukuba sibuyele enkosini esithumileyo, siyitshele ukuthi iNkosi uNkulunkulu ithi: Kungenxa yokuba kakulankulunkulu koIsrayeli ukuba uthumele ilizwi ukubuza kuBali‐Zebubi unkulunkulu waseEkroni na? Ngakho kawuyikuvuka embhedeni olele kuwo; uzafela khona.

7Wathi kuzo: ubenjani lowomuntu elihlangene laye, walitshela lokhu na?

8Zathi: Ubegqoke isigqoko soboya, ebophe ngozwezwe okhalweni. Wasesithi: Lowo nguElija waseTishibi.

9Inkosi uAhaziya yasithumela kuElija induna ilabantu bayo abangamatshumi amahlanu. Yafika kuElija yamfica ehlezi phezu kwentaba, yathi kuye: Wena muntu kaNkulunkulu, inkosi iyakulaya ukuba wehle.

10Kodwa uElija wayiphendula induna wathi: Uba ngingumuntu kaNkulunkulu, kakwehle umlilo ovela ezulwini ukuqothule wena labantu bakho abangamatshumi amahlanu. Wasusehla umlilo uvela ezulwini, wayiqothula labantu bayo.Luka 9:34

11Inkosi yabuya yathuma enye induna labantu bayo abangamatshumi amahlanu. Layo yafika yathi kuye: Wena muntu kaNkulunkulu, inkosi iyakulaya ukuba wehle masinyane.

12Kodwa uElija wabaphendula wathi kibo: Uba ngingumuntu kaNkulunkulu kakwehle umlilo ovela ezulwini ukuqothule wena labantu bakho abangamatshumi amahlanu. Umlilo kaNkulunkulu wasusehla uvela ezulwini, wayiqothula labantu bayo.

13Inkosi yabuye yathuma futhi enye induna labantu bayo abangamatshumi amahlanu. Leyonduna yesithathu yafika yaguqa phambi kukaElija, yamncenga isithi: Wena muntu kaNkulunkulu, akuphathe kuhle ukuphila kwami lokwezinceku zakho ezingamatshumi amahlanu;

14ngoba umlilo wehla uvela ezulwini, waqothula induna ezimbili zakuqala, yileyo laleyo yafa labantu bayo abangamatshumi amahlanu; kodwa okwami ukuphila ake ukuphathe kuhle.

15Isithunywa seNkosi uNkulunkulu sasesisithi kuElija: Hamba laye, ungamesabi. Wasesuka, bahamba bonke enkosini;

16wathi kuyo: INkosi uNkulunkulu ithi: Ngoba uthume izithunywa ukuyabuza kuBali‐Zebubi, unkulunkulu waseEkroni, kawuyikuvuka embhedeni olele kuwo; uzafela khona.

17UAhaziya wasesifa njengokutsho kwelizwi leNkosi elakhulunywa nguElija. UJehoramu umfowabo waba yinkosi esikhundleni sakhe ngomnyaka wesibili wokubusa kukaJoramu indodana kaJehoshafati inkosi yakoJuda, ngoba uAhaziya wayengelandodana.

18Ezinye indaba zikaAhaziya zilotshiwe ogwalweni lwezindaba zamakhosi akoIsrayeli.