Isa 40 - Ndebele Bible (iBhayibhili Elingcwele) 1978

Abantu bakaNkulunkulu bayaduduzwa

1Duduzani, libaduduze abantu bami,

kutsho uNkulunkulu wenu.

2Misani iJerusalema isibindi,

limemeze kulo ukuthi insuku zalo zobunzima seziphelile,

lokuthi lithethelelwe ububi balo,

ngoba lamukelisiwe esandleni seNkosi okuphindwe kabili

ngazo zonke izono zalo.

3Ilizwi lomemezayo lithi:

Lungisani enkangala indlela yeNkosi,

licande enkangala umgwaqo kaNkulunkulu wethu.

4Zonke izigodi zizagqitshwa,

amaqaqa wonke lezintaba zonke kudilizwe;

amagodigodi wonke agqitshwe,

lamaxhakaxhaka alungiswe.

5Inkazimulo yeNkosi izakubonakaliswa,

bonke abantu bayibone kanyekanye,

ngoba iNkosi ikukhulumile lokhu.

6Ilizwi lithi: Memeza!

Mina ngathi: Ngizakumemeza ngithini na?

Wothi: Abantu bonke banjengotshani,

kabahlali ukwedlula amaluba eganga.

7Utshani buyabuna, lamaluba awohloke,

lapho umoya weNkosi uphephetha phezu kwakho;

impela abantu bangutshani.

8Utshani buyabuna, lamaluba awohloke,

kodwa ilizwi likaNkulunkulu wethu limi kuze kube nini lanini.

9Khwela entabeni ende, wena obika indaba ezijabulisayo eZiyone,

uphakamise ilizwi lakho umemeze,

wena obika indaba ezijabulisayo eJerusalema,

uliphakamise ungesabi,

utsho emizini yakoJuda uthi:

Khangelani, nangu uNkulunkulu wenu.

10Khangelani, iNkosi uNkulunkulu iyeza ilamandla ukubusa,

iyeza lomvuzo wayo, lenkokhelo yayo iphambi kwayo.

11Izakwelusa umhlambi wayo njengomalusi,

ibuthe amawundlu ngezingalo zayo,

iwagone esifubeni sayo,

ihole kuhle amadlezane.Ngubani onjengoNkulunkulu na?

12Ngubani olinganise amanzi ngentende yesandla sakhe,

walinganisa iphezulu ngeminwe yakhe eyeluliweyo,

wafaka yonke inhlabathi yomhlaba emganwini,

walinganisa intaba ngesikali, lamaqaqa ngezisindo na?

13Ngubani oweluleka umoya weNkosi,

wayifundisa engumluleki wayo na?

14Ngubani owayelulekayo waze wayiqondisa,

wayifundisa indlela yokulunga,

wayinika ulwazi, wayazisa indlela yokuqedisisa na?

15Khangelani, kuyo izizwe zinjengethonsi elithonta enkonxweni,

zibalwa njengothuli olusezikalini.

Amazwe angasolwandle ayaziphakamisa njengothuli lucholekile.

16ILebanoni lonke kalilazo inkuni ezinganela ukubasa,

lenyamazana ezinganela umnikelo wokutshiswa.

17Zonke izizwe kazisilutho phambi kwayo,

kazisilutho, ziyize kuyo.

18Lizamfanisa lobanike uNkulunkulu,

loba limlinganise lomfanekiso kabani na?

19Uyisithombe esibunjwe yisisebenzi,

sananyekwa ngegolide ngumkhandi,

samiswa phezu kwesisekelo sesiliva na?

20Lowo owenza isithombe sesigodo uyakhetha isihlahla esingaboliyo,

adinge umbazi ohlakaniphileyo ukuba asimise siqine.

21Kalazi yini, kalizwanga na?

Kalitshelwanga kusukela ekuqaleni na?

Kaliqedisisanga kusukela ekudatshulweni komhlaba na?

22UNkulunkulu uhlala phezulu, phezulu khatshana labakhileyo emhlabeni,

baze bakhangeleke njengentethe;

uyendlala isibhakabhaka njengelembu,

aselule njengethente lokuba kuhlalwe kulo;

23uyachitha izikhulu, enze ababusi bomhlaba babe yize.

24Banele ukugxunyekwa, banele ukuhlanyelwa,

lesiqu sabo sanele ukugxila nje emhlabathini,

abesephephetha phezu kwabo babune,

lesivunguzane sibaphephule njengamabibi.

25Pho, lizangilinganisa lobani,

lizangifanisa lobani na? kutsho oNgcwele.

26Phakamiselani amehlo enu phezulu libone;

ngubani owenza izinkanyezi leziyana na?

Nguye ozikhupha njengebutho, azibize zonke ngamabizo azo;

ngenxa yobukhulu bamandla akhe, ngoba eqinile,

kayikho leyodwa esilelayo.

27Utsholoni, wena Jakobe,

ukhulumelani, wena Israyeli ukuthi:

Indlela yami isithekile eNkosini

lelungelo lami kalinanzwa nguNkulunkulu wami.

28Kawazi yini, kawukezwa na?

INkosi inguNkulunkulu ongelakuphela,

inguMdali womhlaba wonke.

Kayipheli amandla ikhathale,

lemicabango yayo ingeqedisiswe muntu.

29Inika amandla labo abaphelelwa ngamandla,

longelamandla iyawandisa amandla akhe.

30Izinsizwa zizaphelelwa ngamandla zikhathale,

lamajaha azakukhubeka awe;

31kodwa abayithembayo iNkosi bazazuza amandla amatsha,

bazakuqonga ngamaphiko njengokhozi,

bagijime bangadinwa, bahambe bangapheli amandla.