Hubo 106 - Ndebele Bible (iBhayibhili Elingcwele) 1978

Ukona kukaIsrayeli lokuthembeka kweNkosi

1Dumisani iNkosi!

Ibongeni iNkosi ngoba ilungile,

ngoba uthando lwayo olungapheliyo kumi kuze kube nininini.

2Ngubani ongalandisa ngezenzo zeNkosi zamandla,

ayidumise ngokwaneleyo na?

3Babusisiwe bona abenza okufaneleyo,

abenza ukulunga ngazo zonke izikhathi.

4Ungikhumbule, Nkosi, lapho utshengisa umusa ebantwini bakho;

ungisize lapho ubakhulula,

5ukuze ngibone impumelelo yabakhethiweyo bakho,

ngithokoze ekuthokozeni kwesizwe sakho,

ngiziqhenye kanye labantu bakho.

6Sonile thina labokhokho bethu,

senzile okungalunganga, sonakele.

7Okhokho, lapho babeseGibithe,

kabayinanzelelanga imisebenzi yakho emangalisayo;

izenzo ezinengi zothando lwakho olungapheliyo;

kodwa bamvukela oPhezukonke ngasoLwandle oluBomvu.

8Kanti yena wabakhulula ngenxa yebizo lakhe,

ukuze abonakalise amandla akhe amakhulu.

9Wakhuza uLwandle oluBomvu, lwatsha;

wabahambisa phakathi kwalo

njengokungathi badabula enkangala.

10Ngakho wabakhulula esandleni somufo,

wabakhulula emandleni esitha.

11Amanzi asibekela izitha zabo;

kakusalanga loyedwa kuzo.

12Basebekholwa amazwi akhe,

bahlabelela kuye.

13Kodwa baphanga bakhohlwa imisebenzi yakhe,

kabalindelanga iseluleko sakhe.

14Babelokukhanuka okubi enkangala,

bamlinga uNkulunkulu enkangala.

15Wabanika abakufisayo,

kodwa wathumela isifo esibulalayo phakathi kwabo.

16Kwathi lapho besiba lomhawu ngoMose ezihonqweni

langoAroni ongcwele weNkosi,

17umhlaba wavuleka wamginya uDathani,

wasibekela iqembu likaAbiramu.

18Kwavutha lomlilo eqembini labo,

lelangabi laqothula abangalunganga.

19Benza ithole eHorebe,

bakhonza isithombe esibunjiweyo.

20Bamisa inkabi edla utshani

esikhundleni senkazimulo kaNkulunkulu.

21Bamkhohlwa uNkulunkulu, uMkhululi wabo,

owayenze izinto ezinkulu eGibithe,

22lemisebenzi emangalisayo elizweni likaHamu,

lezinto ezesabekayo ngasoLwandle oluBomvu.

23Ngakho wathi uzakubabhubhisa,

kodwa uMose okhethiweyo wakhe wabamela

ukuthinta ulaka lwakhe

ukuba lungababhubhisi.

24Baleya ilizwe elihle,

bengasikholwa isithembiso sakhe.

25Basola besemathenteni abo,

bengalaleli ilizwi leNkosi.

26Ngakhoke waselula isandla sakhe wafunga,

ukuba uzakubaqeda enkangala,

27achithele inzalo yabo ezizweni, ayihlakaze emazweni.

28Bazihlanganisa labakhonza uBali wasePeyori,

badla okuhlatshelwe izithombe.

29Bayithukuthelisa iNkosi ngezenzo zabo,

kwavela umkhuhlane phakathi kwabo.

30Kwasekulamula uFiniyasi, umkhuhlane waphela.

31Lokhu wakubalelwa njengokulunga

ezizukulwaneni ngezizukulwana kuze kube nininini.

32Bayithukuthelisa ngasemanzini aseMeriba,

uMose wahlupheka ngenxa yabo;

33ngoba badabula umoya wakhe,

waze wakhuluma ngamawala.

34Kabababhubhisanga abantu,

njengokulaywa kwabo yiNkosi,

35kodwa bahlangana lezizwe,

bafunda imisebenzi yazo.

36Bakhonza izithombe zazo ezaba ngumjibila kubo.

37Banikela amadodana lamadodakazi abo ezithombeni;

38bachitha igazi elingelacala,

igazi lamadodana lamadodakazi abo,

abanikela ngawo ezithombeni zaseKanani;

ilizwe lagcwala igazi.

39Bangcola ngokunjalo ngemisebenzi yabo,

benza ukuphinga ngezenzo zabo.

40Lwaseluvutha ulaka lweNkosi ebantwini bayo,

baba yisinengiso kuyo.

41Yabanikela ezandleni zezizwe

ukuze ababazondayo bababuse.

42Izitha zabo zabacindezela,

baba ngaphansi kwamandla azo.

43Yabakhulula kanengi,

kodwa babehlamuka ngamacebo abo,

bawiswa yibubi babo.

44Loba kunjalo yabona ukuhlupheka kwabo,

lapho isizwa ukukhala kwabo.

45Yakhumbula isivumelwano sayo ngenxa yabo,

yaphenduka ngenxa yobukhulu bothando lwayo olungapheliyo.

46Yabenza ukuba bahawukelwe yibo bonke ababebathumbile.

47Sikhulule, Nkosi Nkulunkulu wethu,

usibuthe ezizweni,

ukuba sidumise ibizo lakho elingcwele,

sithabe ekukudumiseni.

48Kayibongwe iNkosi, uNkulunkulu kaIsrayeli,

kusukela endulo kuze kube nini lanini!

Abantu bonke kabathi: Ameni.

Dumisani iNkosi!

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help