Jobe 17 - Ndebele Bible (iBhayibhili Elingcwele) 1978

1Umoya wami uphelile, lensuku zami ziyancipha,

ngilindelwe liliba.

2Impela kukhona abangiklolodelayo,

lamehlo ami asekugconeni kwabo.

3Akube yisibambiso sami kuwe, Nkulunkulu,

ngoba ngubani ongangikhuphela isibambiso na?

4Lokhu uvalile ingqondo zabo ekuqedisiseni,

ngakho kawuyikubayekela baphumelele.

5Oceba abangane bakhe

ukuba azuze isabelo sempahla yabo,

amehlo abantwana bakhe azafiphala.

6Ungenze ngaba yisiga ezizweni,

ngaba ngokhafulelwayo.

7Amehlo ami afiphele ngosizi,

lazo zonke izitho zami sezilithunzi nje.

8Abaqotho kuyabethusa lokhu,

longelacala uvukela abangamesabiyo uNkulunkulu.

9Kanti olungileyo ubambelela endleleni yakhe,

lolezandla ezimhlophe uyaqina njalo.

10Kodwa lina, phindani phela lonke,

Kangiyikufumana oyedwa ohlakaniphileyo phakathi kwenu.

11Insuku zami ziphelile, lamacebo ami achithekile,

kanye lezifiso zenhliziyo yami.

12Imini iphenduka ubusuku,

lokukhanya kokusa kuyafiphala phambi kwami.

13Uba ngisenza indawo yabafileyo ibe yindlu yami,

uba ngisandlala icansi lami emnyameni,

14uba ngibiza iliba ngokuthi ngubaba,

lempethu ngokuthi ngumama kumbe ngudadewethu,

15phoke ithemba lami lizabe lingaphi na?

Ngubani ozananza ukulunga kwami na?

16Lokhu kuzakwehlela lami endaweni yabafileyo,

loba kutshone lami emhlabathini na?